Heinous murder in Rangia:ৰাজ্যত আৰু এক জঘন্য হত্যাকাণ্ড

দৈনিক অগ্ৰদূত ডিজিটেল ডেস্ক: জঘন্য হত্যাকাণ্ডই সঘনে জোঁকাৰিবলৈ ধৰিছে ৰাজ্যক। আন যুৱকৰ স’তে গোপন সম্পর্ক থকাৰ মাথোঁ সন্দেহৰ আধাৰতে ৰৌতাৰ এজন যুৱকে যোৱা নিশা ৰঙিয়াৰ এখন হোটেলত ১৯ বছৰীয়া প্রেমিকাক পৰিকল্পিতভাৱে হত্যা কৰে। ইতিমধ্যে অভিযুক্তজন জালত পৰিছে। তেওঁ প্রেমিকাক কিয় হত্যা কৰিলে তাৰ অজুহাতে দিছে। এই নাৰকীয় কাণ্ডৰ অভিযুক্তজন হ’ল ওদালগুৰি জিলাৰ ৰৌতাৰ অভিজিৎ কিণ্ডু। হোটেলৰ কোঠাত প্রেমিকাক কেঁচী আৰু স্ক্রুড্ৰাইভাৰৰে হানি-খুঁচি হত্যা কৰা বুলি অভিযুক্তজনে প্রকাশ কৰিছে। প্রেমিকাক হত্যাৰ উদ্দেশ্যে তেওঁ কালি ৰঙিয়াত উপস্থিত হৈছিল বুলিও প্রকাশ কৰিছে।

লক্ষ্যণীয়ভাৱে প্রেমিকাক হত্যা কৰাৰ পাছতো যুৱকজনৰ মুখমণ্ডলত অনুশোচনাৰ বিন্দুমাত্ৰ ৰেশ ফুটি উঠা নাই। হানি-খুঁচি প্রেমিকাক হত্যা কৰাৰ পাছত অভিযুক্তজনে ঘটনাক আন ৰূপ দিয়াৰ উদ্দেশ্যে নিজৰ ডিঙিত ৰেপ দিয়াৰ লগতে হোটেলৰ কোঠাত থকা কম্বলৰে চিলিং ফেনত চিপ লোৱাৰ ভংগিমাও লৈছিল বুলি আৰক্ষী সূত্রই জনায়। অৱশ্যে জালত পৰাৰ পাছত তেওঁ প্রেমিকাক হত্যা কৰাৰ কথা প্রকাশ কৰে।

প্রেমিকাক পৰিকল্পিতভাৱে হত্যা কৰাৰ পাছত দুর্ধর্ষ অপৰাধীৰ দৰে আচৰণ কৰি অভিজিতে এই নাৰকীয় কাণ্ড সংঘটিত কৰাৰ অজুহাত দিয়াৰো চেষ্টা কৰে। তেওঁৰ বৰ্বৰতাৰ বলি হোৱা যুৱতীগৰাকী হ’ল শোণিতপুৰ জিলাৰ ঢেকিয়াজুলিৰ ৰাক্ষসমাৰীৰ অসুৰমাৰীৰ হাবিল গুড়িয়াৰ কন্যা মালানী গুড়িয়া (১৯)। পঢ়া-শুনাত ভাল ফলাফল প্রদর্শন কৰিছিল যদিও পৰিয়ালৰ দৰিদ্ৰতাৰ হেতু মালানীয়ে জীৱিকাৰ সন্ধানত সুদূৰ চেন্নাইলৈ গৈছিল। উদ্দেশ্য আছিল দৰিদ্ৰ পিতৃক আর্থিক সকাহ দিয়া।

সূত্রই জনোৱা মতে, চেন্নাইলৈ যোৱাৰ পাছতে মালানীয়ে অভিজিতৰ স’তে প্ৰেমৰ সম্পর্ক গঢ়ি তোলে। কিন্তু এই সম্পর্কই যে কাল হ’ব সেয়া তেওঁ সপোনতো ভাবিব পৰা নাছিল। জালত পৰাৰ পাছত অনুশোচনাহীন অভিজিতে কয়, ‘তাই আন যুৱকৰ স’তে গোপন সম্পৰ্ক ৰাখি মোক মিছা কৈ আহিছিল। তাইক হত্যা কৰিবলৈয়ে ইয়ালৈ (ৰঙিয়া) আহিছিলো। মোক তাই ঠগি আছিল। মিছা নকওঁ, মই নিজে তাইক হত্যা কৰিছো। মই প্লেন (পৰিকল্পনা) কৰি সিহঁতক হোটেলত ব্যৱস্থা কৰি দিছিলো। তাই আগৰ পৰাই আন যুৱকৰ লগত কথা পাতি আছিল।’ প্রেমিকাক হত্যাৰ উদ্দেশ্যেই ঘৰৰ পৰাই কেঁচী আৰু স্ক্রুড্ৰাইভাৰ লগত লৈ অহা বুলিও অভিযুক্তজনে প্রকাশ কৰে। কেনেদৰে অভিজিতে সংঘটিত কৰিলে নাৰকীয় কাণ্ডপূর্ব পৰিকল্পনা অনুসৰি কালি সন্ধিয়া ধৃত অভিজিৎ ৰঙিয়াত উপস্থিত হয়।

