Kharchang coal syndicate:
দুর্নীতি-অন্যায়ৰ বিৰুদ্ধে শূন্য সহনশীল বুলি দাবী কৰি অহা বিজেপি চৰকাৰৰ শাসনকালত ৰাজকোষলৈ আহিবলগীয়া কোটি কোটি টকা ছিণ্ডিকেট চক্ৰৰ জেপলৈ গৈছে।
চৰকাৰখনৰ বিগত কালছোৱাৰ বিভিন্ন ঘটনাৱলীয়ে ইয়াক স্পষ্ট কৰি দিছে। ডিমা হাছাওৰ উমৰাংছ’ৰ অবৈধ কয়লা খনিত সংঘটিত ভয়ংকৰ দুৰ্ঘটনাৰ সমান্তৰালভাৱে মেঘালয়, মাৰ্ঘেৰিটাৰ কয়লাক কেন্দ্ৰ কৰি অসম চৰকাৰৰ শীৰ্ষ মহলৰে ঘনিষ্ঠ কয়লা মাফিয়াৰ ঘৰত ইডিয়ে চলোৱা অভিযানে বিজেপি চৰকাৰৰ দিনত ব্যাপকৰূপে সংঘটিত কয়লা ছিণ্ডিকেটৰ বহু গুৰুত্বপূর্ণ তথ্য পোহৰলৈ আনিছে।
এইসমূহ ঘটনাক লৈ চৰকাৰী পক্ষই ৰাজ্যত কোনোধৰণৰ কয়লা ছিণ্ডিকেট নাই বুলি দাবী কৰি আহিছে যদিও এতিয়াও অব্যাহত আছে খাৰচাঙৰ কয়লা ছিণ্ডিকেট। উল্লেখ্য যে শদিয়াৰ বিজেপি বিধায়ক বলীন চেতিয়াৰ প্ৰত্যক্ষ পৃষ্ঠপোষকতাত অৰুণাচলৰ খাৰচাঙৰ কয়লা ছিণ্ডিকেট দীর্ঘদিন ধৰি নিয়ন্ত্ৰণ হৈ আহিছে আৰু এই কথা তিনিচুকীয়া জিলাখনত সর্বজনবিদিত।
বিগত সময়ছোৱাত এই ছিণ্ডিকেট বিধায়ক চেতিয়াৰ অতি ঘনিষ্ঠ এজন বিজেপিৰ স্থানীয় নেতাই চোৱাচিতা কৰিছিল যদিও এইবাৰ কুখ্যাত কাঠ মাফিয়া হেমন্ত মৰাণ ওৰফে গুন্দুকক সমস্ত দায়িত্ব প্রদান কৰিছে শদিয়াৰ বিধায়কজনে। গুন্দুকে এই ছিণ্ডিকেটৰ অসমৰ দিশটো চোৱাচিতা কৰাৰ লগতে অৰুণাচলৰ দিশটো চোৱাচিতাৰ দায়িত্বত আছে নিজকে বিজেপি নেতা বুলি দাবী কৰা সঞ্জীৱ হাজৰিকা। এই দুই ছিণ্ডিকেট কাণ্ডাৰীয়ে নির্দিষ্ট কৰি দিয়া গুণ্ডাকৰ সংগ্ৰহৰ দায়িত্বত আছে মাৰ্ঘেৰিটাৰ বিধায়ক ভাস্কৰ শৰ্মাৰ ঘনিষ্ঠ বুলি দাবী কৰি অহা তথা দীর্ঘদিন ধৰি কয়লাৰ ক’লা সাম্ৰাজ্যখনৰ স’তে জড়িত সর্বজনবিদিত কুখ্যাত কয়লা মাফিয়া যোগেশ মাউতে।
উল্লেখ্য যে কয়লা ছিণ্ডিকেটৰ বিৰুদ্ধে কেন্দ্ৰীয় তদন্তকাৰী সংস্থাই অসমৰ বিভিন্ন প্রান্তত শেহতীয়াকৈ অভিযান অব্যাহত ৰখাৰ সময়তো এই চক্রটোৱে বিনা বাধাই শ শ কয়লাভর্তি ট্রাক পাৰ কৰাই নিবলৈ সক্ষম হৈছে। অৱশ্যে বতৰৰ বাবে যোৱা দুই-তিনিটা দিন কয়লাভর্তি ট্রাক অসমত প্ৰৱেশ কৰা নাই যদিও এতিয়া শতাধিক ট্রাক অসমত প্ৰৱেশ কৰিবলৈ সাজু হৈ আছে।
