Indian banks have lost Rs 14 lakh crore in 10 years:
প্রধানমন্ত্রী নৰেন্দ্ৰ মোদীৰ প্ৰথম ১০টা বছৰৰ কাৰ্যকালত দেশৰ বেংকসমূহে ১৪ লাখ কোটি টকা হেৰুৱাৰ তথ্য পোহৰলৈ আহিছে। লক্ষ্যণীয়ভাবে এই তথ্য বিৰোধী শিবিৰৰ নহয়; বৰঞ্চ স্বয়ং ভাৰতীয় ৰিজার্ভ বেংকৰ।
তথ্য জনাৰ অধিকাৰ (আটিআই) আইনৰ অধীনত কৰা আবেদনৰ ভিত্তিত ৰিজার্ভ বেংকে প্রকাশ কৰিছে ২০১৪ব পৰা ২০২৪ সময়ছোৱাত বিভিন্ন বেংকে ‘ৰাইট অফ’ কৰা ধনৰ পৰিমাণ। বেংকে ঋণ ‘ৰাইট অফ’ কৰাৰ অৰ্থ হ’ল ওভতাই লাভ নকৰা কোনো ঋণৰ ধনৰ হিচাপ বেংকৰ খাতা-বহীৰ পৰা আঁতৰাই এই ধন উদ্ধাৰৰ ব্যৱস্থা কৰে সংশ্লিষ্ট বেংকে।
অৱশ্যে এই প্রক্রিয়াৰে বিগত সময়ত বিভিন্ন বেংকে কিমান ধন উদ্ধাৰ কৰিলে সেয়া স্পষ্ট নহয়। দৰাচলতে ‘ৰাইট অফ’ হ’ল ঋণ ৰেহাইৰ প্ৰথমটো ঢাপ। উক্ত আৰটিআই আবেদনৰ অধীনত পোৱা তথ্য অনুসৰি ২০১৪ৰ এপ্ৰিলৰ পৰা ২০২৪ৰ ৩০ ছেপ্টেম্বৰলৈ দেশৰ বিভিন্ন বেংকে ১৬ লাখ ৬১ হেজাৰ ৩১০ কোটি টকাৰ ঋণ ‘ৰাইট অফ’ কৰে।
বিগত সময়ত ইয়াৰে মাথোঁ দুই লাখ ৬৯ হেজাৰ ৭৯৫ কোটি টকাহে বেংকসমূহে উদ্ধাৰ কৰিবলৈ সক্ষম হয়। অর্থাৎ ‘ৰাইট অফ‘ কৰা মুঠ ধনৰ মাথোঁ ১৬ শতাংশহে উদ্ধাৰ কৰিছে বেংকসমূহে। বাকী ১৩ লাখ ৯১ হেজাৰ ৫১২ কোটি টকা ডুব গৈছে।
নাগৰিক অধিকাৰ আন্দোলনৰ কৰ্মী প্রফুল্ল পি সাৰদাই উক্ত আৰটিআই আবেদন কৰে। আবেদনৰ ভিত্তিত তেওঁক ভাৰতীয় ৰিজাৰ্ভ বেংকে জনোৱা অনুসৰি বিগত ১০ বছৰত অৰ্থাৎ ২০১৪ৰ পৰা ২০২৪ৰ সময়ছোৱাত সর্বাধিক ঋণ ‘ৰাইট অফ’ কৰে দেশৰ ৰাষ্ট্ৰীয়কৃত বেংকসমূহে। উক্ত ১০ বছৰত ৰাষ্ট্ৰীয়কৃত বেংকসমূহে ‘ৰাইট অফ’ কৰা মুঠ ধনৰ পৰিমাণ হ’ল ১২ লাখ আঠ হেজাৰ ৬২১ কোটি টকা।
ইয়াৰ বিপৰীতে উক্ত ১০টা বছৰত ব্যক্তিগত খণ্ডৰ বেংকসমূহে চাৰি লাখ ৪৬ হেজাৰ ৬৬৯ কোটি টকা আৰু নগৰ সমবায় বেংকসমূহে ছহেজাৰ ২০ কোটি টকাৰ ‘ৰাইট অফ’ কৰে। অভিযোগ অনুসৰি বেংকসমূহে কৰা এই ‘ৰাইট অফ’ৰ ধনৰ সিংহভাগেই হৈছে কৰ্প’ৰেট গোষ্ঠীয়ে লোৱা ঋণৰ ধন।
ইপিনে, অভিযোগ উত্থাপিত হৈছে যে চৰকাৰে দৰিদ্ৰ জনতাৰ পৰা বিভিন্ন কৰৰ জৰিয়তে ধন সংগ্ৰহ কৰি কৰ্প’ৰেটক ঋণৰ মাধ্যমেৰে যোগান ধৰিছে। লক্ষ্যণীয়ভাৱে চলিত বিত্তীয় বৰ্ষৰ এই পৰ্যন্ত কেন্দ্ৰীয় চৰকাৰে প্ৰত্যক্ষ কৰৰ বাবদ ১৬ লক্ষ কোটি টকা সংগ্ৰহ কৰিছে। বিগত ১০টা বছৰত ইয়াৰ প্ৰায় সমান অংকৰ ধন বেংকসমূহে হেৰুৱায়। এনে অৱস্থাতো প্রধানমন্ত্রী মোদীয়ে বিৰোধীকহে দুর্নীতিগ্রস্ত আখ্যা দি তুলাধুনা দি আছে। লক্ষ্যণীয়ভাৱে বিগত ১০টা বছৰত স্বাস্থ্যৰ লেখীয়া গুৰুত্বপূৰ্ণ শিতানতো চৰকাৰে বাজেটত পুঁজি হ্রাস কৰে।