Deportation of declared foreigners:
কেন্দ্রীয় চৰকাৰৰ নির্দেশমর্মে অসমত থকা অবৈধ বাংলাদেশী নাগৰিকক স্বদেশলৈ উভতাই পঠিওৱাৰ তৎপৰতা অব্যাহত ৰাখিছে ৰাজ্য চৰকাৰে। ইয়াকে লৈ মিশ্রিত প্রতিক্রিয়াৰ সৃষ্টি হৈছে। একাংশ দল-সংগঠনে অভিযোগ কৰিছে যে চৰকাৰে কোনো বাছ-বিচাৰ নকৰাকৈ বাংলাদেশ বুলি বহু লোকক বিতাড়ন কার্য অব্যাহত ৰাখিছে । ইয়াৰ পৰিণতিত বিতাড়িত তেনে বহু লোকক পুনৰ ভাৰতে ওভতাই নিবলৈয়ো বাধ্য হৈছে।
এই ধৰণৰ প্রতিক্ৰিয়াবোৰক একাষৰীয়া কৰি থৈ চৰকাৰে আইনৰ দ্বাৰা ঘোষিত বাংলাদেশীক বিতাড়নৰ বাবে তৎপৰতা বৃদ্ধি কৰিছে। তাৰ বাবে ৰাজ্যৰ গৃহ বিভাগে সকলো জিলাৰ আৰক্ষী অধীক্ষকক জিলাবোৰত থকা বাংলাদেশীৰ তালিকা প্ৰস্তুত কৰি মানুহবোৰক নজৰবন্দী কৰি ৰখাৰ নিৰ্দেশ দিছে। এই নির্দেশ কাৰ্যকৰী কৰিবলৈ গৈ প্রত্যাহ্বানৰ সন্মুখীন হৈছে জিলা আৰক্ষী।
কিয়নো আইনৰ দ্বাৰা ঘোষিত বহু বাংলাদেশী লোকক আৰক্ষীয়ে বিচাৰি পোৱা নাই। এই সংখ্যা হ’ল কমেও ৩০ হেজাৰ। এই বৃহৎ সংখ্যক লোক সম্প্রতি ক’ত আছে, তাৰ কোনো তথ্য আৰক্ষীৰ হাতত নাই। ইয়াৰ পৰিপ্ৰেক্ষিতত গৃহ বিভাগে জিলা আৰক্ষীক তেনে লোকৰ সন্ধান উলিয়াবলৈ চোৰাংচোৱা ব্যৱস্থাটোক ত্বৰান্বিত কৰিবলৈ পৰামৰ্শ দিছে।
মুখ্যমন্ত্রী ড: হিমন্ত বিশ্ব শৰ্মাই অলপতে সদৰী কৰে যে অসমে আইনৰ দ্বাৰা ঘোষিত সকলো বাংলাদেশীক ভাৰতৰ পৰা বিতাড়ন কৰিব। মুখ্যমন্ত্ৰীৰ এনে ঘোষণা কার্যকৰী হোৱাটোহে প্রত্যাহ্বানমূলক হৈছে। সন্ধানহীন লোকসকল ক’ত মিলি গৈছে, তাৰ তথ্য কাৰো হাতত নাই। উল্লেখ্য যে সীমান্ত আৰক্ষীয়ে বাংলাদেশীৰ সন্দেহত বিদেশী ন্যায়াধিকৰণলৈ ধাৰাবাহিকভাৱে গোচৰ প্ৰেৰণ অব্যাহত ৰাখিছে। যোৱা মাৰ্চলৈ প্ৰেৰণ কৰা এনে গোচৰৰ সংখ্যা হ’ল ৪,৩৬,০৪৬টা। তাৰে ৩,৮৪,০১৪টা গোচৰ নিষ্পত্তি কৰা হৈছে।
