BJP Incharge:
দৈনিক অগ্ৰদূত ডিজিটেল ডেস্ক:দেশজুৰি বৃহৎ দলীয় সাংগঠনিক সালসলনি কৰি বিভিন্ন ৰাজ্যত ভাৰপ্ৰাপ্ত আৰু সহ ভাৰপ্ৰাপ্ত নিযুক্তি দিছে বিজেপিৰ ৰাষ্ট্ৰীয় সভাপতি নীতিন নবীনে। এক বিবৃতিত দলে প্রকাশ কৰা অনুসৰি, দলৰ ৰাষ্ট্ৰীয় সাধাৰণ সম্পাদক তথা সাংসদ বিনোদ তাৱড়েক উত্তৰ প্ৰদেশৰ ভাৰপ্ৰাপ্তৰূপে নিযুক্তিদিয়া হৈছে।
বিগত বিধানসভা নিৰ্বাচনৰ সময়ত বিহাৰৰ ভাৰপ্ৰাপ্তৰূপে কাৰ্যনিৰ্বাহ কৰি বিজেপিৰ বাবে অভূতপূর্ব সফলতা কঢ়িয়াই আনিবলৈ সক্ষম হৈছিল মহাৰাষ্ট্ৰৰ প্ৰাক্তন মন্ত্রী তাৱড়ে। সেই সূত্রে ইতিমধ্যে সমগ্ৰ দেশৰ দৃষ্টি নিৱদ্ধ হোৱা অহা বছৰ বিধানসভা নির্বাচন অনুষ্ঠিত হ’বলগীয়া উত্তৰ প্ৰদেশৰ ভাৰপ্ৰাপ্তৰূপে তেওঁক গুৰু দায়িত্ব অর্পণ কৰা হৈছে। আনহাতে, অসমত হৰিশ দ্বিবেদীৰ স্থানত মংগল পাণ্ডেক ৰাজ্যিক বিজেপিৰ ভাৰপ্ৰাপ্ত নিযুক্তি দিয়া হৈছে। লগতে সহ ভাৰপ্ৰাপ্তৰূপে নিযুক্তি দিয়া হৈছে নগালেণ্ডৰ ৰাজ্যসভাৰ সাংসদ ফাংন’ন কন্যাক আৰু মনোজ টিপ্পাক। একেদৰে দিল্লীৰ ভাৰপ্ৰাপ্তৰূপে দলৰ আন এক শক্তিশালী নেতা বিনয় সহস্রবুদ্ধেক নিযুক্ত দিয়া হৈছে।
দলে প্রকাশ কৰা বিবৃতি অনুসৰি, ৰাষ্ট্ৰীয় সভাপতি নীতিন নবীনে জ্যেষ্ঠ নেতা আৰু সাংগঠনিক অভিজ্ঞতাপুষ্ট শীর্ষ নেতাক বিভিন্ন ৰাজ্যৰ দায়িত্ব অর্পণ কৰিছে। বিবৃতি অনুসৰি, আন্দামান আৰু নিকোবৰত জয়প্রকাশ, অৰুণাচল প্রদেশত দেৱেশ কুমাৰ, অন্ধ্রপ্রদেশত অৰবিন্দ ভদোৰীয়া, বিহাৰ আৰু কৰ্ণাটকত দলৰ ৰাষ্ট্ৰীয় সাধাৰণ সম্পাদক হৰিশ দ্বিবেদী, চণ্ডীগড়ত মহেন্দ্র পাণ্ডে, ছত্তিশগড় আৰু হাৰিয়ানাত প্রাক্তন কেন্দ্রীয় মন্ত্রী তথা দলৰ ৰাষ্ট্ৰীয় সাধাৰণ সম্পাদক স্মৃতি ইৰাণী, দাদৰা আৰু নগৰ হাভেলী তথা দমন আৰু ডিউত বর্ষাবেন নৰেন্দ্ৰ ভাই দোশী, গোৱাত প্রাক্তন কেন্দ্ৰীয় মন্ত্ৰী ভাৰতী প্রবীণ পাৱাৰ, গুজৰাটত ৰাজ্যসভাৰ সাংসদ তৰুণ চুঘ, হিমাচল প্রদেশত শ্রীকান্ত শৰ্মা, জম্মু-কাশ্মীৰ আৰু পঞ্জাৱত সতীশ পুনীয়া, ঝাৰখণ্ডত প্ৰাক্তন কেন্দ্রীয় মন্ত্রী গজেন্দ্ৰ পেটেল, কেৰালাত এম নাগৰাজ, লাডাখত ৰাজকুমাৰ ভাটীয়া, লাক্ষাদ্বীপত প্রাক্তন কেন্দ্ৰীয় মন্ত্ৰী জৰ্জ কুৰিয়েন, মধ্যপ্রদেশত ত্ৰিপুৰাৰ প্ৰাক্তন মুখ্যমন্ত্রী বিপ্লৱ কুমাৰ দেৱ, মহাৰাষ্ট্ৰত দলৰ উপ-সভাপতি বৈজয়ন্ত জয় পাণ্ডা, মণিপুৰত অসমৰ বিধায়ক ৰাজদ্বীপ ৰয়, মেঘালয়ত অসমৰ পৰা ৰাজ্যসভাৰ সাংসদ কনৰাড পুৰকায়স্থ, মিজোৰামত ভাগৱত কাৰাড, নগালেণ্ডত প্রাক্তন মন্ত্রী অনিল এন্টনী, ওড়িছাত লোকসভাৰ সাংসদ ডি পুৰণ্ডেশ্বৰী, পুডুচেৰীত কে সুৰেন্দ্ৰন, ৰাজস্থানত সঞ্জয় ভাটীয়া, ছিকিমত ৰাজু বিষ্টা, তামিলনাডু আৰু উত্তৰাখণ্ডত দলৰ উপ-সভাপতি ৰাম মাধৱ, তেলেংগানা আৰু পশ্চিমবংগত সুনীল বাঞ্চাল, ত্ৰিপুৰাত অসমৰ বিজেপিৰ যুৱ নেতা মৃগাংক দেৱবৰ্মনক ভাৰপ্ৰাপ্ত দায়িত্ব অর্পণ কৰা হৈছে।
দলে জাৰি কৰা জাননীত কোৱা হৈছে যে ৰাষ্ট্ৰীয় সভাপতি নবীনে দিয়া এইসমূহ নিযুক্তি তাৎক্ষণিকভাৱে বলৱৎ হ’ব। উল্লেখ্য যে দিল্লীত সহস্রবুদ্ধেৰ স’তে সহ ভাৰপ্ৰাপ্তৰূপে থাকিব লাডাখৰ প্ৰাক্তন সাংসদ জাময়াং ছেৰিং নামগিয়াল আৰু দৰ্শনা জাৰদ’হ। একেদৰে উত্তৰ প্ৰদেশত তাৱড়েৰ স’তে সহ ভাৰপ্ৰাপ্তৰ দায়িত্ব দিয়া হৈছে জগদীশ পেটেল, মেধা কুলকার্ণী, প্রদীপ বাৰ্মা আৰু আনন্দ ওঝাক।
ইপিনে, দলৰ উপ-সভাপতি পাণ্ডাৰ স’তে মহাৰাষ্ট্ৰত সহ ভাৰপ্ৰাপ্তৰ দায়িত্ব অর্পণ কৰা হৈছে দলৰ আইটি কোষৰ প্ৰাক্তন অধ্যক্ষ অমিত মালব্য, সদানন্দ শ্বেট তানাৱাৰেক আৰু কমলজিৎ শ্বেহৰাবাটক। সেইদৰে আগন্তুক বর্ষত বিধানসভা নির্বাচন হ’বলগীয়া গুজৰাটত ভাৰপ্ৰাপ্তৰ দায়িত্ব দিয়া তৰুণ চুঘৰ নাম প্ৰধানমন্ত্ৰী নৰেন্দ্ৰ মোদীৰ বহুচৰ্চিত কেন্দ্ৰীয় মন্ত্রীসভাৰ আসন্ন সালসলনিত অন্তর্ভুক্ত হ’ব বুলি চর্চা চলিছে যদিও তেওঁক গুজৰাটত ভাৰপ্ৰাপ্তৰ দায়িত্ব দিয়াত সেই আশা ম্লান পৰা বুলিও সূত্রত প্রকাশ। আগন্তুক বৰ্ষৰ নিৰ্বাচন আসন্ন আন এখন ৰাজ্য পঞ্জাৱত পুনীয়াৰ স’তে সহ ভাৰপ্ৰাপ্তৰ দায়িত্ব দিয়া হৈছে দিল্লীৰ প্ৰাক্তন বিজেপি সভাপতি বীৰেন্দ্ৰ সচদেৱ আৰু ৰাজ্যসভাৰ সাংসদ অলকা গুৰজাৰক। আনহাতে, মণিপুৰ আৰু গোৱাত আগন্তুক বর্ষত বিধানসভা নির্বাচন অনুষ্ঠিত হ’ব।
উল্লেখ্য যে অসমৰ কে’বাজনো বিজেপি সাংসদ-নেতাই দলীয় সাংগঠনিক দায়িত্ব লাভ কৰিছে। অসম বিধানসভাৰ প্ৰাক্তন উপাধ্যক্ষ নোমল মমিনক মেঘালয়ৰ সহ ভাৰপ্ৰাপ্তৰ দায়িত্ব অর্পণ কৰা হৈছে।
#LatestNews #PoliticalNews #BJParty #StateIncharge #organizationaladjustments