Cabinet meeting in Dispur:
দৈনিক অগ্ৰদূত ডিজিটেল ডেস্ক:মুখ্যমন্ত্ৰী ড:হিমন্ত বিশ্ব শৰ্মাৰ পৌৰোহিত্যত বৃহস্পতিবাৰে দিছপুৰস্থিত লোকসেৱা ভৱনত অনুষ্ঠিত কেবিনেট বৈঠকত কে’বাটাও গুৰুত্ব পূৰ্ণ সিদ্ধান্ত লোৱা হয়। বৈঠকৰ পিছত এক সংবাদমেল সম্বোধন কৰি মুখ্যমন্ত্ৰী গৰাকীয়ে কয়,এইবাৰ দুৰ্গা পূজাত অসদ চৰকাৰৰ অধীনস্থ কৰ্মচাৰীয়ে লাভ কৰিব ৫ দিনকৈ বন্ধ ৷ ১৭ অক্টোবৰতো অতিৰিক্ত বন্ধ লাভ কৰিব চৰকাৰী কৰ্মচাৰী সকলে৷আনহাতে অসম চাহ নিগমৰ অধীনত থকা বাগিচা শ্ৰমিক – কৰ্মচাৰীয়ে দুর্গা পূজাত লাভ কৰিব ২০ শতাংশ বোনাচ৷
মুখ্যমন্ত্ৰী গৰাকীয়ে আৰু কয় যে,দূৰ্গা পূজাৰ প্ৰতি লক্ষ্য ৰাখি অক্টোবৰত অৰুণোদয় হিতাধিকাৰিয়ে লাভ কৰিব ১২৫০ টকাৰ বিপৰীতে ১৫০০ টকাকৈ৷ আনহাতে মাষ্টাৰ ৰোল আৰু অস্থায়ী ১৬৬ গৰাকী কৰ্মচাৰীৰ চাকৰি নিয়মীয়াকৰণকৰা হয় এতিয়া পৰা তেওঁলোকে আন কৰ্মচাৰীৰ দৰে পে স্কেলত দৰমহা লাভ কৰিব৷
উল্লেখ্য যে অসমলৈ চিজেপি কৰ্মকৰ্তা আগমন সন্দৰ্ভত। সাংবাদিক সোধা এক প্ৰশ্নোত্তৰত মুখ্যমন্ত্ৰী গৰাকীয়ে কয়,যিকোনো ধৰণৰ শিক্ষা মূলক কাৰ্যকলাপ, ভাল পৰামৰ্শৰ বাবে মই সকলোকে আদৰণি জনাম৷ সেইয়া লাগিলে চিজেপিয়ে হওঁক, বাম পন্থীয়েই হওঁক ৷ স্বাস্থ্য, শিক্ষা বিষয়ত কৰা যিকোনো কামৰ বাবে মোৰ ওচৰলৈ আহিলে মই সৰ্বাধিক গুৰুত্ব দিম ৷
আনহাতে দেশৰ মুখ্য নিৰ্বাচনী আয়ুক্তৰ বিৰুদ্ধে ভোট চুৰিৰ অভিযোগ আনি তেওঁক অপসাৰণ সন্দৰ্ভত বিভিন্ন সংগঠনে সৰৱ হোৱাৰ সম্পৰ্কত মুখ্যমন্ত্ৰী গৰাকীয়ে কয়, এইয়া হতাশাগ্ৰস্ত বিৰোধীৰ ভিত্তিহীন অভিযোগ ৷ জনতাৰ পৰা বিচ্ছিন্ন হৈ পৰা বিৰোধীৰ এই অভিযোগৰ কোনো সত্যতা নাই ৷ তেওঁলোক ক্ষমতা লাগে ৷ ক্ষমতাৰ বাবে দেশ খনত অস্থিৰ কৰাৰ বাবে অহৰহ চেষ্টাত ব্ৰতী হৈছে ৷