এই গোচৰবোৰৰ জৰিয়তে ১,৬৫,৯৯২ জন লোকক অনুপ্রৱেশকাৰী বুলি ন্যায়াধিকৰণে চিনাক্ত কৰিছে। ইয়াৰে একাংশ লোকে ন্যায়াধিকৰণৰ ৰায়ক প্রত্যাহ্বান জনাই উচ্চ ন্যায়ালয়ৰ দ্বাৰস্থ হৈছে। ইয়াৰে বৃহৎ সংখ্যক লোকে আত্মগোপন কৰিছে। বন্দী শিবিৰত নথকা ঘোষিত বাংলাদেশীসকলে স্থানীয় আৰক্ষী থানাত নিয়মীয়াকৈ নিজৰ উপস্থিতিৰ তথ্য দাখিল কৰিব লাগে। আৰক্ষীৰ তথ্য অনুসৰি, প্ৰথমতে নিয়মীয়াকৈ উপস্থিতিৰ তথ্য হিচাপে নথিত স্বাক্ষৰ কৰাৰ পাছত বিভিন্ন অজুহাতৰে একাংশ লোকে এই নির্দেশনা নিয়মীয়াকৈ পালনত উপেক্ষা কৰিবলৈ ধৰে আৰু পাছলৈ সেইসকলে গোটেই প্রক্রিয়াটোকে নস্যাৎ কৰি আত্মগোপন কৰে। এনেদৰেই এটা সময়ত মানুহবোৰ ক’ৰবাত হেৰাই যায়।
গৃহ বিভাগৰ নিৰ্দেশনা মতে, তেনে লোকসকলৰ ঠিকনালৈ মানুহ পঠিয়ায়ো অদ্যাপি শুংসূত্র উলিয়াব পৰা নাই। এই প্ৰসংগত অসম আৰক্ষীৰ শীৰ্ষ সূত্ৰই আশংকা ব্যক্ত কৰি কয় যে বিতাড়ন প্ৰক্ৰিয়াৰ নীতি চৰকাৰে সলনি কৰাৰ ফলত আত্মগোপনৰ মাত্রাও বৃদ্ধি হৈছে। আইনী প্ৰক্ৰিয়াৰ মাজেৰেহে এজন লোকক অনুপ্ৰৱেশকাৰী বুলি চিনাক্ত কৰি নিয়ম অনুসৰি বিতাড়নৰ পৰ্যায় আৰম্ভ কৰা হয়। এয়া এক দীঘলীয়া প্রক্রিয়া। গতিকে বৰ্তমানৰ চৰকাৰে সেই প্রক্রিয়াক একাষৰীয়া কৰি থৈ মানুহবোৰক সীমান্তলৈ নি ভাৰতৰ সীমাৰ বাহিৰ উলিয়াই দিয়া নীতি গ্রহণ কৰিছে।
এই নীতিৰে প্ৰায় নিয়মীয়াকৈ অসমত বিতাড়ন প্রক্রিয়া অব্যাহত ৰখা হৈছে। বিশেষকৈ সীমান্ত অঞ্চলত অনুপ্ৰৱেশকাৰী ধৰা পৰিলেই লগে লগে এই নীতিৰে মানুহবোৰক পুনৰ নিজৰ দেশলৈ ঘূৰাই পঠিওৱা হয়। ইয়াৰ লগতে বিদেশী ন্যায়াধিকৰণ আৰু ন্যায়ালয়ৰ দ্বাৰা ঘোষিত অনুপ্ৰৱেশকাৰীৰ ক্ষেত্রতো একে নীতি গ্রহণ কৰা হৈছে। ইয়াৰ ফলত আত্মগোপনৰ মাত্রাও বৃদ্ধি হৈছে।
আনকি শেহতীয়াকৈ সকলো ঘোষিত বাংলাদেশীক আৰক্ষী অধীক্ষকৰ কাৰ্যালয়ত উপস্থিত হ’বলৈ নিৰ্দেশ দিয়াৰ পাছতো বহুতে সেই নির্দেশনা উলংঘা কৰে। প্ৰসংগক্রমে মুখ্যমন্ত্ৰীয়ে এই বুলিও স্পষ্ট কৰি দিছে যে সন্ধানহীন হৈ থকা মানুহবোৰকো যেতিয়াই বিচাৰি পোৱা যায়, তেতিয়াই এই নীতিৰে বিতাড়ন কৰা হ’ব।