ইফালে, খাৰচাঙৰ প্ৰতিখন কয়লাভর্তি ট্রাক অসমত প্ৰৱেশৰ নামত এক লাখ ৪৬ হেজাৰ টকা নির্ধাৰণ কৰি দিছে বিধায়ক চেতিয়াৰ ঘনিষ্ঠ গুন্দুকে। স্বয়ং বিধায়কজনৰ ঘনিষ্ঠ এক সূত্ৰই সদৰী কৰা অনুসৰি, চলিত বৰ্ষত তথা ডিচেম্বৰলৈ খাৰচাঙৰ কয়লাৰ জৰিয়তে তিনিশ কোটি গুণ্ডাকৰ সংগ্ৰহৰ লক্ষ্য নির্ধাৰণ কৰি দিয়া হৈছে।
কিয়নো ২০২৬ত বিধানসভা নির্বাচন আৰু তেনেস্থলত বিশেষ পৰিস্থিতিত উল্লিখিত বৰ্ষৰ প্ৰথমাৱস্থাত কয়লা সৰবৰাহ বন্ধ হৈ থকাৰ সম্ভাৱনা আছে। এই লক্ষ্য লৈয়ে তিনিচুকীয়াৰ আৰক্ষী-প্ৰশাসনৰ চকুৰ সম্মুখেৰে চক্ৰটোৱে বিনা বাধাই কয়লা ভর্তি ট্রাকসমূহ পাৰ কৰি নিছে আৰু এই সন্দৰ্ভত তথ্যসহ ধাৰাবাহিক বাতৰি প্ৰকাশ পাই আহিছে যদিও দিছপুৰে কোনোধৰণৰ ব্যৱস্থা গ্রহণ নকৰা বিষয়টোৱে বিশেষ তাৎপর্য বহন কৰিছে। বিভিন্নজনৰ মনত এই গুণ্ডাকৰৰ ভাগ দিছপুৰলৈও যায় বুলি স্বাভাৱিকতে প্রশ্ন উদয় হৈছে।
উল্লেখ্য যে খাৰচাঙৰ কয়লা ছিণ্ডিকেটক লৈ বিজেপিৰ দুটা ফৈদ প্রত্যক্ষ সংঘাতত লিপ্ত হৈছিল। মাৰ্ঘেৰিটাৰ বিধায়ক শৰ্মাৰ ঘনিষ্ঠ তথা স্থানীয় বিজেপি নেতা সত্যৰঞ্জন বৰকাকতিৰ নেতৃত্বত বিজেপিৰ এটা দলে কয়লাভর্তি ট্রাকসমূহ নামদাঙত আগভেটি ধৰি ট্রাকসমূহ ওভতাই পঠিয়াইছিল। শেষত দুয়োপক্ষৰ মাজত বুজাবুজি সম্পন্ন হোৱাত পুনৰ পথছোৱা সুচল হয়।
সূত্রত প্রকাশ যে আগন্তুক দিনত কে’বাশ কয়লাভর্তি ট্রাক অসমত প্ৰৱেশ কৰিব আৰু এই ক্ষেত্ৰত যাতে কোনো বাধাৰ সম্মুখীন নহয়, কয়লা ছিণ্ডিকেটৰ স’তে জড়িত চক্রটোৱে শীঘ্ৰে কাজিৰঙাত এক বৈঠকত মিলিত হ’ব। কয়লা মাফিয়া মাউতে এই বৈঠকৰ আহ্বান জনাইছে আৰু এই বৈঠকত কে’বাজনো শীর্ষ পর্যায়ৰ আৰক্ষী, বন আৰু পৰিবহণ বিভাগৰ বিষয়া উপস্থিত থকাৰ কথা। এই তথ্যই দুর্নীতি-ছিণ্ডিকেটৰ বিৰুদ্ধে সততে শূন্য সহনশীলতাৰ কথা কোৱা চৰকাৰখনৰ স্বৰূপ উদঙাই দিছে।