Earth:✒️দিনক দিনে সৰু হৈ আহিছে দিনবোৰ। কোনো কাব্যিক কথা নহয়, এই কথা জনাইছে বিজ্ঞানীয়ে। পৃথিৱীয়ে নিজৰ মেৰুদণ্ডৰ ওপৰত এটা পাক ঘূৰিলে এটা দিন সম্পন্ন হয়। অৰ্থাৎ পৃথিৱীক ঘূৰিবলৈ সময় লাগে ২৪ ঘণ্টা।
অথচ সাম্প্রতিক এক তথ্যই জনাইছে যে পৃথিৱীয়ে এতিয়া নিজৰ স্বাভাৱিক গতিৰ তুলনাত সামান্য দ্রুতগতিৰে ঘূৰি আছে। ফলত একো একোটা দিন কে’বা মিলি ছেকেণ্ড (হেজাৰ ভাগৰ এক ছেকেণ্ড) কৈ সৰু হৈ গৈ আছে।
এই পৰিৱৰ্তন ইমানেই সূক্ষ্ম যে সাধাৰণ মানুহে ইয়াৰ উমান পোৱা নাই; কিন্তু বিজ্ঞানীসকলৰ চকুৰ পৰা সাৰি যোৱাটো কঠিন। এই বিষয়টো ধৰা পৰাল লগে লগে একাংশ বিজ্ঞানীৰ মাজত উদ্বেগ বিয়পি পৰিছে।
স্বাভাৱিক দৃষ্টিত সামান্য যেন ধাৰণা হ’লেও সময়ৰ এই সূক্ষ্ম তাৰতম্যই ভৱিষ্যতে প্ৰযুক্তিৰ জগতত বিৰাট জটিলতাৰ সৃষ্টি কৰিব পাৰে বুলি একাংশ বিজ্ঞানীয়ে আশংকা ব্যক্ত কৰিছে।
২০২০ত প্ৰথমবাৰলৈ এদল বিজ্ঞানীয়ে আৱিষ্কাৰ কৰে যে পৃথিৱীখনে আগৰ তুলনাত কিছু দ্রুতগতিৰে ঘূৰি আছে। ২০২০ৰ ২৯ জুলাই আছিল বিগত অর্ধশতিকাৰ ভিতৰত সবাতোকৈ সৰু দিন।
সেই দিনা পৃথিৱীয়ে ২৪ ঘণ্টাতকৈ ১.৪৬ মিলি ছেকেণ্ড কম সময়তে নিজৰ অক্ষত এপাক ঘুৰে। আনহাতে, ২০২২ৰ ২৯ জুলাইত আৰু এটা অভিলেখ সৃষ্টি হয়। সেইদিনা পৃথিৱীয়ে পুৰণি অভিলেখ ভাঙি ১.৫৯ মিলি ছেকেণ্ড কম সময়তে টো দিন সম্পন্ন কৰে। অৰ্থাৎ, পৃথিৱীৰ ঘূর্ণনৰ গতি ক্ৰমাৎ বাঢ়ি আছে।
এই তথ্য উঠি আহিছে ইণ্টাৰনেচনেল আর্থ ৰোটেচন এণ্ড ৰেফাৰেন্স ছিষ্টেমছ ছার্ভিচ বা ‘আইইআৰএছ’ৰ গৱেষণাত। তদুপৰি, ব্রিটেইনৰ ৰাষ্ট্ৰীয় সময় পৰিমাপক প্রতিষ্ঠান আৰু ফেচবুকৰ মূল কোম্পানী ‘মেটা’ৰ বিজ্ঞানীসকলেও বিষয়টোৰ পর্যবেক্ষণ কৰিছে।
এতিয়া প্রশ্ন উঠিছে যে কিয় এনেকুৱা হৈছে? বিজ্ঞানীসকলৰ মতে, ইয়াৰ অন্তৰালত একাধিক কাৰণ থাকিব পাৰে।
(এক) ভূপৃষ্ঠৰ গাঁথনিগত পৰিৱৰ্তন: ভূমিকম্প বা আগ্নেয়গিৰিৰ উদ্দ্গীৰণৰ ফলত পৃথিৱীৰ ভৰৰ ভাৰসাম্য সলনি হৈছে। সেই বাবেই এই দ্রুত ঘূর্ণন ঘটিব পাৰে।
(দুই) হিমবাহ গলন:গোলকীয় উষ্ণতাৰ ফলত ক্ৰমাৎ মেৰু অঞ্চলৰ বৰফ গলি সাগৰৰ পানীলৈ ৰূপান্তৰিত হৈছে। ফলত পৃথিৱী পৃষ্ঠৰ ওজনত পুনর্বণ্টন ঘটিছে।
(তিনি) বায়ুমণ্ডল আৰু সাগৰৰ সোঁতৰ পৰিৱৰ্তন:একেদৰে গোলকীয় উষ্ণতাৰ প্ৰভাৱত পৰিৱৰ্তন হৈছে এই বিষয়সমূহৰ। এই পৰিৱৰ্তনে পৃথিৱীৰ ঘূৰ্ণনক প্ৰভাৱিত কৰিব পাৰে।
কি প্ৰভাৱ পৰিব দৈনন্দিন জীৱনত?
এই সূক্ষ্ম পৰিৱৰ্তনে আমাৰ দৈনন্দিন জীৱনত বিশেষ কোনো সমস্যাৰ সৃষ্টি নকৰিলেও স্থান নির্ণয় ব্যৱস্থাপনা (জিপিএছ ষ্টিষ্টেম), উপগ্ৰহ নিৰ্ভৰ প্ৰযুক্তি, ইণ্টাৰনেট ছাৰ্ভাৰ তথা বেংকিং ছফ্টৱেৰৰ দৰে অত্যন্ত সূক্ষ্ম সময়নিৰ্ভৰ প্ৰযুক্তিৰ ক্ষেত্ৰত বিৰাট প্রভান পেলাব পাৰে।
এই পৰিস্থিতি যদি স্থায়ীভাবে অব্যাহত থাকে, তেন্তে বিজ্ঞানীসকলে ‘নিগেটিভ লিপ ছেকেণ্ড’ অর্থাৎ ২৪ ঘণ্টাৰ পৰা এক ছেকেণ্ড বাদ দিয়াৰ দৰে পদক্ষেপো ল’বলগীয়া হ’ব পাৰে। এই পর্যন্ত এনে কোনো ঘটনা ঘটা নাই। সেয়ে ২৪ ঘণ্টাৰ পৰা এক ছেকেণ্ড বাদ দিলে প্ৰযুক্তিৰ জগতত একেবাৰে নতুন আৰু জটিল পৰিস্থিতিৰ সৃষ্টি হ’ব পাৰে।
পৃথিৱীৰ ঘূৰ্ণনৰ এই সূক্ষ্ম পৰিৱৰ্তন সাধাৰণ দৃষ্টিত তেনে বিপজ্জনক নহ’লেও বিজ্ঞানীসকলে সকলোকে সতৰ্ক কৰিছে। কাৰণ এই প্ৰৱণতা যদি দীর্ঘস্থায়ী হয়, তেনেহ’লে সময়ৰ হিচাপ-নিকাচত বৃহৎ পৰিৱৰ্তন আহিব পাৰে।