Tamilnadu:✒️দেশৰ ভিতৰত অন্যতম ধনী ৰাজ্য হ’লেও তামিলনাডুত ঠাই বিশেষে জাত-পাতৰ বিচাৰ প্ৰৱল হৈয়ে আছে। আনকি মাথোঁ এবছৰতে ৰাজ্যখনৰ তিৰুনেলভেলি জিলাত জাত-পাতৰ নামত ২৪০ টা হত্যাকাণ্ড সংঘটিত হৈছে।
স্বাভাৱিকতে ইয়ে ৰাজ্যখনত জাত-পাতৰ নামত কেনে নাৰকীয় পৰিৱেশ বিৰাজ কৰিছে তাৰ আভাস স্পষ্ট কৰিছে। জাত-পাতৰ নামত হোৱা এনে হত্যা-হিংসাক লৈ উদ্বিগ্ন হৈ উঠি অসবর্ণ বা আন্তঃধর্মীয় বিবাহৰ বাবে নিজৰ কার্যালয় মুকলি কৰিছে চিপিএমে।
দক্ষিণৰ ৰাজ্যখনত বাঁওদলটোৰ স্থিতি বিশেষ শক্তিশালী নহ’লেও সাম্প্রতিক পৰিৱেশক লৈ দলে এনে সিদ্ধান্ত গ্রহণ কৰিছে। এই সম্পৰ্কত চিপিএমৰ ৰাজ্যিক সম্পাদক পি ষন্মগমে কয় যে অসবর্ণ বা আন্তঃধর্মীয় বিবাহপাশত আবদ্ধ হ’বলৈ সিদ্ধান্ত লোৱা প্রেমিক-প্রেমিকাসকলে ইচ্ছা কৰিলে দলৰ কাৰ্যালয়ত বিবাহপাশত আবদ্ধ হ’ব পাৰিব।
দলে লক্ষ্য কৰিছে যে বিগত কিছু বছৰৰ পৰা তামিলনাডুত জাত-পাতৰ নামত হত্যা-হিংসাৰ ঘটনা বৃদ্ধি পাইছে। বিশেষকৈ তিরুনেলভেলি জিলাৰ পৰিৱেশ অধিক উদ্বেগজনক। মাথোঁ এবছৰৰ ভিতৰতে জাত-পাতৰ নামত ২৪০ টা হত্যাকাণ্ডৰ ঘটনা সংঘটিত হৈছে।
যোৱা এক-ডেৰ বছৰত জিলাখনৰ পৰিস্থিতিৰ শোচনীয় অৱনতি ঘটে। সম্প্রতি এই জিলাত চিপিএমে অসবর্ণ বা আন্তঃধর্মীয় বিবাহৰ বাবে এটা কার্যালয় মুকলি কৰিছে। দলৰ এই কাৰ্যালয়ত নিম্ন বৰ্ণৰ পাত্র-পাত্রীয়ে উচ্চবৰ্ণৰ পাত্র-পাত্ৰীৰ স’তে বিবাহপাশত আবদ্ধ হ’ব পাৰিব।
আৰম্ভণি অৱস্থাত দলৰ এই কার্যালয় একাংশই ভাঙি পেলায় বুলিও চিপিএমৰ ৰাজ্যিক সম্পাদক যন্মগমে সদৰী কৰিছে। তৎসত্ত্বেও হতাশ নহৈ দলে অসবর্ণ বিবাহৰ বাবে এই কার্যালয় মুকলি ৰখা বুলি চিপিএম নেতাজনে জনায়। এই সম্পর্কত তেওঁ কয়,’তিৰুনেলভেলিত আমাৰ কাৰ্যালয় এগৰাকী কন্যাৰ ঘৰৰ মানুহে ভাঙি চুৰমাৰ কৰিছিল। তৎসত্ত্বেও আমি পিছুৱাই নাহিলো। তাৰ পাছতে আমি সিদ্ধান্ত ল’লো যে সমগ্র ৰাজ্যত এনে ধৰণৰ বিবাহ আমি সম্পন্ন কৰাম। অন্যথা বর্ণবাদৰ বিৰুদ্ধে যুদ্ধ কৰা নহ’ব।’
