IPL Gambling:
দৈনিক অগ্ৰদূত ডিজিটেল ডেস্ক:আইপিএল ক্রিকেটক লৈ জুৱাৰৰ ছিন্ডিকেট চলাই কোটি কোটি টকাৰ অবৈধ ব্যৱসায় কৰা এটা চক্ৰৰ কাণ্ডৰী দ্বীপেশ বাজোৰিয়া নামৰ এজন কুখ্যাত জুৱাৰী যোৱা দেওবাৰে নিশা প্রৱর্তক সঞ্চালকালয় (ইডি)ৰ জালত পৰে। দীঘলীয়া তদন্তৰ অন্তত ইডিৰ গুৱাহাটীস্থ কার্যালয়ৰ এটা দলে বাজোৰিয়াক মহানগৰীৰ জু-ৰোডস্থিত বাসভৱনৰ পৰা ধনৰ অবৈধ লেনদেন প্রতিৰোধ আইনৰ অধীনত গ্রেপ্তাৰ কৰে।
বাজোৰিয়াক সোমবাৰে গুৱাহাটীস্থ বিশেষ আদালতত হাজিব কৰা হয়। ইডিৰ আবেদন মর্মে আদালতে বাজোৰিয়াক ছদিনৰ বাবে তদন্তকাৰী সংস্থাটোৰ জিম্মালৈ প্রেৰণ কৰে। ইডিয়ে তদন্তত লাভ কৰা তথ্য অনুসৰি ধনৰ
অবৈধ লেনদেনৰ এই কার্যত ধৃত বাজোৰিয়া বিগত বহু বছৰ ধৰি জড়িত হৈ আহিছে। তেওঁ আইপিএল জুৱা বৃহৎ পৰিসৰত চলাই আহিছে। ইয়াকে লৈ যি ছিন্ডিকেট চলাই আহিছে তাৰ জৰিয়তে বাজোৰিয়াই ২০২২ৰ ১৯ এপ্ৰিলৰ পৰা চলিত বৰ্ষৰ ১৫ মেলৈকে কোটি কোটি টকাৰ লেনদেন কৰে। এই লেনদেনৰ বাবে ব্যৱহাৰ কৰা হয় বর্তমান অকাৰ্যকৰী এখন ফাৰ্মৰ বেংক একাউন্ট। মেচাৰ্ছ ডিআৰএম কোক নামৰ ফাৰ্মখনৰ একাউন্ট এই কামত ব্যৱহাৰ কৰা হয়। এই একাউণ্টত উক্ত সময়ছোৱাত প্রায় ২৮.১২ কোটি টকা জমা হয়। তেনেদৰে পৰিশোধ কৰা হয় প্রায় ২৮.০৩ কোটি টকা।
উল্লেখ্য যে আইপিএল জুৱাক লৈ গুৱাহাটী আৰক্ষীৰ অপৰাধ শাখাত ২০২১ৰ ১১ অক্টোবৰত এখন এজাহাৰ পঞ্জীয়ন হৈছিল। তিনিচুকীয়া আৰক্ষী থানা আৰু গুৱাহাটীৰ পাণবজাৰ আৰক্ষী থানাতো ইতিমধ্যে দুখন এজাহাৰ এই জুৱাক লৈ পঞ্জীয়ন হৈছিল। এই দুখন এজাহাৰকো অপবাধ শাখাৰ এজাহাৰখনৰ লগত সংযুক্ত কৰা হয়। কাৰণ প্রাথমিক অনুসন্ধানত ৰাজ্যৰ কে’বাখনো জিলাত চলা আইপিএল জুৱাৰ মাজত যোগসূত্র থকাটো নিশ্চিত কৰা হয়।
অপৰাধ শাখাৰ অনুসন্ধানত এই তথ্যও নিশ্চিত কৰা হয় যে আইপিএল জুৱাত এক বৃহৎ ছিণ্ডিকেট চক্র জড়িত হৈ আছে আৰু এই চক্ৰৰ নেতৃত্বত কোটি কোটি টকাৰ লেনদেন চলি আহিছে। অবৈধ ধনৰ বৃহৎ লেনদেন গোটেই বিষয়টোত জড়িত থকাৰ পৰিপ্ৰেক্ষিতত পৰৱৰ্তী সময়ত ইয়াৰ তদন্তৰ দায়িত্ব ইডি লৈ হস্তান্তৰ কৰা হয়।
ইডিৰ তদন্তত পোহৰলৈ আহে যে কুখ্যাত জুৱাৰী গুৱাহাটীৰ দ্বীপেশ বাজোৰিয়াই এই জুৱাৰ ছিণ্ডিকেটৰ প্ৰধান বুকী। এই জুৱা চলাবলৈ দ্বীপেশে দুটা অনলাইন বেটিং প্লেটফর্ম তথা ৱেবছাইট ব্যৱহাৰ কৰি আহিছে। এই দুটা ৱেবছাইট হ’ল www.skyexchange.com আৰু www.winner7.io। ইয়াৰ লগতে জুৱাত বিনিয়োগকাৰীৰ বাবে গোপন বার্তা প্ৰেৰণৰো অনলাইনত বিশেষ ব্যৱস্থা গঢ়ি তোলা হয়। আনহাতে, ধনৰ লেনদেনৰ বাবে ব্যৱহাৰ কৰা হয় মেচাৰ্ছ ডিআৰএম কোকৰ নামত থকা একাউন্টটো।
তদন্তৰ অংশৰূপে ইডিৰ এটা দলে যোৱা ২৬ মে’ত বাজোৰিয়াৰ বাসভৱনত তালাচী চলায়। এই তালাচীত একাধিক বিলাসী বাহন, সম্পত্তিৰ নথি, বেংকৰ নথি আদি জব্দ কৰা হয়। তদুপৰি ম’বাইল ফোন, লেপটপ, পেন ড্রাইভ আদিও জব্দ কৰা হয়। এইসমূহ নথি আৰু সামগ্ৰীৰ বিতং কাৰিকৰী পৰীক্ষাত ধনৰ অবৈধ লেনদেনৰ দিশটো অধিক স্পষ্ট হয়। এই লেনদেনৰ সন্দৰ্ভত বাজোৰিয়াই সন্তোষজনক উত্তৰ দাখিলতো ব্যর্থ হয়। ইয়াৰ বিপৰীতে ইডি নিশ্চিত হয় যে বাজোৰিয়াই এই সমগ্র জুৱাৰ ছিণ্ডিকেটৰ কাণ্ডাৰী।
এই প্রসংগতে ইডিৰ সূত্রই সদৰী কৰে যে বাজোৰিয়াৰ সহযোগী আৰু এই জুৱাত বিনিয়োগকাৰীসকল ইতিমধ্যে উদ্ধাৰ হৈছে। অধিক তথ্য উদ্ধাৰৰ বাবেও আগন্তুক ছটা দিন বাজোৰিয়াক জেৰা কৰিব ইডিৰ দলে।
