APCC Pressmeet in Rajib Bhawan :
দৈনিক অগ্ৰদূত ডিজিটেল ডেক্স:–অসমৰ সৈতে বিহাৰৰ দীৰ্ঘদিনীয়া সম্পৰ্ক আছে ৷ অসমৰ চাহ আৰু চাহ বাগান আজি ৰাষ্ট্ৰীয় পৰ্যায়ত চৰ্চিত হোৱাৰ ক্ষেত্ৰত বিহাৰৰ শ্ৰমিকে সহায় কৰিছে৷ অবিভক্ত বিহাৰৰ আদিবাসী সম্প্ৰদায়ৰ লোক অসমলৈ আহিছিল৷ সেইসকল লোকে চাহ বাগানক সমগ্ৰ বিশ্বত স্থাপিত কৰাত সহায় কৰিছে৷ ব্ৰিটিছ শাসনকালত স্বাধীনতা আন্দোলনৰ সময়ছোৱাত অসমত আহোম জনগোষ্ঠীৰ নেতৃত্বত ব্ৰিটিছক ইয়াৰ পৰা খেদি পঠিয়াইছিল৷ ব্ৰিটিছৰ সাহস হোৱা নাছিল অসমৰ মানুহক আক্ৰমণ কৰিবলৈ৷ অসমৰ সাম্ৰাজ্যৰ পতন কৰিব পৰা নাছিল ব্ৰিটিছে৷ কিন্তু শোচনীয় অৱস্থাৰ মাজেৰে আজিৰ অসম আগবাঢ়িছে৷— ৰাজীৱ ভৱনত আয়োজিত এক সংবাদমেলত আজি এইদৰে কয় প্ৰাক্তন কেন্দ্ৰীয় মন্ত্ৰী, বিহাৰ প্ৰদেশ কংগ্ৰেছৰ প্ৰাক্তন সভাপতি তথা বৰ্তমান বিহাৰৰ পৰা ৰাজ্যসভাৰ সাংসদ :০ অখিলেশ প্ৰসাদ সিঙে।
তেওঁ আৰু কয়, ”আপোনলোক সকলোৱে জানে যে অসমৰ বৰ্তমানৰ মুখ্যমন্ত্ৰীজনৰ দৰে পৃথিৱীত ক’তো এনে দুৰ্নীতিগ্ৰস্ত মুখ্যমন্ত্ৰী নাই৷ হিমন্ত বিশ্ব শৰ্মাৰ ভ্ৰষ্টাচাৰৰ কাহিনী দেশৰ গাঁৱে গাঁৱে আজি চৰ্চা হৈছে৷ মানুহ মুখ্যমন্ত্ৰী হয় জনতাৰ হিতৰ বাবে কাম কৰিবলৈ৷ ডাঙৰ ডাঙৰ সিদ্ধান্ত লয়৷ আমাৰ সংবিধানত কল্যাণকামী ৰাষ্ট্ৰৰ পৰিকল্পনা কৰা হৈছিল৷ কেনেদেৰ গৰীৱ, আশাহত লোকসকলক মুখ্যধাৰাৰ সৈতে জড়িত কৰি শিক্ষা, স্বাস্থ্যৰ সুবিধা প্ৰদান কৰিব পৰা যায়, তেওঁলোকক সংস্থাপন দিব পৰা যায়৷ কিন্তু অসমৰ মুখ্যমন্ত্ৰীজনৰ এইবিলাক কথাক লৈ কোনো ভ্ৰুক্ষেপ নাই৷’’ তেওঁ কয় যে মুখ্যমন্ত্ৰীজনৰ চৰকাৰে এক চিণ্ডিকেট স্থাপন কৰি পৰিকল্পিতভাবে অসমক লুণ্ঠন কৰিছে৷ আজি এইজন মুখ্যমন্ত্ৰীৰ নেতৃত্বত ২ লাখ কোটিতকৈ অধিক ঋণ লৈছে৷ এই ঋণৰ ভাৰ ৰাজ্যখনৰ নাগৰিকৰ ওপৰত পৰিছে৷ বিপৰীতে আপোনালোকৰ সন্মুখত আছে গৌৰৱ গগৈ৷ গৌৰৱ গগৈৰ পিতৃ তৰুণ গগৈৰ সৈতে মই কাম কৰিছো৷ তৰুণ গগৈক মই মুখ্যমন্ত্ৰীৰূপে দেখিছো৷ তৰুণ গগৈ কেন্দ্ৰীয় মন্ত্ৰী হৈ থকাৰ সময়ত তেওঁৰ কাৰ্যকাল আমি দেখিছো৷ তেওঁ অসমৰ মান-মৰ্যাদা উচ্চ শিখৰলৈ নিছিল৷ আজি মই গৌৰৱ গগৈক সংসদত সহযোগী সদস্যৰূপে পাইছো৷ গৌৰৱ গগৈয়ে যেতিয়া সংসদত বক্তব্য ৰাখে তেতিয়া মোৰ এনে লাগে যে তেওঁ পিতৃৰ পদাংক অনুসৰণ কৰি অসমখনক উচ্চ শিখৰলৈ নিব খোজে৷ এই সপোন প্ৰতিগৰাকী অসমীয়াৰ সপোন৷
সিঙে কয়, ”আজি কংগ্ৰেছে গৌৰৱ গগৈৰ নেতৃত্বত নিৰ্বাচনত অৱতীৰ্ণ হৈছে৷ আজি দুৰ্নীতিত নিমজ্জিত চৰকাৰখনক অসমৰ সকলো ভাই-ভনী অসমীয়াই ৯ এপ্ৰিলত বিদায় দিয়ক৷ ভোটৰ দ্বাৰা এইখন চৰকাৰক আক্ৰমণ কৰক৷ এইখন চৰকাৰক আমি খেদিব লাগিব৷ এইখন চৰকাৰে কেৱল সংঘৰ্ষ, হিন্দু-মুছলমান কৰি শাসনত যিকোনো প্ৰকাৰে থাকিব বিচাৰিছে৷ আজি অসমে এইখন চৰকাৰক ১ মিনিটৰ বাবে সহ্য কৰি থাকিব নোৱাৰে৷ চাহ বাগিচাৰ লোক, শ্ৰমিক, কৃষকৰ আজি ভয়াৱহ অৱস্থা৷ এইসকলৰ বাবে কোনো সুবিধা নাই৷ সেইকাৰণে এইসকল লোকে এইখন চৰকাৰক বিদায় দিব৷’’
তেওঁ আৰু কয় যে কংগ্ৰেছ দলে গাঁও আৰু গৰীৱৰ বাবে এক সুযোগ লৈ আহে৷ আমি অসমতো কেইটামান গেৰাণ্টী প্ৰদান কৰিছো৷ আমি মহিলাসকলক গেৰাণ্টী দিছো৷ মহিলাসকলক প্ৰতিমাহে একাউণ্টযোগে নগদ ধন দিয়া হ’ব৷ কোনো মহিলাই যদি ব্যৱসায় আৰম্ভ কৰিব খোজে তেন্তে ৫০ হাজাৰ টকা সাহায্য প্ৰদান কৰা হ’ব৷ অসমবাসীয়ে জানে যে কি পৰিস্থিতিত জুবিন গাৰ্গক ৰহস্যজনক স্থিতিত বাহিৰলৈ প্ৰেৰণ প্ৰেৰণ কৰা হৈছিল৷ জুবিন গাৰ্গক বাহিৰলৈ নিয়া লোকসকল কোন আছিল সেই কথাৰ বিষয়ে অসমবাসী আৰু দেশবাসী অৱগত৷ কংগ্ৰেছ দলে গেৰাণ্টী দিছে যে কংগ্ৰেছ চৰকাৰে ১০০ দিনৰ ভিতৰত জুবিন গাৰ্গৰ পৰিয়ালক ন্যায় প্ৰদানৰ প্ৰতিশ্ৰুতি