Zubeen Divas:
দৈনিক অগ্ৰদূত ডিজিটেল ডেস্ক:আজিৰে পৰা জুবিন ক্ষেত্রত তিনিদিনীয়াকৈ ‘জুবিন দিৱস উদযাপন কৰা হ’ব ৷ কলাগুৰু আর্টিষ্ট ফাউণ্ডেছন, জুবিন গাৰ্গ ন্যাস, জুবিনৰ পৰিয়াল আৰু সাংস্কৃতিক সঞ্চালকালয়, স্থানীয় সোণাপুৰৰ ৰাইজৰ উদ্যোগত আয়োজিত জুবিন দিৱস উপলক্ষে ফুল আৰু গামোচাৰে সজোৱা হৈছে প্ৰাণৰ শিল্পীৰ অন্তিম শয়নস্থলী ৷ বৃহস্পতিবাৰে পুৱাই জুবিন ক্ষেত্রত উপস্থিত হৈ জুবিনৰ অন্তিম শয়নস্থলীত পানী চটিয়াই গৰিমা শইকীয়া গার্গে ৷
আনহাতে প্ৰাণৰ শিল্পীক উদযাপন কৰিবলৈ পুৱাৰে পৰা জুবিন অনুৰাগীৰ সোঁত বৈছে সোণাপুৰৰ জুবিনক্ষেত্ৰলৈ৷ আজি পুৱাই জুবিনক্ষেত্ৰত বিভিন্ন প্ৰান্তৰ পৰা অহা জাতি-ধর্ম-বর্ণ নির্বিশেষে জিকিৰ পৰিবেশন কৰে ৷
ইপিনে জুবিন দিৱসৰ বিস্তৃত কাৰ্যসূচী অনুসৰি জুবিন ক্ষেত্ৰত আজি পুৱা ৯ বজাৰ পৰা ১২ বজালৈ হয় সর্বধর্ম প্রার্থনা ৷ দিনৰ এক বজাৰ পৰা বিভিন্ন প্ৰান্তৰ পৰা অহা নামতি দলে পৰিবেশন কৰিব নাম প্ৰসংগ ৷
১৮ ছেপ্টেম্বৰত জুবিনক গীত-মাতেৰে উদযাপন কৰা হ’ব। বিভিন্ন সাংস্কৃতিক গোষ্ঠী, শিল্পী আদিয়ে ইয়াত অনুষ্ঠান পৰিবেশন কৰিব। পুৱা ১০ বজাৰ পৰা আৰম্ভ হ’বলগীয়া এই কার্যসূচী নিশা সাত বজাত অন্ত পৰিব। ১৯ ছেপ্টেম্বৰত পুৱা গুৰু আসন প্রতিষ্ঠা কৰি ভাগৱত পাঠ কৰা হ’ব। নাম-প্ৰসংগও কৰা হ’ব। সন্ধিয়া ৬-৩০ বজাত ভাওনা পৰিবেশন কৰা হ’ব। মুখ্যমন্ত্রী ড° হিমন্ত বিশ্ব শর্মাও সেইদিনা জুবিন ক্ষেত্রত উপস্থিত থাকিব।
উল্লেখ্য যে প্ৰাণৰ শিল্পী জুবিন গাৰ্গ হেৰাই যোৱাৰ বিগত এবছৰে ব্ৰহ্মপুত্ৰৰে বহু পানী বৈ গ’ল যদিও তেওঁৰ মৃত্যুৱে সৃষ্টি কৰা আৱেগৰ কোনো হীনডেঢ়ি নহ’ল। জুবিন নামৰ সত্তাটোৱে জীৱিত কালত অসমবাসীক এনেদৰে আৱৰি ৰাখিছিল যে তেওঁ চিৰদিনলৈ হেৰাই যোৱা বুলি আজিলৈকে মনে-প্রাণে গ্রহণ কৰিব পৰা নাই। সেই জুবিন নোহোৱা হোৱাৰ স্মৃতিচাৰণ কৰিবলৈ মানসিকভাবে সাজু নহয় অসমবাসী।
