Meghalaya:
দৈনিক অগ্ৰদূত ডিজিটেল ডেস্ক:শ্বিলঙ কাণ্ডৰ উত্তেজনা শেহতীয়াকৈ কিছু স্বাভাৱিক হোৱাৰ পিছত মেঘালয়ত অব্যাহত আছে দুষ্কৃতিকাৰীৰ সন্ত্রাস ৷ মঙলবাৰে নিশা বকোৰ মেঘালয় সীমান্তৱৰ্তী লাম্পীৰ লাড জাৰেইনত দুৰ্বৃত্তই পেট্র’ল বোমা নিক্ষেপ কৰি জ্বলাই দিয়ে ‘শ্রী চিমেন্ট লিমিটেডৰ চাৰিচকীয়া বাহন এখন ৷ মুখত ক’লা কাপোৰ বান্ধি আহিছিল দুষ্কৃতিকাৰী কেইটা ৷ চিৰমেনস্থিত ‘শ্রী চিমেন্ট লিমিটেডৰ প্লাণ্টৰ পৰা খিলেৰিহাট অভিমুখী আছিল অগ্নিদগ্ধ বাহনখন ৷ আনহাতে ঘটনাৰ পিছতে ঘটনাস্থলীত মেঘালয় আৰক্ষী উপস্থিত হৈ দুৰ্বৃত্তৰ সন্ধানত অভিযান আৰম্ভ কৰিছে ৷
উল্লেখ্য যে চুবুৰীয়া ৰাজ্য খনৰ পূব জয়ন্তীয়া পাহাৰৰ চিৰমেনস্থিত’শ্রী চিমেন্ট’ প্রকল্প বাতিলৰ দাবীত আৰু প্ৰস্তাৱিত চূণশিল খনন প্রকল্পৰ বিৰুদ্ধে প্ৰতিবাদ কৰি আহিছে খাচি ছাত্ৰ সন্থা ৷
উল্লেখ কৰিব পাৰি যে খাচি ছাত্ৰ সন্থাই যোৱাটো সপ্তাহত শ্বিলঙত চৰকাৰৰ বিৰুদ্ধে ক’লা দিৱস উদযাপন কৰি ৰাজপথত বাইক ৰেলী উলিয়াই কোনো কথাৰ অৱতাৰণা নকৰি অসমৰ পৰ্যটন বাহন ভাঙি লণ্ড ভণ্ড কৰাৰ লগতে বহু কেইজন পৰ্যটকক শাৰীৰিক ভাৱে প্ৰহাৰ কৰিছিল ৷ যাৰ ফলস্বৰূপে পৰৱৰ্তী সময়ত মেঘালয়ৰ বিৰুদ্ধে যোৰাবাটত অৰ্থনৈতিক অৱৰোধ কাৰ্যসূচী ৰূপায়ণ কৰিছিল অসম ৰাজ্যিক চালক সন্থাই সহ বিভিন্ন দল-সংগঠনে ৷ অৱশ্যে সংগঠন কেইটাৰ আন্দোলনৰ মাজতে অসম আৰু মেঘালয় চৰকাৰৰ তৎপৰতাত এক আলোচনা মৰ্মে দুয়ো ৰাজ্যলৈ পুনৰ আহযাহ আৰম্ভ হৈছে পৰ্যটন বাহনৰ ৷
