Water Crisis:✒️অৱহেলাৰ বাবেই হওক বা দ্রুত নগৰীকৰণৰ বাবেই হওক নগৰ-চহৰ আদিত কুঁৱা-পুখুৰী আদিৰ সংখ্যা উদ্বেগজনকভাবে হ্রাস পাবলৈ ধৰিছে। ফলত পৰিৱেশৰ ওপৰতো বিৰূপ প্রভাৱ পৰিছে। মানুহকে ধৰি বিভিন্ন জীবয়ো এটুপি পানীৰ বাবে হাহাকাৰ কৰিবলগীয়া হোৱাৰ দিন সমাগত হৈছে বুলিও চর্চা হৈছে।
এনে জটিল অৱস্থাৰ আগতীয়াকৈ অনুধাৱন কৰি তামিলনাডুৰ পৰিৱেশ কৰ্মী অৰুণ কৃষ্ণমূর্তিয়ে ২০ বছৰ পূৰ্বে এক সাহসী পদক্ষেপ গ্রহণ কৰে। এই পদক্ষেপৰ অধীনত বিগত বছৰসমূহত তামিলনাডুকে ধৰি দেশৰ ১৯ খন ৰাজ্যত কৃষ্ণমূর্তিয়ে ‘জলৰক্ষাৰ অভিযান’ চলায়। তেওঁ গঢ়ি তোলা পৰিৱেশ সংস্থা ‘এনভাইৰণমেন্টেলিষ্ট ফাউণ্ডেছন অৱ ইণ্ডিয়া’ (ইএফআই)ই বিগত ২০ বছৰত এই ১৯ ৰাজ্যত ৬৫৭টা পুখুৰী, কুঁৱা, হ্রদ আদিক পুনৰ জীৱন দিয়ে।
অর্থাৎ এই জল উৎসসমূহ এদিন বন্ধ হৈছিল। অর্থাৎ এইসমূহ কোনেও ব্যৱহাৰ কৰিব নোৱাৰা হৈছিল। এনে মৃত জল উৎসসমূহক পুনৰ জীৱনদান দিয়াত সফল হোৱাৰ পাছত শেহতীয়াভারে ইএফআয়ে বিভিন্ন ৰাজ্যৰ একপ্ৰকাৰ পোত যাবলৈ ধৰা প্ৰাচীন স্টেপবেল (ছিৰিৰে বগাই পানী তোলাৰ ব্যৱস্থা থকা জল উৎস) সমূহক পুনৰ জীৱনদান দিয়াৰ লক্ষ্য লৈছে।
এই সম্পর্কত কৃষ্ণমূর্তিয়ে কয়, ‘স্টেপৱেলক পুনৰ জীৱনদান দিবলৈ লোৱাটো হৈছে ইএফআইৰ সন্মুখত আন এক ডাঙৰ প্ৰত্যাহ্বান। আমি এনে ঐতিহাসিক সম্পদসমূহো সুৰক্ষিত কৰিবলৈ বিচাৰো। এইসমূহে মানুহৰ বুদ্ধিমত্তাৰ এক সাক্ষ্য বহন কৰে।’ পানীৰ বাবে স্টেপৱেলৰ ব্যৱস্থা কৰা কাৰ্য ৰজাদিনত আৰম্ভহৈছিল। গতিকে ইয়াক ঐতিহাসিক সম্পদ আখ্যা দিয়া হয়।
এই সম্পর্কত কৃষ্ণমূর্তিয়ে আৰু কয়, ‘ষ্টেপবেলসমূহ কেনেদৰে নিৰ্মাণ কৰা হৈছিল, অতীতৰ সেই জ্ঞান আমি এতিয়া প্রয়োগ কৰিবলৈ বিচাৰিছো। প্রত্যাহানো আছে।’ প্রাকৃতিক জল উৎসক পুনৰ জীবনদান দিয়া সম্পৰ্কত প্ৰচুৰ জ্ঞান থাকিলেও পৰিৱেশবিদজনে স্বীকাৰ কৰে যে স্টেপৱেলসমূহৰ ক্ষেত্রত কথাটো সম্পূর্ণ সুকীয়া। এনে জল উৎসক পূৰ্বৰ অৱস্থালৈ ঘূৰাই নিয়াৰ ক্ষেত্রত বিশেষীকৃত পৰম্পৰাগত জ্ঞান আৰু শৈল্পিক মানসিকতাৰ প্রয়োজন বুলিও তেওঁ উল্লেখ কৰে। সেয়েহে স্টেপৱেলসমূহক পুনৰ জীৱনদান প্ৰক্ৰিয়াৰ স’তে ইএফআয়ে বিশেষজ্ঞ নিয়োগ কৰিছে।
ইতিমধ্যে বাংগালুৰুৰ ওচৰৰ দেৱানাশালিত এটা স্টেপৱেলক পুনৰ জীৱনদান প্রক্রিয়া সংস্থাটোৱে আৰম্ভ কৰিছে। ইতিমধ্যে এই স্টেপবেল শুকাই তলি ওলাইছে। অৱশ্যে ইয়াৰ ছিৰি বা খটখটাকে ধৰি শিলৰ আন্তঃগাঁথনি সম্পূর্ণরূপে অক্ষত অৱস্থাত আছে। স্টেপৱেলটোক পুনৰ জীৱনদানৰ সময়ত ইয়াৰ নান্দনিক সৌন্দর্য বৃদ্ধিৰো চেষ্টা কৰা হ’ব বুলি কৃষ্ণমূর্তিয়ে জনায়। সংস্থাটোরে ৰাজস্থানৰ আলোৱাৰতো স্টেপবেল পুনৰুজ্জীৱিতকৰণৰ লক্ষ্য লৈছে।
