APCC:
দৈনিক অগ্ৰদূত ডিজিটেল ডেস্ক:অৱশেষত মধুচন্দ্ৰিকা অন্ত পৰিল কংগ্ৰেছ-ৰাইজৰ দলৰ। এপিচিচিৰ সভাপতি গৌৰৱ গগৈৰ নিৰ্দেশত বৃহস্পতিবাৰে মিত্ৰতা ভংগৰ আনুষ্ঠানিক ঘোষণা কৰে এপিচিচিৰ সাধাৰণ সম্পাদক ( সাংগাঠনিক) ৰামান্না বৰুৱাই ৷
এপিচিচিৰ সাধাৰণ সম্পাদক ( সাংগাঠনিক) গৰাকীৰ স্বাক্ষৰ সম্বলিত নিৰ্দেশনা পত্ৰ খনত উল্লেখ কৰা হৈছে যে বিগত লোকসভা আৰু বিধানসভা নিৰ্বাচনৰ প্ৰাকমুহূৰ্তত সাম্প্ৰদায়িক শক্তিক প্ৰতিহত কৰাৰ বাবে ঐক্যবদ্ধ ভাৱে যুঁজ দিয়াৰ লক্ষ্যৰে কংগ্ৰেছে ৰাইজৰ দল৷,অজাপ, বাওঁপন্থী দল সহ আন কে’বাটাও আঞ্চলিক দলৰ স’তে একত্ৰিত হৈ মিত্ৰজোঁট গঠন কৰা হৈছিল৷ কিন্ত শেহতীয়াকৈ বিধানসভা নিৰ্বাচনৰ ফলাফল ওলোৱা পিছৰে পৰা বিশেষকৈ যোৱা কিছুদিন ধৰি ৰাইজৰ দলৰ নেতৃত্বত মিত্ৰতা ধৰ্ম জ্বলাঞ্জলি দি মিত্ৰজোঁটৰ নীতিনিয়ম আৰু মৰ্যাদা উলংঘা কৰি কংগ্ৰেছ দলৰ বিৰুদ্ধে অহৰহ ভুৱা প্ৰচাৰ আৰু চৰিত্ৰহননৰ দৰে নিকৃষ্ট ৰাজনীতিত লিপ্ত হৈ পৰে ৷
একেদৰে সমান্তৰালভাৱে মিত্ৰ দলৰ আন আন দলকো টাৰ্গেট কৰি ৰাইজৰ দলৰ শীৰ্ষ নেতৃত্বই বিভিন্ন ভিত্তিহীন, অনাকাংক্ষিত আৰু অসন্মানজনক মন্তব্য প্ৰদান কৰি মিত্ৰতাৰ মৌলিক আচাৰ-নীতিক বাৰেপতি আঘাত হানিছে বুলি উল্লেখ কৰে কংগ্ৰেছ।
যাৰ পৰিপ্ৰেক্ষিতত ৰাইজৰ দলৰ স’তে ভৱিষ্যতে ৰাজনৈতিক সম্পৰ্ক বাহাল ৰখাটো আৰু কোনোপধ্যেই সম্ভৱপৰ নহয় বুলি কংগ্ৰেছে অনুভৱ কৰি মিত্ৰতা ভংগৰ সিদ্ধান্ত লয়।
আনহাতে ৰাইজৰ দলৰে মিত্ৰতা ভংগ হ’লেও ভাৰতীয় জাতীয় কংগ্ৰেছে নিজৰ লক্ষ্যত অটল থাকি সৰ্ব সাধাৰণ ৰাইজৰ জলন্ত সমস্যা সমূহ সাজোৰে উদ্থাপিত কৰি যাব৷ একেদৰে বৰ্তমান দিছপুৰৰ শাসনৰ গাদীত থকা বিজেপি নেতৃত্বাধীন চৰকাৰ খনৰ জনবিৰোধী কাম- কাজৰ বিৰুদ্ধে জবাবদিহি কৰি যাব কংগ্ৰেছে ৷
ইপিনে মিত্ৰতাৰ ভংগ পিছত প্ৰথম প্ৰতিক্ৰিয়া প্ৰকাশ কৰি বিৰোধী দলপতি ৱাজেদ আলী চৌধুৰীয়ে কয় ,মিত্ৰতাৰ ধৰ্ম পাহৰি তুচ্ছ-তাচ্ছিল্য কৰাৰ ৰাইজৰ দলৰ সৈতে মিত্ৰতা ভংগ কৰিলে কংগ্ৰেছে। ঘৰৰ ভিতৰত থাকি ৰাইজৰ দলে শত্ৰুতা কৰাতকৈ বাহিৰত থাকিয়ে শত্ৰুতা কৰক। সেইকাৰণে আজিৰে পৰা আনুষ্ঠানিকভাৱে মিত্ৰতাৰ সকলো সম্পৰ্ক ছেদ হ’ল ৰাইজৰ দলৰে।
উল্লেখ্য যে যোৱা পূব অসমত হৈ যোৱা প্ৰলয়ংকৰী বান পৰিস্থিতিৰ পিছৰে পৰা ৰাইজৰ দলৰ সভাপতি অখিল গগৈয়ে গৌৰৱ গগৈ আৰু কংগ্ৰেছ দলৰ বিৰুদ্ধে বিভিন্ন কটু মন্তব্য কৰি আহিছিল ৷
