Shubhanshu Shukla:✒️পুত্ৰৰ অবিস্মৰণীয় সফলতাত দুচকুৰে অশ্রু নিগৰিল দুয়োৰে। দুয়ো হাঁহিও পেলালে। অজান জগত (আন্তর্জাতিক মহাকাশ কেন্দ্ৰ) ৰ পৰা ১৮ দিনৰ মূৰত পৃথিৱীত পুনৰ উপস্থিত হোৱা শুভাংশু শুক্লাৰ পিতৃ-মাতৃক মঙলবাৰে এনেদৰে দেখা গ’ল।
পিতৃ-মাতৃসহ শুক্লাৰ পৰিয়ালে চাৰিজনীয়া মহাকাশচাৰী দলটো পুনৰ পৃথিৱীত উপস্থিত হোৱাৰ সফলতাক কেক কাটিও উদ্যাপন কৰে। ভাৰতীয় সময়মতে মঙলবাৰে বিয়লি ৩-০১ বজাত কেলিফ’ৰ্ণিয়াৰ ছান ডিয়েগো উপকূলৰ প্ৰশান্ত মহাসাগৰৰ বক্ষত সফলতাৰে উপস্থিত হোৱাৰ বাতৰি বিয়পি পৰাৰ পাছতে শুক্লাৰ পিতৃ-মাতৃৰ দুচকুৰে আনন্দাশ্রু বৈ আহে।
সাংবাদিকৰ আগত পুত্ৰৰ এই সফলতাৰ অনুভৱ ব্যক্ত কৰি তেওঁৰ মাতৃ আশা শুক্লাই কয়, ‘পৃথিৱীত উপস্থিত হোৱাৰ পাছত তেওঁৰ – ফটো দেখি প্রথমে মোৰ দুচকুৰে লোতক বৈ আহে। মোৰ পুত্ৰ নিৰাপদে উভতি আহিল। ভগৱানক ধন্যবাদ জনাইছো। ইমান – দিনৰ মূৰত মোৰ পুত্ৰ ঘূৰি অহাৰ পাছত মই আবেগিক হৈছিলো।’
এই আনন্দ-উৎসাহৰ সীমা নাই বুলিও মহিলাগৰাকীয়ে কয়। পুত্রক লৈ অতি গর্বিত বুলি মন্তব্য কৰি তেওঁ লগতে কয়, ‘প্রথম অৱস্থাত মই ভয় খাইছিলো। নব প্রজন্মই তেওঁৰ (শুক্লাৰ) পৰা অনুপ্ৰেৰণা লৈ আগবাঢ়ি যাব লাগে।’
একেদৰে শুক্লাৰ পিতৃ শম্ভু দয়াল শুক্লাই কয়, ‘আমি অতি আনন্দ অনুভৱ কৰিছো যে শুভাংশুৰ অভিযান সফল হ’ল আৰু তেওঁ নিৰাপদে পৃথিবীত অৱতৰণ কৰিবলৈ সক্ষম হ’ল। আমি তেওঁক লৈ অতি গর্বিত। এই সকলো কথাৰ বাবে ভগৱানক ধন্যবাদ জনালো।’
শুক্লাৰ এই সফলতাক কেক কাটি উদ্যাপন কৰা বুলি পৰিয়ালে জনায়। উত্তৰ প্ৰদেশৰ লক্ষ্ণৌৰ মধ্যবিত্ত পৰিয়ালৰ সন্তান শুভাংশু শুক্লাৰ মহাকাশ অভিযানৰ স’তে প্রত্যক্ষ সম্পর্ক নাছিল। ২০০৬ত ভাৰতীয় বায়ুসেনাত বৈমানিকরূপে নিযুক্তি পোৱা শুক্লা ছুখই, মিগ-২৯, জাগুৱাৰ, দর্নিয়েৰ আদি যুদ্ধবিমান চালনৰ অভিজ্ঞতাপুষ্ট।
প্রধানমন্ত্রী মোদীৰ আদৰণি
কেলিফর্ণিয়াৰ ছান ডিয়েগোৰ মহাসমুদ্র বক্ষত শুভাংশু শুক্লাসহ চাৰি মহাকাশচাৰীয়ে নিৰাপদে আজি বিয়লি অৱতৰণ কৰাৰ লগে লগে উচ্ছ্বাস প্রদর্শন কৰে প্রধানমন্ত্রী মোদীয়েও। ভাৰতীয় মহাকাশচাৰীজনক আদৰণি জনাই প্রধানমন্ত্রী মোদীয়ে সামাজিক মাধ্যম ‘এক্স’ত কয়, ‘মহাকাশলৈ কৰা ঐতিহাসিক অভিযান সামৰণি পেলাই উভতি অহা গ্রুপ কেপ্টেইন শুভাংশু শুক্লাক দেশবাসীৰ লগতে ময়ো আদৰণি জনাইছো। আন্তর্জাতিক মহাকাশ কেন্দ্র ভ্রমণ কৰি প্ৰথমজন ভাৰতীয় মহাকাশচাৰীৰূপে তেওঁ উৎসর্গা, সাহস আৰু উদ্যমৰে শতকোটি সপোনক অনুপ্রাণিত কৰিছে। আমাৰ নিজা মানর মহাকাশ মিছন গগন যানৰ বাবেও ই এক সফলতাৰ কযটিশিল।’
উল্লেখ্য যে নাছা আৰু ইছৰোৰ সহযোগত মার্কিন ব্যক্তিগত সংস্থা এক্সিয়ম স্পেচে লোৱা এই মহাকাশ অভিযানত ভাৰতে ৭০ নিযুত ডলাৰ অৰ্থাৎ কমেও ছশ কোটি টকা ব্যয় কৰে। এই মহাকাশ অভিযানৰ সময়ত আন্তর্জাতিক মহাকাশ কেন্দ্ৰত শুক্লাসহ তেওঁৰ সতীর্থ তিনি মহাকাশচাৰীয়ে বিভিন্ন গৱেষণা-অধ্যয়ন সম্পন্ন কৰে।