পাছত সন্ধিয়া ছয় বজাত তেওঁ ৰঙিয়াৰ ৰেল ষ্টেছনৰ ওচৰৰ অতিথি হোটেলখনৰ দুটা কোঠা (নম্বৰ ১১০ আৰু ১১১) বুক কৰে। ইয়াৰে এটা তেওঁ নিজে থাকিবলৈ আৰু আনটো চেন্নাইৰ পৰা ৰেলত আহি থকা তেওঁৰ তিনি বান্ধৱী থাকিব বুলি হোটেল কর্তৃপক্ষক জনায়। সেই অনুসৰি নিশা ৰঙিয়া ৰেল ষ্টেছনত উপস্থিত হয় দুগৰাকী বান্ধৱীসহ মালানী। পাছত নিশা ১০ বজাত তিনিও অতিথি হোটেলত উপস্থিত হৈ অভিজিতে বুক কৰি ৰখা কোঠালৈ গমন কৰে। অভিজিতে ১১১ নম্বৰ আৰু মালানীসহ যুৱতী তিনিগৰাকীয়ে ১১০ নম্বৰ কোঠাত আশ্রয় লয়। এনেদৰে হত্যাৰ পৰিকল্পনা কৰি মালানীক ৰঙিয়ালৈ আনে অভিযুক্তজনে।

যোৱা নিশা মালানীৰ স’তে একেলগে অতিথি হোটেলৰ ১১১ নম্বৰ কোঠাত আশ্রয় লোৱা যুৱতী দুগৰাকীয়ে আজি যোৱা নিশাৰ পৰিস্থিতি সম্পর্কে প্রকাশ কৰে। যুৱতী দুগৰাকীৰ ভাষ্য অনুসৰি নিশা তিনিও শুই আছিল। তেনে অৱস্থাতে অভিজিতে তেওঁলোকক বাহিৰৰ পৰা জগাই মালানীক নিজৰ কোঠালৈ লৈ যায়। তেওঁৰ লগতে তেওঁৰ মোনাখনো লৈ যায়। মোনাখন নিয়া সন্দৰ্ভত মালানীৰ বান্ধৱী দুগৰাকীয়ে প্ৰশ্ন কৰাত প্রয়োজন থকা বুলি কয়। অৱশ্যে তাৰ পাছত অভিজিতৰ কোঠাত কি সংঘটিত হ’ল সেয়া একো নাজানে বুলিও দুয়োয়ে কয়।

আনহাতে, আজি নিচেই পুৱা মালানীৰ বান্ধৱী দুগৰাকীয়ে হোটেলৰ পৰা নিজ নিজ ঘৰলৈ যাবলৈ লওতে হোটেল কর্তৃপক্ষই মালানীৰ কথা সোধাত তেওঁলোকে নিশাৰ কথা বৰ্ণনা কৰাৰ উপৰি এক চাঞ্চল্যকৰ ভাষ্য দিয়ে। দুয়ো হোটেল কর্তৃপক্ষক কয়, ‘মালানীলৈ আমি ফোন কৰাত তেওঁৰ পৰিৱৰ্তে অভিজিতে ফোন উঠায়।’ যুৱতী দুগৰাকীৰ এই ভাষ্য শুনি হোটেল কর্তৃপক্ষই অভিজিতৰ কোঠাৰ দৰ্জাত টুকুৰিয়াত আৰক্ষী নাহিলে দুৱাৰ নোখোলে বুলি জনায়। লগে লগে হোটেল কর্তৃপক্ষই আৰক্ষীক খবৰ দিয়ে। সেই মর্মে আৰক্ষী ঘটনাস্থলীত উপস্থিত হৈ অভিজিতক কৰায়ত্ত কৰাৰ লগতে মৃতদেহ উদ্ধাৰ কৰি মৰণোত্তৰ পৰীক্ষাৰ বাবে গুৱাহাটীলৈ প্ৰেৰণ কৰে। আনহাতে, মালানীৰ বান্ধৱী দুগৰাকীৰ ভাষ্য গ্রহণ কৰি আৰক্ষীয়ে তেওঁলোকক ঘৰলৈ যাবলৈ দিয়ে।

ইতিমধ্যে মালানীৰ পৰিয়ালৰ লোক ৰঙিয়াত উপস্থিত হৈছে। মৰণোত্তৰ পৰীক্ষাৰ পাছত আৰক্ষীয়ে মৃতদেহ পৰিয়ালক হস্তান্তৰ কৰিব বুলি সূত্রই জনায়। স্বাভাৱিকতে ঘটনাটোৱে অসুৰমাৰীত শোকৰ ছাঁ পেলাইছে। সূত্ৰই জনোৱা মতে অভিজিৎ আৰু মালানীৰ প্ৰেমৰ সম্পৰ্কৰ কথা তেওঁলোকৰ দুয়ো পৰিয়ালে জানিছিল। প্রেমিকাক হত্যা কৰাৰ পাছতো তেওঁৰ মাতৃয়ে অভিযুক্তজনলৈ ফোন কৰি আছিল যদিও আৰক্ষীৰ নিৰ্দেশত তেওঁ ফোন ৰিচিভ কৰাৰ পৰা বিৰত থাকে।

একমাত্র সন্দেহৰ ভিত্তিত প্রেমিকাক হত্যা কৰাৰ অভিযোগত গ্ৰেপ্তাৰ হোৱা অভিজিতক আৰক্ষীয়ে ৰঙিয়া মহকুমা ন্যায়িক দণ্ডাধীশৰ আদালতত হাজিৰ কৰায়। আদালতে তেওঁক দুদিনৰ বাবে আৰক্ষীৰ জিম্মালৈ প্ৰেৰণ কৰে।