ONGC:
তেল আৰু প্রাকৃতিক গেছ নিগম (অ’এনজিচি) ৰ অকর্মণ্যতা আৰু চূড়ান্ত গাফিলতিৰ বাবেই শিৱসাগৰ জিলাৰ ভটীয়াপাৰ বাৰীচুকৰ তৈলখাদত গেছ নির্গমন আজিও প্রশমন হোৱা নাই। দেশৰ অন্যতম লাভজনক ৰাজহুৱা প্রতিষ্ঠানটোৰ গুৰুত্বহীনতাৰ বাবেই যোৱা ১২ জুনত ৰুদ্রসাগৰ তৈলখাদৰ অধীনৰ আৰডিএছ ১৪৭ (এ) নম্বৰ তেলখাদত সংঘটিত হোৱা বিস্ফোৰণৰ পাছৰ পৰিস্থিতি নিয়ন্ত্ৰণলৈ অহা নাই বুলি তীব্র ক্ষোভ প্রকাশিত হৈছে।
আজি ১৩দিন অতিবাহিত হোৱাৰ পাছতো ভয়াৱহ গতিত নির্গত হোৱা গেছৰ চাপ হ্রাস পোৱা নাই। এটাৰ পাছত আনটো বিশেষজ্ঞ দল অহাৰ কথা সদৰী কৰিয়ে দায়িত্ব সামৰিছে অ’এনজিচিয়ে। পৰহি গেছ নির্গমন ৰোধৰ বাবে এটা তিনিজনীয়া মার্কিন বিশেষজ্ঞ দলে পৰিস্থিতি নিয়ন্ত্রণ কৰিবলৈ চেষ্ট অব্যাহত ৰখা বুলি ক’লেও এই পর্যন্ত কোনো ফলাফল প্রত্যক্ষ কৰা নাই স্থানীয় ৰাইজে। ভটীয়াপাৰবাসীৰ জীৱন আৰু সম্পত্তিৰ প্ৰতি চৰম অনিশ্চয়তা কঢ়িয়াই অনা এই বিস্ফোৰণ কাণ্ডৰ ভুক্তভোগীসকলে কেতিয়া আপোন ঘৰলৈ উভতিব তাৰ কোনো নিশ্চয়তা নাই।
পৰিস্থিতি নিয়ন্ত্ৰণত গভীৰ অনিশ্চয়তা প্রকাশিত হোৱাৰ সমান্তৰালভাবে সূত্ৰত প্রকাশ যে বিস্ফোৰণৰ ফলত সৃষ্টি হোৱা গেছ নিৰ্গমনৰ ক্ষেত্ৰত এই পর্যন্ত পৰিস্থিতি উন্নত হোৱাৰ কোনো ইংগিত প্রকাশিত হোৱা নাই। ফলত ৰাইজৰ মাজত বিভিন্ন প্ৰশ্নৰ উদ্রেক ঘটিছে। বিস্ফোৰণৰ ফলত হোৱা গেছ নিৰ্গমনৰ ভয়াৱহ পৰিস্থিতি ৰোধৰ ক্ষেত্রত বিশেষজ্ঞ দল কিমান সফল হয় তাকে লৈ ৰাইজ সন্দিহান হৈছে।
নাম প্রকাশত অনিচ্ছুক অ’এনজিচিৰ একাধিক বিষয়াই কয় যে এই মুহূর্তত রেল কেপিং অর্থাৎ খাদটোৰ মুখ সম্পূর্ণ বন্ধ কৰি দিয়াৰ বাহিৰে আন কোনো বিকল্প নাই। বেল কেপিং পদ্ধতি প্রয়োগ কৰিলে চিৰদিনৰ বাবে বন্ধ হ’ব তৈলখাদটো। অলপতে অ’এনজিচিৰ একাংশ বিষয়াই সংবাদ মাধ্যমক কৈছিল যে প্ৰচুৰ পৰিমাণৰ খাৰুৱা তেল আৰু গেছ থকা বাবে এই দুর্ঘটনা হৈছে।
তেনে পৰিস্থিতিত বেল কেপিং কৰিলে তৈলখাদৰ গেছ নির্গমন নিয়ন্ত্রণ হ’লেও উৎপাদনৰ ক্ষেত্ৰত প্রতিষ্ঠানটো লোকচানৰ সন্মুখীন হ’ব যাৰ বাবেই বিগত দিনকেইটাত অ’এনজিচিয়ে স্থানীয়ভাবে দক্ষ লোক থকা সত্ত্বেও বিভিন্ন বিশেষজ্ঞ দল আনি পৰীক্ষা-নিৰীক্ষা কৰি আছিল বুলিও সূত্ৰত প্রকাশ। সম্প্রতি মার্কিন বিশেষজ্ঞ দলৰ আগমনৰ পাছত বিস্ফোৰণস্থলীলৈ যথেষ্টসংখ্যক উন্নত প্রযুক্তিৰ যন্ত্রপাতি মজুত কৰা হৈছে। বিশেষজ্ঞ দলৰ লগতে অ’এনজিচিৰ বিগত তিনি দিনত প্রয়োগ কৰা কাৰিকৰী কৌশলৰ দ্বাৰা গেছ নির্গমন বন্ধ কৰাত ব্যৰ্থতাৰ সন্মুখীন হ’বলগীয়া হৈছে বুলিও চর্চা হৈছে। যিকোনো প্ৰকাৰে পৰিস্থিতি নিয়ন্ত্ৰণ কৰিবলৈ ৰাইজে দাবী জনাইছে।
