Ambubachi Mela in Kamakhya Temple:
সাধু-সন্ন্যাসী, ভক্তই সৃষ্টি কৰা মাংগলিক আৰু আধ্যাত্মিক পৰিৱেশৰ মাজেৰে দেওবাৰে বিয়লিৰ পৰা আৰম্ভ হয় শক্তিপীঠ কামাখ্যাৰ মহাঅম্বুবাচী মেলা। বিশ্বাস অনুসৰি, ধৰিত্ৰী ৰজঃস্বলা হোৱাৰ লগে লগে বিয়লি ২.৫৬ বজাত কামাখ্যা মন্দিৰৰ দুৱাৰ আগন্তুক চাৰি দিনলৈ বন্ধ কৰি দিয়া হয়। পুনৰ ২৬ জুনৰ পুৱা দেৱীক স্নান কৰাই আৰু নিত্য পূজা সমাপন কৰিহে ভক্তৰ বাবে দুৱাৰ খুলি দিয়া হ’ব। দুৱাৰ বন্ধ হোৱাৰ লগে লগে আৰম্ভ হয় শক্তিপীঠত যুগ যুগান্তৰ ধৰি চলি অহা মেলাৰ।
মন্দিৰৰ দুৱাৰ বন্ধ হোৱাৰ পূর্বে দেৱীক দৰ্শনৰ বাবে কামাখ্যা ধামত হেজাৰ হেজাৰ লোকৰ সমাগম হয়। ।। তেওঁলোকৰ উকলি, শংখধ্বনি, মংগলধ্বনিৰ মাজেৰে মন্দিৰৰ দুৱাৰ নিৰ্দিষ্ট সময়ত আজি বন্ধ হৈ পৰে। দুৱাৰ বন্ধ হোৱাৰ পাছতে দূৰ-দূৰণিৰ পৰা আহি সমৱেত হোৱা সাধু-সন্ন্যাসী, ভক্তসকলে মা কামাখ্যাৰ সাধনাত মগ্ন হয়।
এইবাৰো অম্বুবাচী মেলাৰ বহু পূৰ্বৰে পৰা দেশৰ বিভিন্ন স্থানৰ সাধু-সন্ন্যাসীয়ে কামাখ্যা ধাম চৌহদত থিতাপি গ্রহণ কৰে। মন্দিৰ পৰিচালনা সমিতিৰ তথ্য মতে, শনিবাৰৰ পৰা অধিক সংখ্যক লোকৰ আগমন হ’বলৈ ধৰে। সেইবাবে মেলাক লৈ হাতত লোৱা ব্যৱস্থাবোৰ আগ ধৰি ৰূপায়ণ কৰা হয়। আইন-শৃংখলা পৰিস্থিতি নিয়ন্ত্রণ, ভক্তৰ ভিৰ নিয়ন্ত্রণ, চাফ-চিকুণতা বাহাল ৰখা, অনাময় ব্যৱস্থা গঢ়ি তোলা আদি দুই-তিনি দিন আগৰ পৰাই আৰম্ভ কৰা হয়। সমান্তৰালভাৱে নীলাচল পাহাৰৰ তলত বিভিন্ন সংস্থা আৰু ন্যাসেও দুদিন আগৰ পৰাই ভক্তক বিনামূলীয়াকৈ খাদ্য যোগান আৰম্ভ কৰে। আজি মন্দিৰৰ দুৱাৰ বন্ধ হোৱা হেতুকে পুৱাৰে পৰা মানুহৰ সোঁত ব’বলৈ ধৰে। অৱশ্যে এই সকলোৱেই বিভিন্ন ৰাজ্যৰ পৰা অহা লোক।
