Cattle Smuggling:
ৰাজ্যত গৰু সৰবৰাহৰ অবৈধ কাণ্ডৰ সমান্তৰালকৈ ছিণ্ডিকেটো প্রবল ৰূপত চলি আহিছে। এনে ছিণ্ডিকেট চক্ৰৰ দৌৰাত্ম্য খোদ গুৱাহাটীৰ মাজমজিয়াতে অব্যাহত আছে। চৰকাৰৰ স্বচ্ছ প্ৰশাসনৰ স্বৰূপ উদঙাই যোৱা নিশা জালুকবাৰীত ছিণ্ডিকেট চক্ৰই ৰাস্তাৰ পৰাই এএছ-১৩এচি-৫৩৮৬ নম্বৰ গৰুভৰ্তি এখন ট্রাক অপহৰণ কৰি নিয়ে।
দৰঙৰ দলগাঁৱৰ পৰা মেঘালয়ৰ চৈধ্যমাইললৈ ২১টা গৰু কঢ়িয়াই নিয়া ট্রাকখন শৰাইঘাট দলঙৰ সমীপৰ পৰা ছিণ্ডিকেট চক্রই তেনেদৰে লৈ যায়। প্রথমে এখন চাৰিচকীয়া বাহনৰে বাট আগচি ধৰি ট্রাকখনৰ পৰা হেণ্ডিমেনজনক বলপূর্বক নমাই দিয়া হয়। তাৰ পাছত ট্রাকখন গোপন স্থানলৈ লৈ যোৱা হয়। ঘটনাৰ পাছত পুৱা হেণ্ডিমেনজন জালুকবাৰী আৰক্ষীৰ কাষ চাপে।
হেণ্ডিমেনজনৰ পৰা লাভ কৰা তথ্যৰ ভিত্তিত আৰক্ষীয়ে ট্রাকখনৰ সন্ধান চলায়। অৱশেষত দুপৰীয়া গোটানগৰৰ এক স্থানত তিৰপালৰে ঢাকি ৰখা অৱস্থাত গৰুসহ ট্রাকখন উদ্ধাৰ কৰা হয়। ট্রাকখনৰ চালকজনক অদ্যাপি আৰক্ষীয়ে বিচাৰি পোৱা নাই। হেণ্ডিমেনজনৰ পৰা উদ্ধাৰ হোৱা তথ্য অনুসৰি, গৰু সৰবৰাহ কৰা বাহনক লৈ কে’বাটাও চক্ৰ ৰাষ্ট্ৰীয় ঘাইপথত সক্রিয় হৈ আহিছে।
তেনে চক্রক ধন আদায় নিদিলে গৰু সৰবৰাহৰ কৰাটো সম্ভৱ নহয়। আৰক্ষী সূত্ৰই সদৰী কৰা অনুসৰি, গৰুৰ বৈধ-অবৈধ ব্যৱসায় চলোৱা চক্ৰৰ লগত ছিণ্ডিকেট চক্ৰৰ প্ৰত্যক্ষ যোগাযোগ আছে। দুই পক্ষই আগতীয়াকৈ সৰবৰাহৰ দৰদাম নির্ধাৰণ কৰে।
যদি দৰদাম নিমিলে, তেনেহ’লে ৰাস্তাত বাহনবোৰক হাৰাশাস্তি কৰা হয়। যোৱা নিশাৰ ঘটনাটোও এনে কাণ্ডৰে পৰিণাম বুলি আৰক্ষীয়ে সন্দেহ প্রকাশ কৰিছে।
