Himanta viswa sarma Govt: ২৮,৫২১ বিঘা কৃষিভূমিৰ শ্ৰেণী পৰিৱৰ্তন
ড:শৰ্মা চৰকাৰৰ প্ৰথম পাঁচ বছৰীয়া কাৰ্যকালৰ পৰিসংখ্যা
নিশাৰ ভিতৰতে হেজাৰ হেজাৰ বিঘা কৃষিভূমি ঔদ্যোগিক শ্ৰেণীলৈ পৰিৱৰ্তন
অধিক প্ৰস্তাৱৰ দীঘলীয়া তালিকা
দৈনিক অগ্ৰদূত ডিজিটেল ডেস্ক:ৰাজ্যৰ দুখীয়া কৃষকৰ উপাৰ্জন দুগুণ কৰাৰ সপোন দেখুওৱা ড: হিমন্ত বিশ্ব শর্মা নেতৃত্বাধীন চৰকাৰে নিশাটোৰ ভিতৰতে হেজাৰ হেজাৰ বিঘা কৃষিভূমিৰ শ্ৰেণী পৰিৱৰ্তন অব্যাহত ৰাখিছে। দুখীয়া কৃষকৰ ভূমি অতি ক্ষিপ্ৰতাৰে তুলি দিয়া হৈছে বৃহৎ ব্যৱসায়িক গোষ্ঠীৰ হাতত।
অভিযোগ অনুসৰি ইয়াৰ বিনিময়ত কৃষকসকলে পর্যাপ্ত মূল্য লাভ কৰা নাই। কৃষকৰ আৰ্থিক দুৰ্বলতাৰ সুযোগ লৈ পুঁজিপতি গোষ্ঠীয়ে বিঘাই বিঘাই কৃষিভূমি ক্রয় কৰিছে আৰু সেইবোৰ নানান অজুহাত দি চৰকাৰৰ পৃষ্ঠপোষকতাত ঔদ্যোগিক শ্রেণীলৈ পৰিবৰ্তন কৰা হৈছে। চর্চা অনুসৰি বহিঃৰাজ্যৰ পুঁজিপতি গোষ্ঠীৰ স্বাৰ্থতে কৃষি অর্থনীতি নিৰ্ভৰশীল অসমৰ ভূমিৰ এই ব্যাপক শ্রেণী পৰিৱৰ্তন চৰকাৰেক্ষিপ্ৰতাৰে অব্যাহত ৰাখিছে।
অসম চৰকাৰৰ শেহতীয়া তথ্য অনুসৰি ড° শৰ্মা চৰকাৰৰ কাৰ্যকালৰ প্ৰথম পাঁচ বছৰীয়া কার্যকালত অর্থাৎ ২০২১ৰ পৰা ২০২৫লৈ মুঠ ২৮,৫২১ বিঘা কৃষিভূমিৰ শ্ৰেণী পৰিৱৰ্তন কৰা হয়। মুঠ ২৬খন জিলাত এই পৰিৱৰ্তন কৰা হয়। জিলাবোৰৰ ভিতৰত সৰ্বাধিক পৰিমাণৰ কৃষিভূমিৰ শ্ৰেণী পৰিৱৰ্তন কৰা হয় কামৰূপত। জিলাখনৰ ৩,৫০৯ বিঘা ভূমি অনাকৃষি কার্যত ব্যৱহাৰৰ বাবে শ্ৰেণী পৰিৱৰ্তন কৰা হয়। ইয়াৰ পাছতে ২,২৮১ বিঘা ভূমিৰ শ্ৰেণী পৰিৱৰ্তন কৰা হয় যোৰহাট জিলাত।
তেনেদৰে গোলাঘাটত ১,৮০৮ বিঘা, বৰপেটাত ১,০৬৪ বিঘা, দৰঙত ১,৭১২ বিঘা, ডিব্রুগড়ত ১,৬৮১ বিঘা, কামৰূপ মহানগৰত ১,২৪৮ বিঘা, লখিমপুৰত ১,১৯০ বিঘা, মৰিগাঁৱত ১,৫৪০বিঘা, নগাঁৱত ১,৫১৭ বিঘা, নলবাৰীত ১,৬৩০ বিঘা, শিৱসাগৰত ১,২৮৫ বিঘা, শোণিতপুৰত ১,৫৬৮ বিঘা আৰু তিনিচুকীয়াত ১,১৩৫ বিঘা ভূমিৰ শ্ৰেণী পৰিৱৰ্তন কৰা হয়। একেদৰে বিশ্বনাথত ৬৬৯ বিঘা, বজালীত ৪২৮ বিঘা, বঙাইগাঁৱত ৪৯৬ বিঘা, চৰাইদেউত ৪০৮ বিঘা, কাছাৰত ৩১৮ বিঘা, ধেমাজিত ৭০১ বিঘা, ধুবুৰীত ৭০৩ বিঘা, গোৱালপাৰাত ৬৮২ বিঘা, হোজাইত ৫৯৩ বিঘা, মাজুলীত ২০৪ বিঘা আৰু শ্রীভূমি জিলাত ১৩০ বিঘা কৃষিভূমি অনাকৃষি কাৰ্যত ব্যৱহাৰৰ বাবে শ্ৰেণী পৰিৱৰ্তন কৰা হয়।
উল্লেখ্য যে অসমত কৃষি উৎপাদন বৃদ্ধিত চৰকাৰে গুৰুত্ব দিয়া বুলি দাবী কৰি আহিছে। সেয়েহে কৃষিভূমিৰ পৰিমাণ বৃদ্ধি কৰা, কৃষিভূমিক অধিক উৎপাদনক্ষম কৰি তোলাৰ নীতি কৃষি বিভাগে গ্ৰহণ কৰিছে; কিন্তু চৰকাৰেই নিজৰ নীতিৰ স্ববিৰোধিতা স্পষ্ট কৰি হেজাৰ হেজাৰ বিঘা কৃষিভূমিৰ শ্ৰেণী পৰিৱৰ্তন সাধন কৰিছে। প্ৰসংগক্রমে উল্লেখ্য যে অসমৰ মুঠ কৃষিভূমিৰ পৰিমাণ ২৭,৫৮,৭৫৭ বিঘা।
দিছপুৰৰ উচ্চস্তৰীয় সূত্ৰই সদৰী কৰা অনুসৰি, কৃষিভূমিৰ শ্ৰেণী পৰিৱৰ্তনৰ প্ৰস্তাৱৰ দীঘলীয়া তালিকা বৰ্তমান চৰকাৰৰ ঘৰত মজুত আছে। বিভিন্ন স্তৰত বিবেচনাধীন হৈ আছে এই প্ৰস্তাৱ। এই প্ৰস্তাৱসমূহে অনুমোদন লাভ কৰিলেই আৰু কে’বাহেজাৰ বিঘা কৃষিভূমি অতি শীঘ্ৰে অনাকৃষিভূমিলৈ পৰিৱৰ্তন হ’ব।
প্রসংগক্রমে উল্লেখ্য যে কোনো ধৰণৰ প্ৰতিক্ৰিয়াক গুৰুত্ব নিদিয়াকৈ শেহতীয়াকৈ অসম চৰকাৰে ২২খন সংৰক্ষিত বনাঞ্চল আৰু বন্যপ্রাণী অভয়াৰণ্যৰ ২৩৯ হেক্টৰৰো অধিক ভূমিৰ শ্ৰেণী পৰিৱৰ্তন সম্পন্ন কৰিছে। চৰকাৰৰ বন, পৰিৱেশ আৰু জলবায়ু পৰিৱৰ্তন বিভাগে শেহতীয়াকৈ এই সম্পর্কত জাননী জাৰি কৰিছে। আগন্তুক দিনত সংৰক্ষিত বনাঞ্চলৰ আৰু অধিক ভূমি ঔদ্যোগিক আৰু আন্তঃগাঁথনি নিৰ্মাণৰ কামত শ্ৰেণী পৰিৱৰ্তন কৰাটোও অৱধাৰিত হৈছে। সমান্তৰালভাৱে অব্যাহত ৰাখিছে কৃষিভূমিৰ শ্ৰেণী পৰিৱৰ্তন প্ৰক্ৰিয়াও।
ADVERTISEMENT