Kamakhya Train Station:
দৈনিক অগ্ৰদূত ডিজিটেল ডেস্ক:অভাৱনীয় চুৰি কার্য সংঘটিত হৈছে গুৱাহাটীত। এই ঘটনাত চোৰৰ দলে সাতখনকৈ ট্রাকৰে পাঁচদিনৰ ভিতৰত কামাখ্যা ৰেল জংছনৰ পৰা চুৰি কৰি নিয়ে বৃহৎ পৰিমাণৰ এলুমিনিয়াম তাঁৰ। জংছনটোৰ নিৰ্মাণ কাৰ্যৰ বাবে মজুত কৰি ৰখা এই তাঁৰ চুৰিৰ ঘটনা অসম আৰক্ষী অথবা ৰেল আৰক্ষীয়ে কোনেও গমেই নাপালে।
পাছত চুৰিৰ বিষয়টো দৃষ্টিগোচৰ হোৱাত ৰেল বিভাগে ৰেল আৰক্ষী আৰু অসম আৰক্ষীক ঘটনাটো অৱগত কৰি এজাহাৰ দাখিল কৰে। ইয়াৰ ভিত্তিত অনুসন্ধান চলাই ৰেল আৰক্ষীয়ে হাজোৰ জাপিয়া আৰু ঢেকিয়াজুলিৰ পৰা চুৰি সামগ্ৰীৰ এটা অংশ কালিৰ পৰা চলোৱা অভিযানত উদ্ধাৰ কৰে। তদুপৰি গ্ৰেপ্তাৰ কৰে ১১ জন অভিযুক্তক।
এতিয়াও কে’বাজনো অভিযুক্ত পলাতক অৱস্থাত আছে। বিশেষকৈ চিচিটিভিৰ কেমেৰাত আবদ্ধ হোৱা তথ্যই এই তদন্তত যথেষ্ট সহায় কৰে। এই চুৰি কাৰ্যত কে’বাজনো ঠিকাদাৰ জড়িত থকাৰ তথ্য উদ্ধাৰ হৈছে। অনুসন্ধানত উদ্ধাৰ হোৱা তথ্য অনুসৰি যোৱা সাত, ১০, ১৮, ২৫ আৰু ২৯ আগষ্টত এলুমিনিয়াম তাঁৰবোৰ চুৰি কৰা হৈছিল। চুৰি তাঁৰ পৰিবহণ কৰা ট্রাককেইখন আৰক্ষীয়ে চিনিব নোৱৰাকৈ কেএমচি নামৰ এটা প্ৰতিষ্ঠানৰ নামত পৰিবহণ নথিও উলিওৱা হৈছিল।
চুৰি কৰা অধিক সংখ্যক তাঁৰ জাপিয়াৰ মুকুট আলী নামৰ এজন লোকৰ পুখুৰীত লুকুৱাই ৰখা হয়। আন এটা অংশ লুকুৱাই ৰখা হয় ঢেকিয়াজুলিৰ এটা গুদাম ঘৰত। তদুপৰি আন একাধিক স্থানতো চুৰি তাঁৰবোৰ জমা কৰি থোৱাৰ খবৰ তদন্তকাৰী আৰপিএফে লাভ কৰিছে। আজিলৈকে গ্ৰেপ্তাৰ কৰা ১১ জন অভিযুক্ত হ’ল- বাহাৰুল আলী, বিজু ৰয়, তহিদুৰ ৰহমান, মজদুৰ আলী, ইমৰাজুল হক, কুলেন শৰ্মা, চিৰাজুদ্দিন শ্বেখ, বিৰাজ সিনহা, মুলিন বাবু সিনহা, ছাইফুল ইছলাম আৰু মোগল হুছেইন।
পলাতক অৱস্থাত থকা কেইজন হ’ল নিজামুদ্দিন ওৰফে নয়ন কলিতা ওৰফে নৰেন কলিতা, ইউছুফ আহমেদ, মুকুট আলী, খলিল আলী আৰু জাকিৰ হুছেইন। মুকুট, ইউছুফ আৰু জাকিৰ বৃত্তিত ঠিকাদাৰ। বিদ্যুৎ বিভাগৰ ঠিকাৰ কামত তিনিওজন জড়িত। আনহাতে, নিজামুদ্দিন এই সমগ্র চুৰিকাণ্ডৰ মূল ব্যক্তি বুলিও চিনাক্ত কৰা হৈছে।
ADVERTISEMENT