এইবাৰ ছেণ্ডেল-জোতা পিন্ধি মন্দিৰ অভিমুখে যোৱাটো নিষেধ কৰা হৈছে। সেইবাবে পাহাৰৰ নামনিত ছেণ্ডেল-জোতা আদি ৰখাৰ ব্যৱস্থা কৰা হৈছে। তাতেই বহু লোকে ছেণ্ডেল-জোতা থৈ উদং ভৰিৰে মন্দিৰ অভিমুখে যাত্ৰা আৰম্ভ কৰে। যিহেতু খোজকাঢ়ি যোৱাটো বাধ্যতামূলক, সেয়েহে পথৰ ঠায়ে ঠায়ে খোৱাপানীৰ যোগান, স্বাস্থ্য সেৱাৰ ব্যৱস্থা কৰা হৈছে।
এইবাৰ সন্ধিয়া ছয় বজাৰ পৰা মন্দিৰলৈ যোৱা পথটোবে যাতায়াত নিষেদ্ধ কৰা হৈছে। এই সন্দৰ্ভত মুখ্যমন্ত্রী ড: হিমন্ত বিশ্ব শর্মাই দেওবাৰে দিছপুৰত আয়োজিত এক সংবাদমেলত কয় যে ভক্তৰ সুৰক্ষাৰ বাবেই এনে সিদ্ধান্ত লোৱা হৈছে। মুখ্যমন্ত্রীয়ে কয়, ‘কামাখ্যা মন্দিৰলৈ যোৱা পথটোৰ বিভিন্ন স্থানত বেয়াকৈ ভূমিস্থলন হৈ আছে। তাব প্রতি লক্ষ্য ৰাখি এই সতর্কতামূলক ব্যৱস্থা লোৱা হৈছে। নিশা চাবলৈ বিশেষ নাথাকেও। গতিকে মন্দিৰৰ দুৱাৰ খোলাৰ পাছত সকলোৱে যাব পাৰিব। এইবাৰ ভিআইপি, ভিভিআইপি ব্যৱস্থাও নাই। মন্দিৰ খোলাৰ দুদিনলৈ ময়ো নাযাওঁ। ২৭ জুনৰ পাছতহে যাম।’
স্বাভাৱিক ধৰণে এইবাৰো মন্দিৰ চৌহদৰ লগতে বাহিৰতো বিচিত্র বেশ-ভূষাৰ পুৰুষ-মহিলা সাধু-সন্ন্যাসী ভৰি পৰিছে। তাৰে বহুতেই বিচিত্ৰ কাৰুকাৰ্যৰে ভক্তৰ দৃষ্টি আকৰ্ষণ কৰিছে। অম্বুবাচী মেলাৰ অন্যতম আকর্ষণ হৈ আহিছে নগা সন্ন্যাসীসকল। এইবাৰো তেওঁলোকে দূৰ-দূৰণিৰ পৰা বাটকুৰি বাই আহি নিজৰ বাবে সংৰক্ষিত স্থানত আশ্রয় লৈছে। সমগ্র শৰীৰত ভস্ম সানি শুধ বগা হৈ থকা এইসকল সন্ন্যাসীৰ পৰা সেৱা ল’বলৈ আজিও বহু লোকে ভিৰ কৰে।
ইয়াৰ মাজতে এইবাৰ বহুতে সোঁৱৰণ কৰে অলপতে ইহলীলা সম্বৰণ কৰা পদ্মশ্রী স্বামী শিৱানন্দক। যোগৰ জৰিয়তে সুদীর্ঘ জীৱন নিৰোগী হৈ থাকি নিদর্শন দাঙি ধৰা স্বামী শিৱানন্দ প্ৰায় প্ৰতি বছৰে কামাখ্যা ধামৰ অম্বুবাচী মেলালৈ আহিছিল। যোগৰ প্ৰসাৰ আৰু প্ৰচাৰত নিমগ্ন গৈ থকা স্বামী শিৱানন্দই সমাজৰ বাবে তেওঁৰ জীৱন উৎসৰ্গা কৰিছিল। মৃত্যুৰ সময়ত তেওঁৰ বয়স হৈছিল ১২৫ বছৰ। কামাখ্যাৰ অম্বুবাচী মেলাত তেওঁৰ বাবে সদায় নির্ধাৰিত আশ্রয়স্থলৰ ব্যৱস্থা আছিল।
