At least 10 hills destroyed in Guwahati Pamohi:
ৰাজ্য চৰকাৰৰ পৃষ্ঠপোষকতাত উন্নয়নৰ নামত প্রকৃতি ধ্বংসযজ্ঞৰ বিৰুদ্ধে ৰাজ্যৰ বিভিন্ন প্রান্তত উত্তাল প্রতিবাদ অব্যাহত থকাৰ সময়তে মহানগৰীত কমেও ১০খন পাহাৰ তথাকথিত উন্নয়নৰ নামত ধ্বংস কৰাৰ ভয়াৱহ তথ্য উন্মোচিত হৈছে। বন বিভাগৰ কামৰূপ পূব সংমণ্ডল (বশিষ্ঠ) ৰ অধীনৰ গড়চুক-দীপৰ বিল সংযোগী পথছোৱাৰ দাঁতিকাষৰীয়া কে’বাখনো বৃহৎ পাহাৰত খননকার্য চলাই সেইবোৰ নিশ্চিহ্ন কৰাৰ গুৰুতৰ অভিযোগ উত্থাপিত হৈছে।
জালকুবাৰী-খানাপাৰা সংযোগী ছয়শাৰীযুক্ত পথ নিৰ্মাণৰ নামত এই পাহৰসমূহৰ মাত্র ১০ শতাংশ খননৰ বাবে বন বিভাগে অনুমতি প্রদান কৰিছিল যদিও ইয়াৰ সুযোগ লৈ পামহীত কমেও ১০খন পাহাৰ খনন কৰি সম্পূৰ্ণৰূপে ধূলিসাৎ কৰি পোলোৱা হ’ল। সমান্তৰালভাবে এই পাহাৰসমূহ খনন কৰাৰ পাছত ওলোৱা মাটি কেৱল চৰকাৰী কামতহে ব্যৱহাৰৰ অনুমতি প্রদান কৰা হয় যদিও পাহাৰৰ মাটি প্রতি ডাম্পাৰত তিনি-চাৰি হেজাৰ টকাত অবাধে বিক্রী কৰা হৈছে। সম্প্রতি সেই পথৰে যোৱা সচেতন নাগৰিক তথা
উল্লেখ্য যে যি সময়ত ৰাজ্য চৰকাৰে গড়ভঙা সংৰক্ষিত বনাঞ্চলৰ পৰা বন্যপ্রাণী অভয়াৰণ্য স্বীকৃতিৰ অধিসূচনা বাতিল কৰিলে, সেই সময়ত সংৰক্ষিত বনাঞ্চলখনৰ গাতে স্বয়ং বন বিভাগৰ একাংশ বিষয়াৰ পৃষ্ঠপোষকতাত পাহাৰ ধ্বংসযজ্ঞ অব্যাহত আছে। চর্চা চলিছে যে সংৰক্ষিত বনাঞ্চলখনৰ বৃহৎ পৰিমাণৰ ভূমি পুঁজিপতি কোম্পানীৰ লগতে বহু প্ৰভাৱশালী লোকৰ দখলত আছে আৰু এই ভূমিক ঔদ্যোগিক তথা বাণিজ্যিক কাৰণত ব্যৱহাৰৰ ক্ষেত্ৰত বৈধতা প্রদান কৰিবলৈকে বনাঞ্চলখনৰ বন্যপ্রাণী অভয়াৰণ্যৰ স্বীকৃতি বাতিল কৰা হৈছে। হাতীকে ধৰি বিভিন্ন বনৰীয়া জন্তু, বিভিন্ন প্রজাতিৰ পখিলা আদিৰে ভৰি থকা বনাঞ্চলখনৰ পৰা কি কাৰণত এই স্বীকৃতি বাতিল কৰা হৈছে, বহুজনৰ বাবে ই সাঁথৰ যদিও ইয়াৰ আঁৰত ভূমিৰ শ্ৰেণী পৰিৱৰ্তনৰ দিশ সোমাই আছে বুলিও বিভিন্নজনৰ মনত সন্দেহ ওপজিছে।
