Jeff Bezos:✒️প্ৰথম অভিযান থমকি ৰৈছিল বেয়া বতৰৰ কাৰণে। যদিও দ্বিতীয়বাৰত ব্যর্থ নহ’ল, বৰঞ্চ মঙল অভিযানত সফল ৰকেট উৎক্ষেপণৰে ‘এক গুলিত দুই চিকাৰ’ কৰিলে মার্কিন উদ্যোগপতি জেফ বেজোছৰ কোম্পানী ব্লু অৰিজিনে। প্রথমতে, নাছাই প্রথমবাৰলৈ কোনো বেচৰকাৰী উদ্যোগত মঙল অভিযান কৰিছে। দ্বিতীয়তে, যিটো গধুৰ ৰকেটে দুখন মহাকাশ যান লৈ ৰঙাগ্ৰহৰ উদ্দেশ্যে ৰাওনা হৈছে,সেইটো পুৰণি।
বিভিন্ন উপায়েৰে মেৰামতি কৰি সেই ৰকেটটো পুনর্ব্যৱহাৰযোগ্য কৰি তোলা হৈছে। ইয়াত খৰচো ৰাহি হৈছে। ইয়াৰ দ্বাৰাই বেচৰকাৰী মহাকাশ অভিযানত এলন মাস্কৰ কোম্পানী স্পেচ এক্সক প্রত্যাহ্বান জনালে বেজোছৰ কোম্পানীয়ে। তেওঁলোকে লগতে দাবী কৰিছে যে ৰকেটক এইদৰে পুনৰ্য্যৱহাৰযোগ্য কৰি তুলিব পাৰিলে অনেক কম খৰচতে মহাকাশ অভিযান কৰিব পাৰি।
বৃহস্পতিবাৰে ফ্ল’ৰিডাৰ কেপ কেনাভেৰালৰ পৰা ব্লু অৰিজিনৰ নিউ গ্লেন বুষ্টাৰ ৰকেটৰ সফল উৎক্ষেপণ কৰা হয়। কেৱল সেয়াই নহয়, নিজৰ কাম সমাধা কৰি মিনিটৰ ভিতৰতে ৰকেটটো সফলভাবে ঘূৰিও আহে। আটলান্টিক মহাসাগৰৰ জেকলিনত অৱতৰণ কৰে ৩২০ ফুট দীঘল ৰকেটটোৱে। ব্লু অৰিজিনৰ সূত্রই জনাইছে যে এই ৰকেটটো এনেদৰে নিৰ্মাণ কৰা হৈছে যাতে ইয়াক কমেও ২৫ বাৰ ব্যৱহাৰ কৰিব পাৰি। বেচৰকাৰী উদ্যোগত মহাকাশ গৱেষণা আৰু অভিযানত এই ধৰণৰ প্ৰযুক্তিৰ ব্যৱহাৰ অতি জৰুৰী। তাত খৰচো কমে।
অৱশ্যে ইচ্ছা কৰিলেই জানো ৰকেটক পুনর্ব্যৱহাৰ কৰি সফল উৎক্ষেপণ সম্ভৱ হয়? এই কামত স্পেচ এক্সৰ ব্যৰ্থতাৰ ইতিহাস আছে। তেওঁলোকৰ ফেলকন নাইন ৰকেট অতি গধুৰ। তাক পুনর্ব্যৱহাৰযোগ্য কৰি পুনৰ উৎক্ষেপণৰ চেষ্টা কৰা হৈছিল; কিন্তু উঠাৰ পাছতে সেইটো ভাঙি পৰে। সেই ক্ষেত্ৰত কিছু আগবাঢ়ি থাকিল ব্লু অৰিজিনৰ নিউ গ্লেন বুষ্টাৰ ৰকেট।
মঙললৈ মহাকাশ যান প্ৰেৰণৰ প্রথম স্তৰতে এই গধুৰ ৰকেটটো সফল হৈছে। এই প্রযুক্তি চৰকাৰী হওক বা বেচৰকাৰী, মহাকাশ অভিযানৰ খৰচ যে বহুখিনি কমাই দিব সেয়া সন্দেহ নাই। সেই পথকে দেখুৱালে জেফ বেজোছৰ কোম্পানীৰ এই সাফল্যই।
এই সাফল্যৰে ব্লু অৰিজিন বেচৰকাৰী মহাকাশ অভিযানৰ ক্ষেত্ৰত মাস্কৰ ডাঙৰ প্ৰতিদ্বন্দ্বীত পৰিণত হৈছে। অভিজ্ঞ মহলৰ মতে, প্রতিযোগিতা প্ৰৱল হ’লে অভিযানৰ ক্ষেত্ৰতে লাভ হ’ব। ইয়াৰ ফলত সকলো পক্ষৰে উৎসাহ বাঢ়িব।
