Indore:✒️মধ্যপ্ৰদেশৰ ইন্দোৰত সংঘটিত এক ভয়ংকৰ অগ্নিকাণ্ডই সমগ্ৰ দেশক কঁপাই তুলিছে। পুৱতি নিশা এখন বাসগৃহত লাগিল ভয়ংকৰ জুই—মুহূর্ততে জুইয়ে গোটেই ঘৰখন গ্রাস কৰি লয় আৰু তাৰ ফলতেই কমেও সাত জন লোকৰ কৰুণ মৃত্যু হয়।
ঘটনাটো সংঘটিত হৈছে ইন্দোৰৰ বৃজেশ্বৰী এনেক্স (Brijeshwari Annexe) নামৰ এটা আৱাসিক অঞ্চলত। তথ্য অনুসৰি, পুৱতি নিশা প্ৰায় ৩:৩০ বজাৰ পৰা ৪:৩০ বজাৰ ভিতৰত হঠাতে জুই লাগে আৰু অলপ সময়ৰ ভিতৰতে জুই গোটেই ঘৰখনলৈ বিয়পি পৰে।
প্ৰাথমিক তদন্তত এক চাঞ্চল্যকৰ তথ্য পোহৰলৈ আহিছে। এটা ইলেক্ট্ৰিক কাৰ চাৰ্জিং পইণ্টত হোৱা বিস্ফোৰণৰ পৰাই জুই সূচনা হৈছিল বুলি সন্দেহ কৰা হৈছে।
তাৰ পিছতেই ঘৰৰ ভিতৰত থকা একাধিক গেছ চিলিণ্ডাৰ এটাৰ পাছত এটা বিস্ফোৰিত হয়, যাৰ ফলত জুই অধিক ভয়ংকৰ ৰূপ লয়।
ঘৰৰ ভিতৰত থকা লোকসকলৰ বাবে এই ঘটনা একেবাৰে অপ্রত্যাশিত আছিল। জুই আৰু ধোঁৱাৰ মাজত বহু লোক আৱদ্ধ হৈ পৰে। ইয়াৰ ওপৰিও ডিজিটেল লক থকা বাবে বহু লোক সময়মতে ওলাই আহিব নোৱাৰিলে, যাৰ ফলত মৃত্যুৰ সংখ্যা বৃদ্ধি পায়।
অগ্নিনিৰ্বাপক বাহিনী আৰু আৰক্ষীয়ে ঘটনাস্থলীত উপস্থিত হৈ দীৰ্ঘ সময় ধৰি উদ্ধাৰ অভিযান চলাই অৱশেষত জুই নিয়ন্ত্ৰণ কৰে। তথাপিও বহু লোকক বচাব নোৱাৰিলে। কিছু লোকক গুৰুতৰ আঘাতপ্ৰাপ্ত অৱস্থাত চিকিৎসালয়লৈ প্ৰেৰণ কৰা হৈছে।
বৰ্তমান এই ঘটনাৰ সঠিক কাৰণ জানিবলৈ তদন্ত আৰম্ভ কৰা হৈছে। ইলেক্ট্ৰিক গাড়ী চাৰ্জিং, গেছ চিলিণ্ডাৰ সংৰক্ষণ আৰু গৃহ সুৰক্ষাৰ বিষয়ত এই ঘটনাই পুনৰবাৰ ডাঙৰ প্ৰশ্ন উত্থাপন কৰিছে।