উল্লেখ্য যে অসম-মেঘালয়ৰ সীমান্তত অৱস্থিত ১১৭ বর্গ কিলোমিটাৰ বনাঞ্চলে আগুৰি থকা গড়ভঙা সংৰক্ষিত বনাঞ্চলৰ এটা দিশত গুৱাহাটী মহানগৰীৰ গাতে লাগি আছে। বনাঞ্চলখনৰ পুৰণি মানচিত্ৰত ইয়াৰ পৰিসীমা দীপৰ বিলৰ সমীপলৈকে আছিল যদিও পর্যায়ক্রমে ই বেদখলৰ কৱলত পৰি সংকুচিত হৈ পৰে বুলি স্থানীয় কে’বাজনো লোকে ‘দৈনিক অগ্রদূত’ৰ আগত সদৰী কৰে। এতিয়া পামহিৰ যি স্থানত পাহাৰসমূহ খনন কৰি থকা হৈছে, এই পাহাৰসমূহ গড়ভঙাৰ ভিতৰতে আছিল বুলি স্থানীয় লোকে সদৰী কৰি প্ৰকৃতিৰ সৃষ্টি এই পাহাৰসমূহ এতিয়া নিঃশেষ কৰি পেলোৱাত তীব্র ক্ষোভ প্রকাশ কৰে। লগতে দৈনিক ভিভিআইপি-ভিআইপিয়ে চলাচল কৰা পথছোৱাৰ সংলগ্ন বৃহৎ পাহাৰ সকলোৰে চকুৰ সন্মুখতে কাটি নিঃশেষ কৰি পেলোৱা দৃশ্যই প্রকৃতিপ্রেমীসকলক ক্ষুব্ধ কৰি তুলিছে।
আনহাতে, অঞ্চলটোৰ একাংশ লোকৰ ভূমিৰ নথিপত্ৰ আছে যদিও কে’বাখনো বৃহৎ পাহাৰে আগুৰি থকা আন একাংশ দখলীকৃত ভূমিৰ বৈধ নথিপত্র এতিয়াও নাই বুলি স্থানীয় লোকে অভিযোগ কৰে। শেহতীয়াকৈ এই বৃহৎ পাহাৰযুক্ত ভূমি সংৰক্ষণমুক্ত কৰি ব্যৱহাৰৰ উপযোগী কৰি তুলিবলৈ এটা চক্রই প্রচেষ্টা অব্যাহত ৰাখিছে। স্থানীয় লোকে ভূমিখিনিৰ প্ৰকৃত গৰাকীৰ সন্দর্ভত জ্ঞাত নহয় যদিও ‘আদানী গ্রুপ’-এ এই পাহাৰ খনন কৰি থকা বুলিহে তেওঁলোক জ্ঞাত। ইপিনে, ‘দৈনিক অগ্রদূত’ৰ অভিযানত পোহৰলৈ অহা তথ্য অনুসৰি, ধাৰিৱাল বিল্ডটেক নামৰ এটা পথ নিৰ্মাণকাৰী সংস্থাই এই পাহাৰসমূহ খননৰ বাবে বন বিভাগৰ পৰা অনুমতি লাভ কৰিছিল।
ইয়াৰ সত্যতা স্বীকাৰ কৰি সেই সময়ৰ বন বিভাগৰ কামৰূপ পূব সংমণ্ডল (বশিষ্ঠ)ৰ ডিএফঅ’ ৰোহিণী বল্লভ শইকীয়াই কয় যে ২০২২ত এই অনুমতি প্রদান কৰা হৈছিল। বিশেষকৈ দুখন পাহাৰৰ কিছু অংশ ভূমি খনন কৰি চৰকাৰী পথ নির্মাণত ব্যৱহাৰ কৰিবলৈ অনুমতি প্রদান কৰা হৈছিল। পাহাৰ কেইখনৰ কিমান অংশ খনন কৰিবলৈ অনুমতি প্রদান কৰা হৈছিল এই সন্দর্ভত বন