Cold Wave:✒️হিমালয় অঞ্চলত প্ৰচণ্ড তুষাৰপাতৰ ফলত উত্তৰ, উত্তৰ-পূব আৰু মধ্য ভাৰতৰ বহু ৰাজ্যত তাপমাত্রা হঠাৎ বহু পৰিমাণে হ্ৰাস পাইছে। কিছু কিছু অঞ্চলত সৰ্বনিম্ন তাপমাত্রা হিমাঙ্কৰ বহু তললৈ নামি গৈছে, আন কিছুমান ঠাইত একৰ পৰা ১০ ডিগ্ৰী চেলচিয়াছৰ মাজত আছে।
ইতিমধ্যে ১৫ৰো অধিক ৰাজ্যত মৌচম বিভাগে শীতপ্ৰবাহৰ সতর্কতা জাৰি কৰিছে । ঠাণ্ডাৰ লগতে ঘন কুৱলিৰো সতর্কতা দিয়া হৈছে।
মধ্যপ্ৰদেশৰ শাহডোল জিলাৰ কল্যাণপুৰত তাপমাত্রা দুই ডিগ্ৰী চেলচিয়াছলৈ হ্ৰাস পাইছে। ৰাজস্থানৰ চাৰিখন চহৰত সৰ্বনিম্ন তাপমাত্রা পাঁচ ডিগ্ৰীৰ তলত । বৃহস্পতিবাৰে ৰাজ্যখনৰ ২৩খন জিলাত ঘন কুঁৱলী থাকিব বুলি পূৰ্বাভাস দিছে মৌচম বিভাগে। শীতপ্ৰবাহৰ সতর্কতাৰ বাবে ৰাজস্থানৰ ২৫খন জিলাত বিদ্যালয় বন্ধ ৰখাৰ নিৰ্দেশ দিয়া হৈছে।
হিমালয়ৰ ৰাজ্য উত্তৰাখণ্ডত অৱস্থা আৰু অধিক কঠিন। পিথোৰাগড়ৰ আদি কৈলাস, ৰুদ্রপ্ৰয়াগৰ কেদাৰনাথ আৰু উত্তৰকাশীৰ যমুনোত্ৰী ধামত তাপমাত্রা হিমাঙ্কৰ ২১ ডিগ্ৰী তললৈ নামি গৈছে।
উত্তৰপ্ৰদেশৰ বাৰাণসী, মীৰঠ, ঝাঁসীসহ ৩৮খন জিলাত ঘন কুঁৱলীৰ সতর্কতা জাৰি কৰা হৈছে। আনহাতে, লক্ষ্ণৌ, কানপুৰসহ ২৬খন জিলাত শীতপ্ৰবাহৰ পূৰ্বাভাস দিছে বতৰ বিজ্ঞান বিভাগে। শুক্ৰবাৰৰ পৰা পাহাৰীয়া ৰাজ্যসমূহত তুষাৰপাত বৃদ্ধি পাব পাৰে। শনিবাৰে উত্তৰপ্ৰদেশ, ৰাজস্থান, বিহাৰ, মধ্যপ্ৰদেশ, ঝাৰখণ্ড, চত্তীসগড়, পঞ্জাব আৰু হাৰিয়ানাত বৰষুণৰ সম্ভাৱনাও আছে।
বিহাৰৰ ৩৭খন জিলাত সৰ্বনিম্ন তাপমাত্রা প্ৰায় ১০ ডিগ্ৰী চেলচিয়াছৰ আশে-পাশে । হাৰিয়ানাৰ কেবাখনো জিলাত শীত প্ৰবাহৰ সতর্কতা জাৰি কৰা হৈছে। ঘন কুঁৱলীৰ ফলত উত্তৰ ভাৰতলৈ আৰু উত্তৰ ভাৰতৰ পৰা দেশৰ অন্য অংশলৈ চলা বহু ৰেল সেৱা বিলম্বিত হৈছে। বিমান সেৱাতো ব্যাঘাত ঘটিছে।
বতৰ বিজ্ঞান বিভাগে জনাইছে যে হিমাচল প্ৰদেশ, পঞ্জাব, হাৰিয়ানা, বিহাৰ, পশ্চিমবঙ্গ, ওড়িশা, ছিকিম, অসম, মেঘালয়, ত্ৰিপুৰা, মিজোৰাম, মণিপুৰ, নাগালেণ্ড, ৰাজস্থান, মধ্যপ্ৰদেশ, ছত্তীসগড় আৰু উত্তৰাখণ্ডত শীতপ্ৰসাৱ অব্যাহত থাকিব। দিল্লী, জম্মু-কাশ্মীৰ আৰু চণ্ডীগড়তো সতর্কতা জাৰি কৰা হৈছে।