# অ’এনজিচিৰ আশ্বাসত পতিয়ন যোৱা নাই ক্ষতিগ্রস্ত লোক: তীব্র ক্ষোভ প্রকাশ
বহু বিতর্কিত ঠিকাদাৰী প্ৰতিষ্ঠান এছকে পেট্র’ই নিয়োগ কৰা বিষয়া-কৰ্মচাৰীৰ কাৰিকৰী অধ্যক্ষতাৰ বাবে এই দুর্ঘটনা সংঘটিত হোৱা বুলি স্থানীয় ৰাইজে ক্ষোভ প্রকাশ কৰিছে। প্ৰকৃতাৰ্থত ই এছকে পেট্ৰ’ৰ অসাৱধানতা, অদক্ষতা নে আকস্মিক দুর্ঘটনা তাৰ উচিত তদন্তৰ দাবীত অটল হৈ আছে ভটীয়াপাৰবাসীৰ লগতে বিভিন্ন দল-সংগঠন। চুতীয়া যুৱ সম্মিলনৰ শিৱসাগৰ জিলা সমিতিৰ লগতে আন দল-সংগঠন তথা ভটীয়াপাৰবাসীয়ে প্ৰতিষ্ঠানৰ স্বত্বাধিকাৰী কৃষ্ণ আগৰৱালাৰ বিৰুদ্ধে তীব্র ক্ষোভ প্রকাশ কৰাৰ লগতে অনতিপলমে গ্ৰেপ্তাৰৰ দাবী অব্যাহত ৰাখে। ৰাইজক দুৰ্যোগৰ মাজলৈ ঠেলি দি আত্মগোপন কৰি থকা আগৰৱালাক আজিও প্রশাসনে গ্ৰেপ্তাৰ নকৰাত গভীৰ ৰহস্যৰ সৃষ্টি হৈছে।
ইপিনে, অ’এনজিচিয়ে ৰীগৰ পৰা নিৰ্গমিত গেছৰ চাপ কিছু হ্রাস কৰিবলৈ সক্ষম হোৱাৰ লগতে ঘটনাস্থলীৰ পৰ পাঁচ কিলোমিটাৰ নিলগৰ লোকসকলক ঘৰলৈ ঘূৰি আহিবলৈ আহ্বান জনাইছে যদিও ৰাইজ আশ্বস্ত হোৱা নাই। কিয়নো উচ্চ প্রাবল্যৰ শব্দৰ লগতে তীব্র গতিত আজিও গেছ নিৰ্গত হৈ থকাৰ বাবে অ’এনজিচিৰ ভাষ্যক ৰাইজে বিশ্বাসত ল’ব পৰা নাই। ইয়াৰ পৰিৱৰ্তে আতংকিত ৰাইজে ক্ষোভ প্রকাশ কৰে।
# প্ৰতিবাদৰ সামৰণি পেলালে বীৰ লাচিত সেনাই
তৈলখাদত ক্ষতিগ্রস্ত পৰিয়ালক উপযুক্ত ক্ষতিপূৰণ আদায়, এছকে পেট্ৰ’ৰ লীজ বাতিলৰ লগতে আগৰৱালাক গ্ৰেপ্তাৰৰ দাবীত প্রতিবাদ অব্যাহত থকাৰ সময়তে সোমবাৰে বীৰ লাচিত সেনাই প্ৰতিবাদৰ সামৰণি পেলায়। তৈলখাদৰ প্ৰৱেশপথ স্থানীয় ৰাধিকা নগৰ, বলিয়াঘাট, পথলিয়াল, ৰূপহীমুখ, ৰূপহী কিনাৰ আদি অঞ্চলৰ ৰাইজে প্রতিবাদ সাব্যস্ত কৰে। পুঁজিপতি ঠিকাদাৰ প্ৰতিষ্ঠান এছকে পেট্ৰ’ৰ কাৰ্যালয়ৰ সমীপত লাচিত সেনাই আঠ দিন প্রতিবাদ কৰাৰ পাছত প্ৰতিষ্ঠানৰ প্ৰতিনিধিৰ স’তে আলোচনাত মিলিত হৈছিল।
আলোচনাৰ অন্তত সংগঠনটোৰ শিৱসাগৰ জিলা সমিতিয়ে এশ শতাংশ যুৱক-যুৱতীক নিযুক্তি, ক্ষতিগ্রস্তৰ ক্ষতিপূৰণ আৰু সংস্থাপনকে ধৰি উত্থাপন কৰা দাবীসমূহ এক স্মাৰকপত্ৰযোগে সঞ্চালক আগৰৱালালৈ প্ৰেৰণ কৰিছিল। সম্প্রতি পলাতক হৈ থকা আগৰৱালাই বীৰ লাচিত সেনাৰ দাবীসমূহ মানি লোৱাৰ লিখিত প্রতিশ্রুতি প্ৰদানৰ পাছত সোমবাৰে সন্ধিয়া অনির্দিষ্টকালীন প্রতিবাদী কাৰ্যসূচীৰ সামৰণি পেলোৱা বুলি সদৰী কৰে।
