SC Grants Anticipatory Bail To Pawan Khera In Assam:
দৈনিক অগ্ৰদূত ডিজিটেল ডেক্স:-গ্ৰেপ্তাৰৰ পৰা সাময়িক সকাহ কংগ্ৰেছ মুখপাত্ৰ পৱন খেড়াৰ ৷ শুকুৰবাৰে সৰ্বোচ্চ ন্যায়ালয়ে অগ্রিম জামিন প্ৰদান কৰিলে খেড়াক । অৱশ্যে এই জামিন প্ৰযোজ্য থাকিব পৰৱৰ্তী শুনানি পৰ্যন্ত I আদালতৰ ৰায়দানত স্পষ্ট কৰি দিয়া হয় যে পৱন খেড়াৰ বিৰুদ্ধে অসম আৰক্ষীৰ ক্ৰাইম বাঞ্চত চলি থকা গোচৰটোৰ সন্দৰ্ভত আৰক্ষীয়ে যেতিয়া বিচাৰে তেতিয়াই পৱন খেড়া হাজিৰ হ’ব লাগিব । একেদৰে আৰক্ষীক তদন্তৰ ক্ষেত্ৰত সম্পূৰ্ণ সহযোগিতা আগবঢ়াব লাগিব। আনহাতে কোনো কাৰণতে ভাৰত এৰি যাব নোৱাৰিব খেড়াই। ৷
উল্লেখ্য যে ,পৱন খেৰাৰ জামিন আৱেদনৰ শুনানি বৃহস্পতিবাৰে সম্পন্ন হয় সৰ্বোচ্চ ন্যায়ালয়ত ৷ পৱন খেৰাৰ অধিবক্তাই আদালতত উল্লেখ কৰে যে তেওঁক গ্ৰেপ্তাৰ কৰাটো প্ৰয়োজনীয় নহয় কাৰণ তেওঁ আইনৰ পৰা পলায়নৰ সম্ভাৱনা কম।
আনহাতে,উচচতম ন্যায়ালয়ে দুয়োপক্ষৰ শুনানি গ্ৰহণ কৰি কংগ্ৰেছ নেতা পৱন খেৰাৰ আগতীয়া জামিন আবেদন সন্দৰ্ভত নিজৰ ৰায়দান সংৰক্ষিত ৰাখে শুকুৰবাৰলৈকে ৷ খেৰা আৰু অসম চৰকাৰক প্ৰতিনিধিত্ব কৰা অধিবক্তাই আদালতত নিজৰ যুক্তি জোৰদাৰভাৱে দাখিল কৰে। এজন অধিবক্তাই খেৰাৰ বাবে আগতীয়া জামিন বিচাৰিছিল ৷ আনহাতে আনজনে বিৰোধিতা কৰিছিল। পৱন খেৰাক প্ৰতিনিধিত্ব কৰি অভিষেক মনু সিংভীয়ে মুখ্যমন্ত্ৰী হিমন্ত বিশ্ব শৰ্মাৰ “পেৰা” আৰু “পেলুংগা” বক্তব্যৰ উল্লেখ কৰে আদালতত ৷
অধিবক্তা গৰাকীয়ে আৰু উল্লেখ কৰে যে কোনো সাংবিধানিক দায়িত্বপ্ৰাপ্তই এনে ভাষা ব্যৱহাৰ কৰিব নোৱাৰে । তেওঁ লগতে কয় যে এই গোচৰত জিম্মাত জেৰাৰ প্ৰয়োজন নাই, আইনৰ পৰা আঁতৰি থকাৰ কোনো সম্ভাৱনাও নাই। আনহাতে অসম চৰকাৰৰ হৈ আদালতত উপস্থিত থকা তুষাৰ মেহতাই পৱন খেৰাৰ অন্তৱৰ্তীকালীন জামিনৰ তীব্ৰ বিৰোধীতা কৰে । অৱশেষত দুয়ো পক্ষৰ অধিবক্তা বক্তব্য শুনাৰ পিচত আদালতে সংৰক্ষিত ৰাখিলে নিজৰ ৰায় ৷
