Dr. Hiren Gohain:
বিজেপি চৰকাৰক আগন্তুক ২০২৬ৰ বিধানসভা নির্বাচনত গাদীচ্যুত কৰাৰ লক্ষ্যৰে ৰণকৌশল প্রস্তুত তথা সকলোকে একগোট কৰাৰ উদ্দেশ্য আগত ৰাখি অহা পাঁচ আৰু ছয় জুলাইত গুৱাহাটীত এখন ‘অসম সম্মিলিত নাগৰিক অভিৱৰ্তন‘ আহ্বান কৰা হৈছে। অসম সম্মিলিত নাগৰিক অভিবৰ্তনৰ হৈ বৃহস্পতিবাৰে গুৱাহাটী প্ৰেছ ক্লাবত বিশিষ্ট বুদ্ধিজীবী ড: হীৰেন গোহাঁয়ে এক সংবাদমেল সম্বোধন কৰি এই কথা সদৰী কৰে। সাংসদ অজিত কুমাৰ ভূঞা, হৰেকৃষ্ণ ডেকা, শান্তনু বৰঠাকুৰ আদিৰ উপস্থিতিত ড: গোহাঁয়ে সংবাদমেলত কয় যে এইখন চৰকাৰে অসমক কোন দিশে লৈ গৈছে সকলোৱে প্ৰত্যক্ষ কৰিছে। অনিয়ম, স্বজন-তোষণ আৰু দুর্নীতিয়ে চৰকাৰখন কেনেকৈ প্ৰাস কৰিছে গৰুখুঁটি কাণ্ডই সেয়া স্পষ্টকৈ উদঙাই দিছে।
এই সন্দৰ্ভত মুখ্যমন্ত্রী ড: হিমন্ত বিশ্ব শর্মাই কিদৰে প্রতিক্রিয়া প্রকাশ কৰিছে আৰু তেওঁ কি কৈ আছে সকলোৱে দেখিছে বুলি ড: গোহাঁয়ে মন্তব্য কৰি কয়, ‘গৰুখুঁটি ঘটনা কোনো এটা বিক্ষিপ্ত ঘটনা নহয়। গৰুখুঁটি হৈছে মুখ্যমন্ত্রী ড: শর্মা চৰকাৰৰ প্ৰকৃত ছবি। আচলতে আজিৰ দিনত চৌদিশে গৰুখুঁটিৰ দৰে ঘটনাই ঘটি আছে। প্রশ্ন হ’ল যে এই ঘটনাবোৰ আমি কেনেদৰে ল’ম? প্রথম আৰু প্ৰধান কথাটো হ’ল আমি নাগৰিকৰূপে নে ৰাজ অনুগ্রহপ্রার্থী প্ৰজাৰূপে জীয়াই থাকিম?
আজিৰ দিনত কোনো আত্মসন্মান থকা মানুহে চৰকাৰৰ প্ৰজা হ’ব নিবিচাৰে। প্রত্যেকে এজন স্বাধীনচিতীয়া নাগৰিকৰূপেহে জীয়াই থাকিব বিচাৰে। প্ৰকৃতাৰ্থত আমাৰ চৌপাশে চলি থকা অন্যায়-অনিয়মবোৰ দেখিও আমি কেনেকৈ নেদেখাৰ ভাও ধৰো, কেনেকৈ নির্বিকাৰ-নির্লিপ্ত হৈ থাকো। আমি ভাবো যে চাৰিওফালৰ অনিয়ম, অৰাজকতা দেখি এতিয়া কোনো সুস্থিৰ চিন্তাৰ লোক নীৰৱে থাকিব নোৱাৰে।’ লগতে ড: গোহাঁয়ে কয় যে এনে পৰিস্থিতিত অসমৰ বিভিন্ন নাগৰিক সমাজ আৰু গণতান্ত্রিক ব্যক্তিসকলক একেখন মঞ্চত ঐক্যবদ্ধ কৰাৰ উদ্দেশ্যে উল্লিখিত দিনত মাছখোৱা প্রাগজ্যোতি সাংস্কৃতিক প্রকল্পত দুদিনীয়াকৈ এই অভিবর্তন আয়োজন কৰা হৈছে।
অভিৱৰ্তনৰ প্ৰথম দিনা তথা পাঁচ জুলাইত ৰাজ্যৰ বিভিন্ন স্থানৰ পৰা নাগৰিক সমাজক প্রতিনিধিত্ব কৰা কে’বা শতাধিক প্রতিনিধিয়ে কৰ্মনিৰ্ধাৰণ অধিবেশনত অংশগ্ৰহণ কৰিব। উক্ত দিনা ৰাজ্যৰ বৰ্তমানৰ ৰাজনৈতিক পৰিস্থিতিৰ বিষয়ে বিতংভাৱে আলোচনা কৰা হ’ব আৰু বিজেপিৰ কুশাসন-ব্যর্থতাসমূহক লৈ এখন ‘শ্বেতপত্র’ আৰু জনকল্যাণ-সুশাসনৰ বাবে প্রয়োজনীয় বিভিন্ন বিষয় সন্নিবিষ্ট কৰি এখন দাবী চনদৰো চূড়ান্ত ৰূপ দিয়া হ’ব বুলি ড: গোহাঁয়ে মন্তব্য কৰে।
ইয়াৰ উপৰি এই অভিৱর্তনত বর্তমান পৰিস্থিতিত বিশেষকৈ আগন্তুক ২০২৬ৰ বিধানসভা নির্বাচনত বিভিন্ন নাগৰিক সমাজ আৰু গণতান্ত্রিক ব্যক্তিসকলৰ ভূমিকা কি হ’ব, সেই বিষয়েও খৰচি মাৰি আলোচনা কৰা হ’ব বুলি ড: গোহাঁয়ে মন্তব্য কৰি কয়, ‘অভিৱৰ্তনৰ দ্বিতীয় দিনা অর্থাৎ ছয় জুলাইত দিনৰ ১১ বজাৰ পৰা অনুষ্ঠিত হ’বলগীয়া মুকলি অধিবেশনত ৰাজ্যৰ বিভিন্ন প্ৰান্তৰ পৰা কে’বা শতাধিক লোকৰ লগতে বিশিষ্ট বুদ্ধিজীৱী, নাগৰিকে অংশ ল’ব। এই অভিৱৰ্তনত ৰাজনৈতিক বিশ্লেষক যোগেন্দ্ৰ যাদৱ আৰু সমাজকর্মী বিজয় মহাজনে অংশগ্ৰহণ কৰিব। লগতে মুকলি অধিবেশনত ৰাজ্যৰ বিৰোধী ৰাজনৈতিক দলৰ নেতৃত্বই অংশগ্ৰহণ কৰিব।’