উল্লেখ্য যে তামিলনাডুৰ শাসকীয় ডিএমকে নেতৃত্বাধীন মৰ্চাৰ অন্যতম অংশীদাৰ হৈছে চিপিএম। ৰাজ্যখনত উদ্বেগজনকভাবে বৃদ্ধি পোৱা জাত-পাতকেন্দ্রিক হত্যা-হিংসাক লৈ দলে উদ্বেগ প্রকাশ কৰি মুখ্যমন্ত্রী এম কে ষ্টেলিনকো ব্যৱস্থা গ্রহণ কৰিবলৈ দাবী জনাইছে।
ইতিমধ্যে ৰাজ্যখনৰ বাঁওদলসমূহে বিধানসভাত আইন প্রণয়ন কৰি এনে নাৰকীয় কাণ্ড প্ৰতিৰোধ কৰিবলৈ দাবী উত্থাপন কৰিছে। উল্লেখ্য যে পৰিসংখ্যা অনুসৰি বিগত এক-ডেৰ বছৰত জাত-পাতৰ নামত তামিলনাডুত যিমান হিংসাৰ ঘটনা সংঘটিত হৈছে তাৰ অধিকাংশই হৈছে প্রেম-প্রণয় আৰু বিবাহকেন্দ্রিক।
এনে হিংসাত কাৰোবাৰ পাত্ৰীৰ মৃত্যু হৈছে বা কাৰোবাৰ পাত্ৰ হত্যাৰ বলি হৈছে। গতিকে চিপিএমে বিবাহৰ বিষয়টো গুৰুত্ব সহকাৰে গ্ৰহণ কৰিছে। ইপিনে, দলৰ তামিলনাডু ৰাজ্যিক শাখাই গ্ৰহণ কৰা এনে ব্যৱস্থাই পশ্চিমবংগ চিপিএমতো প্রভাৱ পেলোৱাৰ সম্ভাৱনা বৃদ্ধি পাইছে। বহুতে চর্চা কৰে যে পশ্চিমবংগত ধৰ্মান্তৰকৰণ ঘটনা অব্যাহত আছে।
আন্তঃধর্মীয় বিবাহৰ ক্ষেত্ৰত দলীয় ব্যৱস্থা গ্রহণ কৰিব নেকি বুলি সাংবাদিকে সোধা প্ৰশ্নৰ উত্তৰত চিপিএমৰ পশ্চিমবংগৰ ৰাজ্যিক সমিতিৰ সম্পাদক তথা পলিটব্যুৰ’ৰ সদস্য মহম্মদ ছেলিমে কয় যে এনে কাৰ্যৰ বাবে তেওঁলোকৰ দলৰ দুৱাৰ সদায়ে মুকলি আছে।
এই সম্পর্কত তেওঁ লগতে কয়, ‘বিয়া বিষয়টো সামাজিক বিষয়। দলৰ কাৰ্যালয়ত মানুহৰ বাবে কাম কৰা হয়। গতিকে আমাৰ কাৰ্যালয় বিবাহৰ বাবে ব্যৱহাৰ হ’ব পাৰে। কোনো বাধা নাই।’ এই সম্পর্কত তেওঁ লগতে কয় যে কিছু বছৰ পূর্বে দলে মেদিনীপুৰত শাওণ মাহৰ জলযাত্ৰীসকলৰ বাবে এটা কার্যালয় মুকলি কৰিছিল। জলযাত্রীসকলে এই কার্যালয়ত বিশ্রাম কৰিছিল। তেওঁলোকক সহায় কৰাৰ কাৰণ আছিল জলযাত্রীসকলো মানুহ।