Badruddin Ajmal:
ৰাষ্ট্ৰপতি, প্ৰধানমন্ত্ৰীৰ পিছত এইবাৰ ৰাষ্ট্ৰসংঘৰ মানৱ অধিকাৰ উচ্চায়ুক্তলৈ বাংলাদেশত হিন্দু সংখ্যালঘুসকলে সন্মুখীন হোৱা আতংকজনক পৰিস্থিতি সন্দৰ্ভত গভীৰ উদ্বেগেৰে এখনি পত্ৰ প্ৰেৰণ কৰিছে এ আই ইউ ডি এফৰ সভাপতি তথা প্রাক্তন সাংসদ মৌলানা বদৰুদ্দিন আজমলে।
পত্র খনিত তেওঁ উল্লেখ কৰে যে,আন্তঃৰাষ্ট্ৰীয় সমাজে মানৱ অধিকাৰ ৰক্ষাৰ প্ৰতিশ্ৰুতি দিয়াৰ পিছতো শেহতীয়া প্রতিবেদনসমূহত হিন্দু সংখ্যালঘুসকলৰ লগতে তেওঁলোকৰ ধৰ্মীয় স্থানসমূহৰ বিৰুদ্ধে হিংসা আৰু আক্ৰমণ বৃদ্ধি হোৱা পৰিলক্ষিত হৈছে। যিবোৰ কিছুমান বিশেষ গোটে সংঘটিত কৰিছে। বাংলাদেশৰ অন্তৱৰ্তীকালীন চৰকাৰে এই দুৰ্বল জনসংখ্যাৰ জীৱন, সম্পত্তি, পবিত্র স্থানৰ বাবে পর্যাপ্ত সুৰক্ষা প্ৰদান কৰাত যেন ব্যর্থ হৈছে। অসংখ্য হিংসাত্মক ঘটনাৰ ফলত মর্মান্তিকভাৱে প্ৰাণ হেৰুৱাইছে, ঘৰ-দুৱাৰ ধ্বংস হৈছে, হিন্দু সংখ্যালঘুৰ সম্পত্তি লুটপাত হৈছে।
এই চলি থকা সংকটে এই লোকসকলৰ সুৰক্ষা বিপন্ন কৰাই নহয়, নিৰাপত্তাহীনতা আৰু ভয়ৰ দ্বাৰা চিহ্নিত পৰিৱেশত ডাঙৰ-দীঘল হোৱা তেওঁলোকৰ সন্তানৰ ভৱিষ্যতৰ প্ৰতিও ভাবুকি কঢ়িয়াই আনিছে। এনে কাৰ্যই কেৱল মানৱ অধিকাৰৰ তীব্ৰ উলংঘা কৰাই নহয়, বাংলাদেশৰ হিন্দু সংখ্যালঘুসকলৰ মাজত ভয় আৰু নিৰাপত্তাহীনতাৰ পৰিৱেশ সৃষ্টি কৰে, যাৰ ফলত তেওঁলোকে অহৰহ ভাবুকিৰ সন্মুখীন হ’বলৈ বাধ্য হয়। গতিকে আন্তঃৰাষ্ট্ৰীয় সমাজে এই উলংঘাসমূহৰ প্ৰতি লক্ষ্য ৰাখি বাংলাদেশ চৰকাৰক জবাবদিহি কৰাটো অতি প্রয়োজনীয় যে তাত হিন্দু সংখ্যালঘু জনসংখ্যাক সুৰক্ষা দিব নোৱাৰাৰ বাবে বাংলাদেশ চৰকাৰক জবাবদিহি কৰিব লাগে বুলি পত্র খনিত ব্যক্ত কৰে।
তদুপৰি পত্ৰ খনিত ক্ষতিগ্রস্ত লোকসকলে সমর্থন আৰু পোষকতাৰ বাবে বিশ্ব সম্প্রদায়ৰ ফালে চাই আছে বুলি উল্লেখ কৰি শান্তিপূর্ণভাৱে জীয়াই থকাৰ অধিকাৰৰ আশ্বাস বিচাৰি আজমলে আৰু উল্লেখ কৰে যে এনে পৰিস্থিতিত এজন দায়িত্বশীল ভাৰতীয় নাগৰিক হিচাপে আৰু এ আই ইউ ডি এফৰ সভাপতি হিচাপে, লগতে অসম ৰাজ্যিক জমিয়ত উলেমাৰ সভাপতি হিচাপে আহ্বান জনাইছো। বাংলাদেশৰ হিন্দু সংখ্যালঘুসকলৰ মানৱ অধিকাৰ আৰু জীৱন সুৰক্ষিত কৰাৰ বাবে সকলো সম্ভৱপৰ ব্যৱস্থা গ্রহণ কৰক।
বিশেষভাৱে বাংলাদেশ চৰকাৰৰ ওপৰত হেঁচা প্ৰয়োগ কৰি হিন্দু সংখ্যালঘু আৰু তেওঁলোকৰ পূজাস্থলীৰ সুৰক্ষা আৰু নিৰাপত্তা নিশ্চিত কৰাৰ বাবে তাৎক্ষণিক পদক্ষেপ গ্ৰহণ কৰক। তদুপৰি এই জঘন্য কাৰ্য্যৰ বাবে দায়ীসকলক আদৰ্শগত শাস্তিৰ ব্যৱস্থাৰ আহ্বান জনোৱাৰ লগতে ভৱিষ্যতে এনে হিংসাক বাধা দিবলৈ আৰু আইনৰ শাসন বজাই ৰাখিবলৈ পত্ৰৰ জৰিয়তে আহ্বান জনায়। মানৱ অধিকাৰ সুৰক্ষা সকলো জাতিৰ বাবে সর্বোচ্চ অগ্রাধিকাৰ হ’ব লাগে। বাংলাদেশৰ হিন্দু সংখ্যালঘুসকলে আন্তঃৰাষ্ট্ৰীয় সমাজৰ সংহতি আৰু সমর্থনৰ যোগ্য।
গতিকে বাংলাদেশত অর্থপূর্ণ পৰিৱৰ্তনৰ পোষকতা কামনা কৰি প্ৰতিজন ব্যক্তিয়ে নিজৰ ধৰ্মীয় বিশ্বাস নির্বিশেষে যাতে তাত শান্তি আৰু নিৰাপদে জীয়াই থাকিব পাৰে তাৰ বাবে ৰাষ্ট্ৰসংঘৰ মানৱ অধিকাৰ উচ্চায়ুক্তলৈ পত্র খনিত অনুৰোধ জনাই আজমলে আশা ব্যক্ত কৰে।