Rohingya Bangladeshi arrested:২০১২তে ভাৰতত প্রৱেশ কৰা ৰোহিংগ্যাৰ ১৩ জনীয়া দল হাউলীত ধৃত
পৰিকল্পনা বাংলাদেশৰ ৰোহিংগ্যা শৰণাৰ্থী শিবিৰলৈ উভতি যোৱাৰ
: ৰাজ্যত পুনৰ ধৰা পৰিল ৰোহিংগ্যা অনুপ্রৱেশকাৰী। দেওবাৰে দুপৰীয়া হাউলী আৰক্ষীয়ে সাতটি শিশু আৰু তিনিগৰাকী মহিলাসহ ৰোহিংগ্যা অনুপ্রৱেশকাৰীৰ এটা দলক আটক কৰে। শিশুকেইটিব বয়স তিনিৰ পৰা ১১ বছৰৰ ভিতৰত। এই দলটোৰ হাতৰ পৰা দিল্লীস্থিত ইউএনএইছচিআৰ নামৰ এটা প্রতিষ্ঠানে প্রদান কৰা শৰণাৰ্থীৰ পৰিচয় পত্ৰও উদ্ধাৰ কৰা হয়।
এই দলটোৰ এজন সদস্য মহম্মদ আলমে সদৰী কৰা অনুসৰি, তেওঁলোক ২০১২ত বাংলাদেশত থকা ৰোহিংগ্যা শৰণার্থী শিবিৰৰ পৰা ওলাই আহি ভাৰতত প্ৰৱেশ কৰিছিল। তাৰ পাছত দীর্ঘদিন জম্মু-কাশ্মীৰত আছিল। শেহতীয়াকৈ তেওঁলোক পুনৰ বাংলাদেশলৈ উভতি যোৱাৰ বাবে জম্বুৰ পৰা বাছযোগে দিল্লীত উপস্থিত হৈছিল। দিল্লীৰ পৰা ৰে’লযোগে অসমলৈ আহিছিল আৰু বৰপেটাৰোড ষ্টেছনত নামিছিল।
পৰিকল্পনা অনুসৰি, বৰপেটাৰোডৰ পৰা হাউলী হৈ শ্বিলঙলৈ যাব বিচাৰিছিল। বৰপেটাৰোডৰ পৰা এখন টেম্প’ৰে দলটোৱে ২৭ নম্বৰ ৰাষ্ট্ৰীয় ঘাইপথৰে গৈ থকা অৱস্থাত টেম্প’ চালকজনৰ যাত্রীকেইজনৰ ওপৰত সন্দেহ ওপজে। কথা পাতি যাত্রীকেইজন ৰোহিংগ্যা বুলি নিশ্চিত হয়। তেতিয়া চালকজনে হাউলী চিকিৎসালয়ৰ সমীপত ৰাষ্ট্ৰীয় ঘাইপথত আটাইকেইজনক নমাই দিয়ে। নমাই দিয়া লোককেইজনৰ আচাৰ-আচৰণ দেখি স্থানীয় লোকৰ সন্দেহ ওপজে আৰু তেওঁলোকে সোধপোছ কৰাৰ লগতে হাউলী আৰক্ষীকো অৱগত কৰে।
আৰক্ষীৰ দল সেই স্থানত উপস্থিত হয় আৰু দলটোক হাউলী থানালৈ লৈ যায়। লোককেইজনৰ নথিপত্ৰ পৰীক্ষা কৰাৰ লগতে সোধপোছে অব্যাহত ৰাখিছে আৰক্ষীয়ে। আৰক্ষীৰ তথ্য অনুসৰি, আটক কৰা পুৰুষকেইজন হ’ল মহম্মদ ৰফিক, নুৰ আলী আৰু মহম্মদ আলম। মহিলাকেইগৰাকী হ’ল আছিয়া বিবি, ছাকুতাৰা বেগম আৰু ছায়েদা খাতুন। শিশুকেইটি হ’ল- কিছমৎ আৰা বেগম, মিনাৰা বেগম, মহম্মদ ইব্রাহীম, হামিদ ৰেহমান, মহম্মদ ওছমান, মহম্মদ ইছমাইল আৰু আছমা তাৰা।