আনহাতে ১৯ ছেপ্টেম্বৰত জুবিন ক্ষেত্রলৈ যাবলগীয়া লোকৰ বাবে অসম ৰাজ্যিক চালক সন্থা তথা কেব চালকসকলে যাত্ৰীৰ পৰা কেৱল ইন্ধনৰ খৰচটোহে ল’ব, ভাড়া আদায় নকৰে বুলি সংগঠনটোৱে সদৰী কৰে। ইয়াৰ উপৰি যাত্ৰীসকলক খোৱা পানীও যোগান ধৰিব। ১৯ ছেপ্টেম্বৰত অসম সাহিত্য সভায়ো জুবিন দিৱস পালন কৰিব। সভাৰ প্ৰধান সম্পাদক দেৱজিৎ বৰাই সদৰী কৰে যে এই দিৱস অসম সাহিত্য সভাৰ ৩৩ খন জিলা সভা আৰু প্রায় এহেজাৰখন শাখা সাহিত্য সভাই পালন কৰিব। অসমৰ উপৰি ভাৰতৰ বিভিন্ন ৰাজ্যৰ লগতে বিদেশত থকা শাখা সাহিত্য সভাসমূহেও এই দিৱস পালন কৰিব।
দিৱস পালনৰ কেন্দ্ৰীয় কাৰ্যসূচী মৰিগাঁৱত পালন কৰা হ’ব। সেইদিনা পুৱা মৰিগাঁও জিলা সাহিত্য সভাৰ সভাপতি ড° হৰমোহন কলিতাই অসম সাহিত্য সভাৰ পতাকা উত্তোলন কৰিব। কাৰ্যসূচীৰ অংশ হিচাপে নাহৰৰ পুলি ৰোপণ কৰা হ’ব। তাৰ পাছত জুবিনৰ মায়াবিনী শীর্ষক গানটো পৰিবেশন কৰা হ’ব। বিয়লি সভাৰ সভাপতি ড° বসন্ত কুমাৰ গোস্বামীৰ পৌৰোহিত্যত স্মৃতি সভা অনুষ্ঠিত কৰা হ’ব। সেইদিনা সন্ধিয়া ছয় বজাত ৰাজ্যবাসীক ঘৰত এগছিকৈ বস্তি জ্বলাবলৈও অসম সাহিত্য সভাই আহ্বান জনাইছে।সদৌ অসম ছাত্র সন্থায়ো ১৯ ছেপ্টেম্বৰত ৰাজ্যৰ প্ৰতিখন জিলা সদৰত ‘পোহৰৰে চাকি গছি’ শীর্ষক বিশেষ কার্যসূচী পালন কৰিব। অসম বাজ্যিক প্রাথমিক শিক্ষক সম্মিলনীয়ে ১৯ ছেপ্টেম্বৰৰ দিনটো ‘পঢ়িবলৈ শিকো আহা’ দিন হিচাপে পালন কৰিব। ৰাজ্যৰ নিম্ন প্রাথমিক বিদ্যালয়সমূহত ৰূপায়ণ কৰিবলগীয়া এই কার্যসূচীত জুবিন গাৰ্গৰ প্ৰতিচ্ছবিত শ্রদ্ধাঞ্জলি জ্ঞাপন কৰি পাঠ পঢ়া প্রতিযোগিতা অনুষ্ঠিত কৰা হ’ব।
ইপিনে, অসম জাতীয় পৰিষদৰ উদ্যোগত সপ্তাহজুৰি পালন কৰা হৈছে জুবিন গাৰ্গ স্মৃতি সপ্তাহ। কাইলৈ এই কাৰ্যসূচীৰ অংশ হিচাপে জুবিন গাৰ্গৰ সংগীত, কাব্য প্রতিভা, প্রকৃতি প্রেম, মুক্ত চিন্তা, মানবীয় প্রমূল্য, সামাজিক দায়বদ্ধতা, অসমীয়া জাতীয়তাবাদ আৰু সাম্প্রদায়িকতাবিহীন সমন্বয়ৰ অসমৰ সপোন আদি বিষয়ত আলোচনা কৰা হ’ব। জুবিন গাৰ্গৰ গীত বিভিন্ন জনগোষ্ঠী ভাষাতো পৰিবেশন কৰা হ’ব। এশগৰাকী শিল্পীয়ে পৰিবেশন কৰিব জুবিনৰ ‘মায়াবিনী ৰাতিৰ বুকুত’ শীর্ষক গীতটি।ADVERTISEMENT
