Heroin seized in Guwahati:
দৈনিক অগ্ৰদূত ডিজিটেল ডেস্ক:সৰিয়হৰ ডুলিতে ভূত৷ এই আপ্তবাক্যশাৰী প্ৰযোজ্য হৈছে অসম আৰক্ষীৰ এজন লেন্স নায়কৰ ক্ষেত্ৰত ৷ ড্ৰাগছৰ চোৰাং ব্যৱসায়ত অসম আৰক্ষীৰ একাংশ লোক জড়িত থকাৰ তথ্য শুকুৰবাৰে পুনৰ পোহৰলৈ আহে।
আৰক্ষীৰ বিশেষ টাস্ক ফ’র্চ (এছটিএফ)ৰ দলে যোৱা নিশা মহানগৰীৰ বেহাৰবাৰীত অভিযান চলাই বৃহৎ পৰিমাণৰ মাদক দ্রব্যসহ তিনি সৰবৰাহকাৰীক গ্ৰেপ্তাৰ কৰে। ইয়াৰ ভিতৰৰ দুগৰাকী হ’ল মহিলা। ধৃত আনজন হ’ল অসম আৰক্ষীৰ লেন্স নায়ক। এছটিএফে বশিষ্ঠ আৰক্ষী থানাৰ অধীনৰ বেহাৰবাৰীৰ সোণকোচি পথত এএছ-০১ ইএল-৭৭৫৬ নম্বৰৰ এখন বাহন আগচি ধৰি তালাচী চলায়। এই তালাচীত বাহনখনৰ ভিতৰৰ পৰা ৩৭ টা চাবোনৰ বাকচত ভৰাই থোৱা অৱস্থাত ৩৯৭ গ্রাম হেৰ’ইন জব্দ কৰে। জব্দ কৰা হেৰ’ইনখিনিৰ বজাৰ মূল্য হৈছে কমেও তিনি কোটি ৫০ লাখ টকা হ’ব, এছটিএফৰ তথ্যত প্রকাশ।
এই বৃহৎ পৰিমাণৰ ড্ৰাগছৰ লগতে সৰবৰাহত জড়িত থকা কাছাৰৰ বাসিন্দা তথা লেন্স নায়ক কিৰণ সিংহৰ লগতে মণিপুৰৰ পূব ইম্ফলৰ এছ নেংপি ভাইফেই আৰু চূড়াচান্দপুৰৰ গেইনেছং নামৰ দুগৰাকী মহিলাক গ্ৰেপ্তাৰ কৰা হয়। দুয়োগৰাকীয়ে ছাইৰাং এক্সপ্ৰেছ ৰেলখনৰে এই ড্ৰাগছখিনি গুৱাহাটীলৈ কঢ়িয়াই আনিছিল।
উল্লেখ্য যে লেন্স নায়ক কিৰণ ইয়াৰ পূৰ্বেও ড্ৰাগছৰ ব্যৱসায়ত জড়িত থকাৰ অভিযোগত দিছপুৰ আৰক্ষী থানাত ৰুজু হৈ থকা ৭৭৩/২০২৫ নম্বৰৰ এটা গোচৰত গ্ৰেপ্তাৰ হৈছিল।
