Biswajit Daimary:
ঋণগ্ৰস্ত অসমৰ জোৰা টাপলি মাৰিবলৈ ৰাজ্য চৰকাৰে সঘনাই হেজাৰ হেজাৰ কোটি ঋণ লৈ শৰাধ কৰি থকাৰ মাজতে এইবাৰ অসম বিধানসভাৰ অধ্যক্ষ বিশ্বজিত দৈমাৰীয়ে পঞ্চদশ অসম বিধানসভাৰ চলিত অন্তিম অধিবেশনৰ বুধবাৰে তৃতীয় দিনা পাঁচ লাখটকীয়া বিধানসভা ভৱনৰ ৰূপৰ প্ৰতীকেৰে সকলো বিধায়কৰ হাত শুৱনি কৰে । বিধানসভাৰ প্ৰতিজন সদস্যক শুভেচ্ছা হিচাপে আইনাৰ বাকচত সজোৱা প্রতীকটোৰ লগতে সম্বর্ধনা আৰু শুভেচ্ছাপত্রও উপহৰ হিচাপে প্রদান কৰা হয়। এনে ‘ইলাহী’ উপহাৰক লৈ বিধানসভাতে বিশেষ চর্চ চলে। কিয়নো এনেধৰণৰ উপহাৰ বিধানসভাৰ সদস্যক দিয়াৰ দৃষ্টান্ত নাই।
বিধানসভ সচিবালয়ৰ সূত্রই সদৰী কৰ অনুসৰি, প্ৰতিটো এনে প্রতীকৰ মূল্য হৈছে পাঁচ লাখ টকা। দুশৰো অধিক এনে প্রতীক বিশেষভাৱে তৈয়াৰ কৰি অনা হৈছে। গুৱাহাটীৰ এখন অলংকাৰ বিপণীয়ে এই প্রতীকসমূহ নিৰ্মাণ কৰি উলিয়াইছে। বিধানসভা ভৱনৰ বাহ্যিক দিশটোৰ খুঁটি-নাটি প্রতীকটোত ফুটাই তোলাৰ চেষ্টা কৰা হৈছে। সেই কাৰণে ইয়াৰ নির্মাণ ব্যয় বৃদ্ধি হয়। প্রায় ১০ কোটি টকা এই প্রতীক নির্মাণতে ব্যয় কৰা হয় বুলিও চর্চা চলিছে। অসম বিধানসভাৰ সদস্যৰ সংখ্যা ১২৬ যদিও আন বিভিন্নজনক এই উপহাৰ প্ৰদান কৰা হ’ব। তাৰ বাবে অতিৰিক্ত সংখ্যক প্রতীক নিৰ্মাণ কৰি অনা হৈছে।
অৱশ্যে ৰাইজৰ ধন পানীৰ ধলৰ দৰে ব্যয় কৰাটো অধ্যক্ষ দৈমাৰীৰ বাবে সাধাৰণ কথা বুলিও পূৰ্বৰ পৰা চৰ্চা আছে। বিদ্যুৎ বিল হ্রাস কৰিবলৈ ৰাজ্যবাসীক গছৰ তলত থাকিবলৈ পৰামৰ্শ দি নিজে চৰকাৰী আৱাসত ২২টা এ চিৰ শীতল বতাহৰ মাজত থকা ব্যক্তিজনেই হ’ল অধ্যক্ষ দৈমাৰী। বিধানসভাৰ সমগ্ৰ চৌহদক সামান্য এটা অনুষ্ঠানতে বহিঃৰাজ্যৰ পৰা লাখ লাখ টকাৰ আমদানি কৰা ফুলেৰে সজাই তোলাও তেওঁৰ এটা অভ্যাস। এই বিশেষ উপহাৰ গ্ৰহণ কৰি কে’বাজনো মন্ত্রী-বিধায়কে সামাজিক মাধ্যমতো ইতিমধ্যে ব্যাপক প্ৰচাৰ চলায়।