দিছে৷ আমি সিদ্ধান্ত লৈছো যে জুবিন গাৰ্গৰ নামত এখন আৰ্ট আৰু সংস্কৃতিৰ সৈতে জড়িত বিশ্বস্তৰীয় প্ৰতিষ্ঠান নিৰ্মাণ কৰা হ’ব৷ এইখন চৰকাৰে ভূমিহীনক যি অস্থায়ী পট্টা দিয়াৰ ব্যৱস্থা কৰিছে তাৰ বিপৰীতে কংগ্ৰেছ চৰকাৰে ভূমিহীনক স্থায়ী ম্যাদী পট্টা প্ৰদান কৰিব৷ জ্যেষ্ঠ নাগৰিকৰ কল্যাণৰ বাবে সুকীয়া বিভাগ স্থাপন কৰা হ’ব আৰু মাহিলী ১২৫০ টকা দিয়া হ’ব৷ প্ৰতিটো পৰিয়ালক স্বাস্থ্য বীমা যোগে ২৫ লক্ষ টকাৰ বীমা প্ৰদান কৰা হ’ব৷ আমাৰ নেতা ৰাহুল গান্ধীই অসমলৈ আহি স্পষ্ট কৰিছে যে অসমত ২৪৪এ কাৰ্যকৰী কৰিম৷ ভাৰতীয় সংবিধানৰ ধাৰা ২৪৪ যোগে স্বায়িত্ব শাসিত অঞ্চলসমূহৰ পৰিচালনাৰ বাবে ব্যৱস্থা প্ৰদান কৰা হ’ব৷ যাতে সেই অঞ্চলৰ সিদ্ধান্ত গুৱাহাটী আৰু দিল্লীৰ পৰা লোৱা নহয়৷ এয়া কোনো প্ৰতিশ্ৰুতি নহয় অসমৰ ভৱিষ্যতৰ কথা৷ আমি অধিকাৰ অসমৰ প্ৰতিঘৰ লোকলৈ প্ৰেৰণ কৰিব খোজো৷ আজি অসমবাসীয়ে জানে যে আদানিৰ সৈতে বিদ্যুৎ ক্ষেত্ৰত এক চুক্তি কৰা হৈছে৷ ভ্ৰষ্টাচাৰী মুখ্যমন্ত্ৰীয়ে এই চুক্তি কৰিছে৷ ২০৩৫-৩৬ বৰ্ষলৈ ২৮৫০ মেগাৱাট বিদ্যুৎ প্ৰয়োজন হ’ব৷ কিন্তু আদানিৰ সৈতে ৩২০০ মেগাৱাট বিদ্যুতৰ চুক্তি কৰা হৈছে৷ ব্যৱস্থাক কেনেদৰে ভ্ৰষ্টাচাৰত নিমজ্জিত কৰা হৈছে এয়া এক উদাহৰণ৷
অখিলেশ প্ৰসাদ সিঙে কিছুদিন পূৰ্বে অসমলৈ এখন বিয়া খাবলৈ অহাৰ প্ৰসংগ টানি আনি পিএছঅ’ আৰু গাড়ীৰ চালকে তেওঁক অৱগত কৰা কিছু কথা সংবাদমেলত উল্লেখ কৰে৷ কামাখ্যাত পূজা কৰিবলৈ যোৱাৰ সময়ত অখিলেশ প্ৰসাদ সিঙক গাড়ীৰ চালকজনে কৈছিল যে ৰাস্তাত প্ৰত্যক্ষ কৰা গ্ৰীণ বাছ দেখুৱাই চালকজনে কৈছিল যে ছাৰ এই বাছবোৰ যে দেখিছে এইসমূহ মুখ্যমন্ত্ৰীৰ পত্নীৰ৷ কেৱল বাছেই নহয় পঞ্চতাৰকা হোটেল দেখুৱাই কৈছিল যে এইখনো মুখ্যমন্ত্ৰীৰ৷ তেওঁলোকে মোক কৈছিল যে ১০ৰ পৰা ১২ হাজাৰ বিঘা মাটিত মুখ্যমন্ত্ৰী আৰু মুখ্যমন্ত্ৰীৰ পৰিয়ালে কব্জা কৰিছে৷ যিখন ৰাজ্যৰ মুখ্যমন্ত্ৰীয়ে এনেদৰে লুণ্ঠন কৰিছে সেইখন ৰাজ্যৰ গৰীৱ জনতাৰ অৱস্থা কেনেকুৱা হ’ব পাৰে সেয় চিন্তা কৰিবলগীয়া৷ মই আজিৰ সংবাদমেলৰ পৰা অসমৰ ভোটদাতা মুৰব্বীসকলক আহ্বান কৰিব খুজিছো যে এইখন চৰকাৰক ভোটেৰে আক্ৰমণ কৰি কংগ্ৰেছৰ চৰকাৰ গঠন কৰক৷ যাতে অসমৰ মানুহৰ আকাংক্ষা আৰু আশা অনুযায়ী এখন চৰকাৰ অসমত পৰিচালিত হয়৷ যিসকল লোকে অসহায় অৱস্থাত জীয়াই থাকিবলৈ বাধ্য হৈছে তেওঁলোকক মুখ্য ধাৰাৰ সৈতে সংপৃক্ত কৰিব পৰা যায়৷ যিখন চৰকাৰে সকলোকে কৃষি কাৰ্য, দৰৱৰ ব্যৱস্থা কৰিব পাৰে৷ বানৰ পৰা ৰক্ষা কৰিবলৈ ব্যৱস্থা কৰা হওক৷ অসমত প্ৰাকৃতিক যেনে কয়লাৰ ভাণ্ডাৰ আছে৷ তাৰ লাভ ৰাইজে পাও আৰু দেশৰ বিকশিত ৰাজ্যৰ তালিকাত অসম সন্নিৱিষ্ট হওক৷
কংগ্ৰেছৰ চৰকাৰ আহিলে অসমৰ ক্ষুদ্ৰ আৰু মজলীয়া কৃষকে উচিত দাম লাভ কৰিব পাৰিব বুলিও কয় বিহাৰ কংগ্ৰেছৰ নেতাগৰাকীয়ে৷ কংগ্ৰেছ চৰকাৰে পূৰ্বৰে পৰা সিদ্ধান্ত লৈছে যে আমাৰ চৰকাৰ গঠন হ’লে কৃষকৰ উৎপাদিত ফচলক ন্যূনতম সমৰ্থন মূল্য দিয়াৰ আইন প্ৰস্তুত কৰিম৷ মই নিজে ২০০৪ চনৰ পৰা ২০০৯ চনলৈ মনমোহন সিং চৰকাৰৰ দিনত ভাৰত চৰকাৰৰ কৃষি আৰু খাদ্য মন্ত্ৰী আছিলো৷ মোদী চৰকাৰে কৃষকৰ উপাৰ্জন দুগুণ কৰাৰ কথা কৈছিল যদিও কৃষকৰ উপাৰ্জন দুগুণ নহ’ল কিন্তু সামগ্ৰীৰ দাম বৃদ্ধিৰ ফলত কৃষকৰ খৰছ দুগুণ বৃদ্ধি পালে৷ অটল বিহাৰী বাজপেয়ী চৰকাৰৰ দিনত ধানৰ এমএছপি প্ৰতি কুইণ্টলত ৫৫০ টকা আছিল সেই ধানৰ দাম প্ৰতি কুইণ্টলত মনমোহন সিঙৰ চৰকাৰে ১১৫০ টকালৈ বৃদ্ধি কৰিছিল৷ অটল বিহাৰী বাজপেয়ী চৰকাৰৰ দিনত গেহুৰ এমএছপি ৬২০ টকা আছিল৷ মনমোহন সিঙৰ চৰকাৰ ১২৪০ টকালৈ বৃদ্ধি কৰিছিল৷ এনেদৰে কৃষকৰ সকলো ফচলৰ দাম বৃদ্ধি কৰা হৈছিল৷ কেৱল ইমানেই নহয়, কৃষকৰ ৭৫ হাজাৰ কোটি টকাৰ ঋণ মাফ কৰা হৈছিল আমাৰ চৰকাৰৰ দিনত৷ ভাৰতৰ কোনো চৰকাৰে আজিলৈ সেই কাম কৰা নাই৷ বিজেপিয়ে প্ৰতিশ্ৰুতি ঠিকেই দিয়ে, কিন্তু কাম নকৰে বুলিও কয় প্ৰাক্তন কেন্দ্ৰীয় মন্ত্ৰীগৰাকীয়ে৷ তেওঁ কয় যে সময় আহিলে বিজেপিয়ে প্ৰতিশ্ৰুতিক ‘ঝুমলা’ আছিল বুলি কৈ দিয়ে৷ ৰাজস্থান, মধ্যপ্ৰদেশ, ছত্তীশগড়ত কংগ্ৰেছ চৰকাৰ গঠন হোৱাৰ পিছতে কৃষকক কৰা প্ৰতিশ্ৰুতি আমি পূৰণ কৰিছো৷ আমি এই ৰাজ্যসমূহত এমাহৰ ভিতৰত কৃষক ঋণ মাফ কৰিছো৷ আমি অসমত যি প্ৰতিশ্ৰুতি দিছো সেয়া চৰকাৰ গঠনৰ পিছতে পূৰণ কৰিম৷ দক্ষিণৰ ৰাজ্য, মহাৰাষ্ট্ৰ, গুজৰাটৰ দৰে উন্নত ৰাজ্যৰ শাৰীলৈ লৈ যাম অসমক৷ মই আশা কৰিছো যে ভ্ৰষ্টাচাৰত ডুবি থকা চৰকাৰক বিদায় দিবলৈ অসমৰ মাতৃ, ভগ্নী, যুৱক, কৃষক, মজদুৰে এটা এটা ভোট প্ৰদান কৰি এইখন চৰকাৰক বিদায় দি কংগ্ৰেছৰ নেতৃত্বত চৰকাৰ গঠন কৰিব৷ অসমত এখন জনতাৰ দ্বাৰা জনতাৰ কাম কৰা চৰকাৰ গঠন হ’ব ৷
সাংসদ অখিলেশ প্ৰসাদ সিঙে বিহাৰত নিৰ্বাচনৰ মাজতে মহিলাৰ একাউণ্টত ১০ হাজাৰকৈ টকা প্ৰদান কৰাৰ প্ৰসংগ টানি আনি কয় যে আজি বিহাৰৰ পৰিস্থিতি কি সকলোৱে জানে ৷ মাৰ্চ মাহৰ দৰমহা দিবলৈ চৰকাৰৰ টকা নাই ৷ লোভ দি ভোট সংগ্ৰহ কৰা পৰম্পৰাৰ বিৰুদ্ধে ৰাইজে সেয়ে আঁতৰি থাকিব লাগে বুলিও কয় সিঙে ৷ তেওঁ অসমৰ জনতাক আহ্বান জনাই কয়, ”বিহাৰৰ পৰা মানুহে শিক্ষা ল’ব লাগে ৷ বিহাৰৰ দৰেই যদি অসমত হয় তেন্তে ইয়াৰো জনসাধৰণৰ অৱস্থা বেয়াৰ দিশে যাব ৷ মই নাভাবো যে অসমৰ মানুহ এনে জালত ভৰি দিব ৷’’
উল্লেখ্য যে আজিৰ সংবাদমেলত অসম প্ৰদেশ কংগ্ৰেছৰ মিডিয়া বিভাগৰ অধ্যক্ষ বেদব্ৰত বৰা, ছ’চিয়েল মিডিয়া বিভাগৰ অধ্যক্ষ ঋতুপৰ্ণ কোঁৱৰ আৰু মিডিয়া বিভাগৰ ৰাষ্ট্ৰীয় সমন্বয়ক অৰুণ ত্ৰিপাঠিয়েও অংশগ্ৰহণ কৰে।