তীব্ৰ গৰমে জুৰুলা কৰিছে মহাৰাষ্ট্ৰ (Maharashtra)। ৰাজ্যখনৰ বহু স্থানত তাপমাত্ৰা ৪৪ ডিগ্ৰী চেলচিয়াছলৈকে বৃদ্ধি পোৱাৰ লগতে একাধিক জিলাত তাপপ্ৰবাহৰ পৰিস্থিতি সৃষ্টি হৈছে।
এই পৰিস্থিতিত ভাৰতীয় বতৰ বিজ্ঞান বিভাগে(India Meteorological Department) সতর্কতা জাৰি কৰিছে।
ৰাজ্য প্ৰশাসনৰ তথ্য অনুসৰি, আকোলা(Akola) জিলাত তাপমাত্ৰা ৪৪ ডিগ্ৰী স্পৰ্শ কৰিছে। ইয়াৰ লগতে বিদৰ্ভ আৰু ৰত্নাগিৰি সহ ৰাজ্যখনৰ অধিকাংশ অঞ্চলত তাপমাত্ৰা ক্ৰমে বৃদ্ধি পাইছে।
স্বাস্থ্য বিভাগৰ তথ্য অনুসৰি, এক মাৰ্চৰ পৰা ১২ এপ্ৰিলৰ ভিতৰত ৰাজ্যখনত মুঠ ১৫ জন লোক হিটষ্ট্ৰোকত আক্ৰান্ত হৈছে। ইয়াৰ ভিতৰত ৰত্নাগিৰি(Ratnagiri) জিলাত ছয়জন , পালঘৰত দুজন আৰু পোনে, ৰায়গড়, নাছিক, নন্দুৰবৰ, জলগাঁও, জালনা আৰু গঢ়চিৰৌলিত একোজনকৈ লোক আক্ৰান্ত হোৱা বুলি জনোৱা হৈছে।
ইফালে, পোনে পৌৰ নিগমৰ তথ্য অনুসৰি, কেৱল এটা মাহতেই ৬০০ জনতকৈ অধিক লোক তীব্ৰ গৰমৰ ফলত অসুস্থ হৈ চিকিৎসালয়ত ভৰ্তি হৈছে।
কেৱল মাৰ্চ মাহতেই ১৯খন চিকিৎসালয় আৰু চিকিৎসা কেন্দ্ৰত ৬৫৪ জন ৰোগীয়ে চিকিৎসালয়ত ভৰ্তি হয়, যাৰ ভিতৰত ডিহাইড্ৰেছন, দুৰ্বলতা, এলাৰ্জি, পেশী সংকোচন আৰু মূৰ ঘূৰণিৰ দৰে সমস্যা অধিক দেখা যায়।
বতৰ বিজ্ঞান বিভাগে আগন্তুক দিনসমূহত তাপমাত্ৰা আৰু বৃদ্ধি পোৱাৰ সম্ভাৱনা প্ৰকাশ কৰিছে। ১৫ৰ পৰা ১৮ এপ্ৰিললৈ মহাৰাষ্ট্ৰৰ বহু অংশত, ১৬ৰ পৰা ১৮ এপ্ৰিললৈ মৰাঠৱাড়া, ১৫ৰ পৰা ১৯ এপ্ৰিললৈ বিদৰ্ভ(Vidarbha)আৰু ১৫ৰ পৰা ১৭ এপ্ৰিললৈ কোঙ্কন অঞ্চলত তাপমাত্ৰা বৃদ্ধি পাব বুলি সতৰ্ক কৰা হৈছে।
এই পৰিস্থিতিত জনসাধাৰণক অতি প্ৰয়োজনীয় নহ’লে বাহিৰলৈ নাযাবলৈ আৰু পৰ্যাপ্ত পানী গ্ৰহণসহ সাৱধানতা অৱলম্বন কৰিবলৈ আহ্বান জনাইছে প্ৰশাসনে।