Hajo:হাজোত ‘মণিকূট উৎসৱ’-‘সমন্বয় শোভাযাত্ৰাৰ প্ৰস্তুতি

Hajo:

তীৰ্থনগৰী হাজো হিন্দু, মুছলমান আৰু বৌদ্ধৰ ত্রিবেণী সংগম তথা সমন্বয়ৰ মিলনভূমি। ধর্মীয় সংকীর্ণতাৰ ঊর্ধ্বত শান্তি-সম্প্রীতি আৰু সমন্বয়ৰ বাণী মানৱ সমাজত বিলাই দিবলৈ সমাগত ভোগালী বিহু উপলক্ষে পহিলা মাঘৰ পৰা ‘তীৰ্থনগৰী’ হাজোৰ ঐতিহাসিক পোৱামক্কা দৰগাহ আৰু হয়গ্রীৱ মাধৱ মন্দিৰত আৰম্ভ হ’ব এমাহজোৰা মহামিলনৰ উৎসৱ ক্ৰমে ‘উৰুছ মেলা’ আৰু ‘মাঘী মেলা’ তথা ‘মণিকূট উৎসৱ’। এই মহামিলনৰ উৎসৱক লৈ হাজোৰ ৰাইজৰ পাৰভঙা উছাহ-উদ্দীপনাৰ যেন অন্ত নাই। প্রবাদ অনুসৰি, সুদূৰ অতীজত পোৱামক্কা দৰগাহৰ ‘খাদিম’ গৰাকীয়ে সতীর্থসহ পহিলা মাঘৰ দিনা মাধৱ মন্দিৰলৈ গৈ মন্দিৰৰ ‘দলৈ’ক লগ ধৰি বিহুৰ শুভেচ্ছা জ্ঞাপন কৰাৰ লগতে সদৌটি ৰাইজৰ কুশল মংগল কামনাৰে দোৱা প্রার্থনা কৰিছিল। মন্দিৰৰ ‘দলৈ’ গৰাকীয়েও বিহুৰ পিঠা পনাৰে ‘খাদিম’ আৰু তেওঁৰ সতীর্থসকলক আপ্যায়ন কৰাৰ পাছত কুশল বাৰ্তা লৈ মন্দিৰ দর্শন কৰাইছিল। হিন্দু-মুছলমানৰ সেই অপূর্ব সম্প্রীতি সমন্বয়ৰ আদৰ্শকে চিৰযুগমীয়া কৰি ৰখাৰ প্রয়াস হিচাপে হাজোত ইতিহাসে ঢুকি নোপোৱা কালৰে পৰা পৰম্পৰাগতভাবে অনুষ্ঠিত হৈ আহিছে ‘উৰুছ মেলা’ আৰু ‘মাঘী মেলা’ তথা ‘মণিকূট উৎসৱ’। কালক্রমত সেই অপূর্ব আদর্শ বিশ্বৰ বুকুত বহুল প্রচাৰৰ বাবে সদৌ অসম ছাত্ৰ সন্থাৰ উদ্যোগত প্রতি বছৰে পহিলা মাঘৰ দিনা হাজোত অনুষ্ঠিত হৈ আহিছে ঐতিহাসিক ‘মণিকূট উৎসৱ’ আৰু ‘সমন্বয় শোভাযাত্রা’।

তদুপলক্ষে অইন বছৰৰ দৰে এইবেলিও হাজো আছুৰ উদ্যোগত অহা ১৫ জানুৱাৰীত পহিলা মাঘৰ দিনা তীৰ্থনগৰী হাজোত মণিকূট উৎসৱ আৰু সমন্বয় শোভাযাত্রা অনুষ্ঠিত কৰাৰ বাবে চলিছে ব্যাপক প্রস্তুতি। কাৰ্যসূচী অনুসৰি সেইদিনা পুৱা ন বজাত সদৌ অসম ছাত্ৰ সন্থাৰ পতাকা উত্তোলন কৰিব হাজো আছুৰ সভাপতি প্রাণজিৎ দেউৰীয়াই। ছহিদ তৰ্পণ কৰিব সাধাৰণ সম্পাদক নিপু কলিতাই। পুৱা ১০ বজাত হ’ব পোৱামক্কা দৰগাহৰ নামনিৰ পৰা মাধৱ মন্দিৰলৈ এক বর্ণিল সমন্বয় শোভাযাত্রা। এই শোভাযাত্ৰাৰ উদ্বোধন কৰিব পোৱামক্কা দৰগাহৰ ‘খাদিম’ চৈয়দ ফৰিদ আলী আৰু পঞ্চতীৰ্থ পৰিচালনা সমিতিৰ ‘দলৈ’ শিৱ প্রসাদ শর্মাই। জাতি-ধর্ম-ভাষা-বর্ণ নির্বিশেষে তীৰ্থনগৰী হাজোৰ বৃহত্তৰ অঞ্চলৰ ৰাইজ, চৰকাৰী- বেচৰকাৰী শিক্ষানুষ্ঠানৰ ছাত্ৰ-ছাত্ৰী, শিক্ষক-শিক্ষয়িত্রী, দল-সংগঠন, সাংস্কৃতিক গোষ্ঠী-অনুষ্ঠান, উত্তৰ-পূৰ্বাঞ্চলৰ বাৰেৰহণীয়া ভালেমান সাংস্কৃতিক গোষ্ঠীয়ে অংশগ্রহণ কৰিব ৷