উল্লেখ্য যে কংগ্ৰেছৰ মুখপাত্ৰ পৱন খেৰাই সদ্য সমাপ্ত অসম বিধানসভা নিৰ্বাচনৰ প্ৰাকমুহূৰ্তত এক সংবাদমেল অনুষ্ঠিত কৰি মুখ্যমন্ত্ৰী ড:হিমন্ত বিশ্ব শৰ্মাৰ পত্নী ৰিণিকি ভূঞা শৰ্মাৰ বিৰুদ্ধে গুৰুতৰ অভিযোগ উদ্থাপন কৰি কৈছিল যে ভূঞা শৰ্মাৰ ইজিপ্ত,ইউএই সহ তিনিখন দেশৰ পাচপোৰ্ট আছে ৷
আনহাতে খেড়াৰ এই অভিযোগে নাকচ কৰি খেড়াৰ বিৰুদ্ধে গুৱাহাটী ক্ৰাইম বাঞ্চত ৰিণিকি ভূঞা শৰ্মাই গোচৰ ৰজু কৰে খেড়াৰ বিৰুদ্ধে । এই গোচৰৰ ভিত্তিত ক্ৰাইম বাঞ্চৰ এটা দলে খেড়াৰ দিল্লীস্থিত বাসগৃহত উপস্থিত হয় যদিও খেড়াক নাপাই তেওঁৰ বাসগৃহৰ পৰা জব্দ কৰে এটা লেপটপ সহ পেইন ডাইভ জব্দ কৰে ৷
ইপিনে খেড়াই হাইদৰাবাদত আত্মগোপন কৰি থকাৰ সম্ভেদ লাভ কৰি অসম আৰক্ষীৰ ক্ৰাইম বাঞ্চৰ দল হাইদৰাবাদত উপস্থিত হয় যদিও কোনো শুংসূত্ৰ উলিয়াবলৈ সক্ষম নহৈ উভতি আহে। এনে ঘটনাক্ৰমৰ মাজতে খেড়াই তেলেংগানা উচ্চ ন্যায়ালয়ৰ পৰা এসপ্তাহৰ অন্তৱৰ্তী জামিন লাভ কৰে ৷
আনহাতে খেড়াৰ এই জামিনৰ বিৰোধিতাৰে সৰ্বোচ্চ ন্যায়ালয়ৰ দ্বাৰস্থ হয় অসম চৰকাৰ। চৰকাৰৰ আৱেদনৰ ভিত্তিত আদালতে শুনানি লৈ তেলেংগানা উচ্চ ন্যায়ালয়ৰ এসপ্তাহৰ অন্তৱৰ্তী জামিনত স্থগিতাদেশ জাৰি কৰি খেড়াক জামিনৰ বাবে গুৱাহাটী উচ্চ ন্যায়ালয়ৰ কাষ চপাৰ নিৰ্দেশ দিয়ে ৷
সেই অনুসৰি খেড়াই জ্যেষ্ঠ অধিবক্তা কমল নয়ন চৌধুৰীৰ জৰিয়তে জামিনৰ বাবে গুৱাহাটী উচ্চ ন্যায়ালয়ৰ দ্বাৰস্থ হয় ৷ আদালতত খেড়াৰ হৈ কমল নয়ন চৌধুৰীৰ লগতে দিল্লীৰ পৰা ভাৰ্ছুৱেলি অভিষেক মনু সিংভীয়ে শুনানিত অংশ লয় আৰু অসম চৰকাৰৰ হৈ আদালতত যুক্তি দাঙি ধৰে অসমৰ মহাধিবক্তা দেৱজিৎ শইকীয়াই ৷ দুয়ো পক্ষৰ শুনানিৰ অন্তত আদালতে খেড়াৰ জামিন নাকচ কৰিছিল I