Livestock and poultry fair :
গুৱাহাটীৰ খানপাৰাস্থিত ফাৰ্ম গেট খেল পথাৰত চলি থকা পশুধন আৰু হাঁহ-কুকুৰা মেলাৰ আজি দ্বিতীয় দিনা দৰ্শকৰ যথেষ্ট ভিৰ পৰিলক্ষিত হয়। মেলাত উত্তৰ-পূৰ্বাঞ্চলৰ বিভিন্ন প্ৰান্তৰ বিপণিসমূহত উপলব্ধ ভিন্ন প্ৰজাতিৰ গৰু, ম’হ, ছাগলী, হাঁহ, কুকুৰা, টাৰ্কি, পাৰ, ইমু, গিনি ফাউল, বতা চৰাই, শহা আদিয়ে বিশেষভাৱে আকৰ্ষিত কৰিছে দৰ্শকসকলক।
তদুপৰি, নানা ধৰণৰ স্থানীয় খাদ্যবস্তু যেনে- বৰা চাউল, জহা চাউল, চিৰা, আখৈ, গুৰ, দৈ, ক্ৰীম, কণী, মাংস , পাচলি আদিৰ ক্ৰয়-বিক্ৰয়ৰ লগতে কৃষি আৰু পশুপালনক ব্যৱহৃত বিভিন্ন অত্যাধুনিক যন্ত্ৰ, সঁজুলি আদিৰ প্ৰদৰ্শন কৰা হৈছে।
আজি পশুপালক-উদ্যোগী আৰু বেংক বিষয়াসকলৰ মাজত অনুষ্ঠিত হোৱা ঋণ আৰু ৰেহাই সম্পৰ্কীয় এক আলোচনাচক্ৰ অনুষ্ঠিত হয় আৰু ইয়াত কেইবাটাও বেংক তথা বিত্তীয় প্ৰতিষ্ঠানৰ উচ্চ পদস্থ বিষয়া উপস্থিত থাকে। বেংক বিষয়াসকলে ঋণ সম্পৰ্কীয় তথ্যসমূহ অৱগত কৰে আৰু পশুপালক সকলক এই ঋণৰ সুবিধা গ্ৰহণ কৰিবলৈ আহ্বান জনায়।
আনহাতে, মেলা উপলক্ষে ৰাজ্যৰ সফল উদ্যোগীসকলৰ মাজত এক মত বিনিময় অনুষ্ঠানৰ লগতে ছাত্ৰ-ছাত্ৰী সকলৰ মাজত চিত্ৰাংকন প্ৰতিযোগিতা অনুষ্ঠিত কৰা হয়। অসম পশুধন আৰু হাঁহ-কুকুৰা নিগমৰ অধ্যক্ষ মনোজ শইকীয়াই কয় যে ১২ জানুৱাৰীৰ অন্তিম দিনত আৰু অধিক দৰ্শকৰ আশা কৰা হৈছে।
অন্তিম দিনা পুৱা ১০ বজা পৰা কুকুৰ আৰু মেকুৰীৰ প্ৰদৰ্শনীমূলক প্ৰতিযোগিতা অনুষ্ঠিত হ’ব আৰু বিয়লিৰ সামৰণি অনুষ্ঠানত ৰাজ্যৰ নিৰ্বাচিত সফল পশুপালক সকলক পুৰস্কাৰ প্ৰদান কৰা হ’ব। উক্ত সভাত অসমৰ ৰাজ্যপালৰ উপৰিও সামাজিক আৰু ৰাজনৈতিক ক্ষেত্ৰৰ কেইবাগৰাকী বিশিষ্ট ব্যক্তিয়ে অংশগ্ৰহণ কৰিব।
