Madani’s visit to Assam is opposed by AJP:
শেহতীয়াকৈ অসমৰ মুখ্যমন্ত্রী ড: হিমন্ত বিশ্ব শর্মাক সমালোচনা আৰু চৰকাৰৰ উচ্ছেদ অভিযানৰ বিৰোধিতা কৰি বিতৰ্ক সৃষ্টি কৰা জমিয়ত উলেমা ই হিন্দৰ ৰাষ্ট্ৰীয় সভাপতি মেহমুদ মাদানীৰ অসম ভ্ৰমণৰ তীব্ৰ বিৰোধিতা কৰিছে অসম জাতীয় পৰিষদে। দলৰ সভাপতি লুৰীণজ্যোতি গগৈ আৰু সাধাৰণ সম্পাদক জগদীশ ভূঞাই মাদানীক আটক কৰিবলৈ অসম আৰক্ষীক দাবী জনায়। এক প্রেছ বিবৃতিত অজাপই কয়, ‘মুখ্যমন্ত্রী ড: হিমন্ত বিশ্ব শর্মা আৰু বদৰুদ্দিন আজমলৰ ভিতৰুৱা বুজাবুজিৰে অসমত সাম্প্রদায়িক পৰিৱেশ ৰচনা কৰিবৰ বাবেই মাদানী অসমলৈ আহিছে। মাদানী আজমলৰ খৰচত তথা আজমলৰ মন্ত্ৰণা অনুসৰিয়ে যে অসমলৈ আহিছে সেয়া প্রমাণ হ’ল।
কিয়নো যোৱা নিশা মাদানীয়ে গোৱালপাৰা চহৰৰ নিকটৱৰ্তী কাৰবালাস্থিত বদৰুদ্দিন আজমলৰ ঘৰতে নিজৰ সংগীসকলৰ স’তে নিশা যাপন কৰিছে। অৰ্থাৎ বদৰুদ্দিন আজমলৰ জৰিয়তে মুখ্যমন্ত্ৰী ড° শৰ্মাই ৰচনা কৰা সাম্প্রদায়িকতাৰ জালখন মেলাৰ উদ্দেশ্যে ঘৰিয়ালৰ চকুপানী টুকিবলৈ মাদানী অসমলৈ অহাটো নিশ্চিত।’ লগতে তেওঁলোকে অভিযোগ কৰি কয়, ‘সাম্প্রদায়িকতাৰ জুই জ্বলাবলৈ আজমলৰ জৰিয়তে মুখ্যমন্ত্রী ড: শর্মাই মাতি আনিছে মাদানীক।’ মাদানীক কোনো ধৰণৰ সাম্প্রদায়িক বক্তব্য প্রদান নকৰাকৈ ইয়াৰ পৰা উভতি যাবলৈ আহ্বান জনাই অজাপ সভাপতি গগৈ আৰু সাধাৰণ সম্পাদক ভূঞাই কয় যে স্বাধীন দেশত এঠাইৰ পৰা আন ঠাইলৈ মানুহ অহা-যোৱা কৰিব পাৰে, তাত মাদানীক বাধা দিয়াৰ কথা নাহে; কিন্তু তেওঁৰ উদ্দেশ্য যিহেতু সাম্প্রদায়িক বুলি স্পষ্ট, এনে পৰিপ্ৰেক্ষিতত তেওঁৰ ভ্ৰমণ আৰু বক্তব্যই অসমত সাম্প্রদায়িক পৰিৱেশ ৰচনা কৰিব পাৰে, এই কথা তেওঁ উপলব্ধি কৰা উচিত।
অসমৰ সামাজিক সংহতিৰ ক্ষতি কৰিব পৰা বক্তব্য প্রদান বা কাম কৰাৰ পৰা বিৰত থাকিবলৈ গগৈ আৰু ভূঞাই মাদানীক সকীয়াই দিয়ে। মাদানীৰ ভ্ৰমণ আৰু বক্তব্যই অসমত সংহতিৰ পৰিৱেশ বিনষ্ট কৰাৰ সম্ভাৱনালৈ চাই মাদানীক আটক কৰিবলৈ আৰু দিল্লীলৈ ওভতাই পঠিয়াবলৈ অসম আৰক্ষীক অজাপ নেতাদ্বয়ে আহ্বান জনায়। তেওঁলোকে লগতে কয় যে ইতিপূর্বে মাদানীৰ বক্তব্যই অসমত সাম্প্রদায়িক বাতাবৰণ সৃষ্টিৰ কৰাৰ কথাটো অসম আৰক্ষীৰ অজ্ঞাত নহয়।
গতিকে আৰক্ষীয়ে ইতিমধ্যে মাদানীক আটক কৰি ওভতাই পঠিয়াব লাগিছিল। গতিকে বিষয়টো ৰাজ্যৰ গৃহ বিভাগৰ দৃষ্টি আকৰ্ষণ কৰি জাতীয় পৰিষদৰ নেতাদ্বয়ে কয় যে ৰাজ্যত সাম্প্রদায়িক পৰিৱেশ সৃষ্টি নকৰাৰ স্বাৰ্থত মাদানীক আটক কৰি ওভতাই পঠিয়াবলৈ ৰাজ্য চৰকাৰে আৰক্ষীক নির্দেশ দিয়া উচিত।
