ATDC Scam:
দৈনিক অগ্ৰদূত ডিজিটেল ডেস্ক:তথাকথিত সাক্ষাৎকাৰ ব্যৱস্থাৰে তথা সম্পূর্ণ বেআইনীভাবে ২০১০-১২ত অসম পর্যটন উন্নয়ন নিগমত পর্যটন বিষয়াৰ আঠটা পদ পূৰণ কৰা হৈছিল। এই উল্লেখৰে মুখ্যমন্ত্ৰীৰ তদাৰকী শাখাই বৃহস্পতিবাৰে উক্ত নিযুক্তি কেলেংকাৰিক লৈ বিশেষ আদালতত দাখিল কৰে বৃহৎ অভিযোগনামা। আঠ হেজাৰ পৃষ্ঠাৰ এই অভিযোগ নামাত নিযুক্তি কেলেংকাৰিক লৈ তদানীন্তন সঞ্চালক মনালিছা গোস্বামীৰ লগতে নিযুক্তিপ্রাপ্ত আঠজন বিষয়াক অভিযুক্ত কৰা হৈছে।
অভিযোগনামাৰ পাতে পাতে সন্নিৱিষ্ট হৈছে নিযুক্তিৰ নামত চলা প্রহসনৰ তথ্য। এই তথ্যতে উল্লেখ হৈছে যে নির্দিষ্ট প্রার্থীসকলৰ নিযুক্তি নিশ্চিত কৰিবলৈ সমস্ত দায়িত্ব সঞ্চালিকা মনালিছা গোস্বামীয়ে লৈছিল। সেইবাবে নিযুক্তিৰ সকলো নীতি-নিয়মক অংগুষ্ঠ দেখুৱাই গোস্বামীয়ে নিজেই একাধিক পদৰ দায়িত্ব চম্ভালিছিল।
উল্লেখ্য যে কংগ্ৰেছ চৰকাৰৰ আমোলত এই কেলেংকাৰি সংঘটিত হৈছিল। অভিযোগ অনুসৰি উৎকোচৰ ধনৰ নদী বোৱাই আৰু ৰাজনৈতিক প্রভাৱৰে সংশ্লিষ্ট প্রার্থীকেইজনে এই নিযুক্তি লাভ কৰিবলৈ সক্ষম হৈছিল। তেনে ৰাজনৈতিক প্রভাৱৰ বাবেই কেলেংকাৰিত লিপ্ত থকাৰ পাছতো পাঁচজন পর্যটন বিষয়াৰ বিৰুদ্ধে আজিলৈকে তদন্তকাৰী দলে কোনো ব্যৱস্থা গ্রহণ কৰিব নোৱাৰিলে। অথচ একে অভিযোগতে তিনিজনক গ্ৰেপ্তাৰ কৰা হয়। ধৃত বিষয়া কেইজন হ’ল প্ৰাঞ্জল বৰা, অনন্যা বৰঠাকুৰ আৰু নয়নমণি পামেগাম।
ইয়াৰ বিপৰীতে কেৱল সোধপোছ কৰিয়েই তদন্তকাৰী দলে দায়িত্ব সামৰা পাঁচজন অভিযুক্ত হ’ল হিৰণ শইকীয়া, মাধৱ দাস, গৌতম গগৈ, ছেইমীন মান্নান আৰু মেহজুবিন বেগম। অভিযোগ অনুসৰি বিভিন্ন ৰাজনীতিককে ধৰি প্রভাৱশালী পক্ষৰ হস্তক্ষেপত এই কেইজনে আজিও সুৰক্ষা লাভ কৰি থাকিবলৈ সক্ষম হৈছে। শেহতীয়াকৈ তদাৰীক শাখাই সংশ্লিষ্ট পাঁচজনৰ বিৰুদ্ধে ব্যৱস্থা গ্রহণ কৰাত অনুমতি বিচাৰি মুখ্যমন্ত্ৰীক আবেদন দাখিল কৰিছে। এই আবেদনত সংশ্লিষ্ট বিষয়াকেইজন কি ধৰণৰ নিযুক্তি কেলেংকাৰিত লিপ্ত হৈ আছে সেই তথ্য উল্লেখ কৰা হৈছে।
অভিযোগনামাত এই উল্লেখো কৰা হৈছে যে মৌখিক পৰীক্ষাৰ সময়তো তদানীন্তন সঞ্চালক গৰাকীয়ে নিয়ম উলংঘা কৰি পৰীক্ষা নিয়ন্ত্ৰকৰ পদটোৱেই পূৰণ নকৰিলে। তাৰ পৰিৱৰ্তে নিজেই সর্বেসর্বা হৈ পৰে। এই ক্ষমতাবে সঞ্চালক গৰাকীয়ে নির্দিষ্ট প্রার্থীসকলৰ একাংশৰ নম্বৰ বৃদ্ধি কৰে। উদাহৰণস্বৰূপে অনন্যা বৰঠাকুৰে মৌখিকত লাভ কৰা নম্বৰ পৰিমাণ আছিল ১৪। অথচ তেওঁৰ সেই নম্বৰ কাটি ১৮ কৰা হৈছিল। আন এঠাইত বৰঠাকুৰে লাভ কৰিছিল পাঁচ নম্বৰ। সেই নম্বৰটো কাটি সাত নম্বৰ কৰা হৈছিল।
এনেদৰে প্ৰতিজন প্রার্থীৰ ক্ষেত্ৰত নম্বৰ বৃদ্ধি কৰি নিযুক্তি লাভৰ পথ প্রশস্ত কৰা হৈছিল। উল্লেখ্য যে এই কেলেংকাৰিৰ তদন্ত তদাৰীক শাখাটোৱে ২০২৫ত আৰম্ভ কৰিছিল। অভিযুক্তসকলকে ধৰি অসম পর্যটন উন্নয়ন নিগমৰ কাৰ্যালয়ৰ কে’বাজনো বিষয়া-কর্মচাৰীক তদন্তকালত সোধপোছ কৰা হয়। তদুপৰি নিগমৰ কার্যালয়তো তালাচী অভিযান চলিছিল।