বিষয়াজনে সম্প্রতি তেওঁৰ লগত তথ্য মজুত নাই বুলি মন্তব্য কৰে। অৱশ্যে বন বিভাগৰ এক সূত্ৰই সদৰী কৰা অনুসৰি, জালুকবাৰী-খানাপাৰা সংযোগী ৰাষ্ট্ৰীয় ঘাইপথ নিৰ্মাণৰ দায়িত্বত থকা উল্লিখিত পথ নিৰ্মাণকাৰী কোম্পানীটোক পামহিৰ পাহাৰৰ ১০ শতাংশহে মাটি কাটিবলৈ অনুমতি প্রদান কৰা হৈছিল। ইয়াৰ সুযোগ লৈ অসাধু পন্থাৰে নিৰ্মাণকাৰী সংস্থাটোৱে কমেও ১০খন পাহাৰৰ ৬০ শতাংশৰো অধিক মাটি কাটি লৈ যোৱাৰ অভিযোগ উঠিছে।
দুই-এখন পাহাৰৰ ৯০ শতাংশ পর্যন্ত মাটি কাটি সমতল ভূমি সৃষ্টি কৰাৰো অভিযোগ আছে; কিন্তু বন বিভাগৰ অনুমতিৰ সুযোগ বুজি বহিঃৰাজ্যৰ কোম্পানীটোৱে সকলোৰে চকুৰ সন্মুখত কিদৰে বৃহৎ পাহাৰসমূহ কাটি তহিলং কৰিলে, তাক লৈ বিভিন্নজনৰ মনত প্ৰশ্নৰ উদয় হৈছে। আনকি এই পাহাৰসমূহৰ পৰা ডাম্পাৰে ডাম্পাৰে মাটি বিক্রীও কৰা হ’ল। এই মাটি বিক্ৰী কৰা টকাৰ ভাগ বন বিভাগৰ একাংশ বিষয়াৰ জেপলৈও যোৱাৰ সন্দেহ কৰিছে স্থানীয় লোকে। অভিযোগ অনুসৰি এই খনন কাৰ্যৰ স’তে স্থানীয় একাংশও জড়িত হৈ আছে; কিন্তু গড়ভঙা বনাঞ্চলৰ গাতে থকা এই পাহাৰ কাটি উক্ত স্থান সমতল ভূমিলৈ পৰিৱৰ্তন কৰা কাৰ্যত কাৰোবাৰ স্বার্থ জড়িত হৈ থকাৰ সন্দেহ প্রকাশ কৰিছে একাংশই।
পাহাৰ খনন কৰা ভূমিসমূহ কাৰ, স্থানীয় লোকসকল জ্ঞাত নহয় যদিও বৃহৎ বৃহৎ পাহাৰ থকাৰ বাবে মাটিসমূহ বন বিভাগৰ বাহিৰে আনৰ কিদৰে হ’ব বুলি প্রশ্ন উত্থাপন কৰে। আনহাতে, পাহাৰ থকা স্থান সমতল ভূমিলৈ পৰিৱৰ্তন হোৱাৰ পাছত সেই স্থানত উদ্যোগ নির্মাণ হ’ব বুলিও স্থানীয় লোকসকলক কোৱা হৈছে, য’ত তেওঁলোকক সংস্থাপনৰ প্রলোভন দিয়া হৈছে। এইদৰে উন্নয়নৰ নামত কমেও ১০খন পাহাৰ কাটি ধূলিসাৎ কৰা হৈছে আৰু এই ক্ষেত্ৰত চৰকাৰৰ লগতে প্রকৃতিপ্রেমী সংগঠনসমূহেও সম্পূর্ণ মৌনতা অৱলম্বন কৰিছে। তাৎপর্যপূর্ণ দিশটো হ’ল যে এই পাহাৰ খনন কৰি থকা অঞ্চল স্বয়ং মুখ্যমন্ত্রী ড° হিমন্ত বিশ্ব শৰ্মাৰ গৃহ সমষ্টিৰ অন্তৰ্গত।
