Iran:
দৈনিক অগ্ৰদূত ডিজিটেল ডেস্ক:পুনৰ মধ্যপ্রাচ্য উত্তাল হোৱাৰ আশংকা প্রবল হৈছে। এনে আশংকাৰ স্পষ্ট ইংগিত দি ইৰানে সম্প্রতি সমগ্র দেশত বিধি-১০০ জাৰি কৰিছে। ইৰানৰ এই বিধি-১০০ই ৰাষ্ট্ৰীয় সামৰিক সতর্কতাক সূচায়। স্বাভাৱিকতে এই সামৰিক সতর্কতা উচ্চ পৰ্যায়ৰ হয়। অর্থাৎ সম্ভাব্য যুদ্ধ পৰিস্থিতিৰ মোকাবিলাৰ উদ্দেশ্যে দেশখন সম্প্রতি সাজু হৈছে। উল্লেখ্য যে শেহতীয়াভাৱে মার্কিন ৰাষ্ট্ৰপতি ড’নাল্ড ট্রাম্পে ইৰানক কঠোৰ ভাষাৰে সকীয়াই দিয়ে।
ইৰানে সম্প্রতি বাহাল ৰখা স্থিতি সলনি নকৰিলে দেশখন উৰুৱাই দিয়াৰো ভাবুকি দিছে ট্রাম্পে। সেই অনুসৰি, সম্ভাব্য আক্ৰমণ প্ৰতিৰোধৰ উদ্দেশ্যে ইৰান সষ্টম হৈছে। ইয়াৰ অংশৰূপে সমগ্র দেশত বিধি-১০০ বলৱৎ কৰিছে। ইতিমধ্যে চৰকাৰে দেশখনৰ উচ্চ প্রশিক্ষিত অর্ধসামৰিক বাহিনী ইছলামিক ৰিভ ‘ল্যুচনাৰী গার্ড ক’পছ (আইআৰচিজি), ইৰানী সেনাবাহিনীৰ অন্যতম শাখা আৰতেশ, বায়ুসেনা বাহিনী আৰু আভ্যন্তৰীণ নিৰাপত্তা বাহিনীসমূহকো সষ্টম থাকিবলৈ নিৰ্দেশ জাৰি কৰিছে।
লক্ষ্যণীয়ভাবে ট্রাম্পে জাৰি কৰা সকীয়নিত ইংগিত স্পষ্টহৈছে যে এইবাৰ আমেৰিকা যুক্তৰাষ্ট্ৰই আর্থিক বা কূটনৈতিকভাৱেও ইৰানক ধৰাশায়ী কৰিব পাৰে। আনহাতে, ট্রাম্পক উভতি ধৰি ইৰান চৰকাৰে স্পষ্ট কৰি দিছে যে মার্কিন যুক্তৰাষ্ট্ৰই আক্ৰমণ কৰিলে কোনো কথা বিবেচনা অবিহনে প্ৰত্যাক্ৰমণ কৰা হ’ব। উল্লেখ্য যে শেহতীয়াভাৱে য়েমেনৰ হুথি বাহিনীৰ উত্থানক লৈ মধ্যপ্রাচ্য উত্তপ্ত হৈ আছে। ইৰান সমর্থিত এই বাহিনীয়ে ছৌদি আৰবৰ বিভিন্ন স্থানত আক্রমণো সংঘটিত কৰিছে। এনে অৱস্থাত মার্কিন ৰাষ্ট্ৰপতি ট্রাম্পে ইৰান আক্ৰমণৰ হুংকাৰ দিছে। ফলত মধ্যপ্রাচ্যৰ পৰিস্থিতিয়ে অচিৰে পুনৰ ভয়াৱহ ৰূপ লোৱাৰ আশংকা প্রবল হৈছে।
আনহাতে, বিধি-১০০ৰ সতর্কতা অনুসৰি, সামৰিক বাহিনীক সর্বোচ্চ পৰ্যায়ৰ সম্ভাব্য সংঘাত বা সামৰিক অভিযানৰ বাবে সম্পূর্ণরূপে সষ্টম থাকিবলৈ নির্দেশ দিয়া হয়। এই ধৰণৰ সামৰিক প্ৰস্তুতিৰ ক্ষেত্ৰত সেনাবাহিনীক দ্রুত নিয়োগৰ বাবে সাজু কৰি ৰখা হয়। সামৰিক যোগাযোগ ব্যৱস্থা অধিক শক্তিশালী কৰা হয়। একেদৰে আক্ৰমণ সংঘটিত হ’লে ক্ষিপ্ৰতৰে প্ৰত্যুত্তৰ জনাব পৰাকৈ ৰখা হয় সামৰিক বাহিনীক।
তদুপৰি শত্ৰুৰ বিমান আক্রমণ হ’লে গুৰুত্বপূৰ্ণ ক্ষেপণাস্ত্ৰ ভাণ্ডাৰক ৰক্ষা কৰাৰ বাবেও সামৰিক বাহিনী সাজু থাকে। উল্লেখ্য যে ইৰানৰ ভূগর্ভস্থ ক্ষেপণাস্ত্র ঘাটিসমূহক ‘ক্ষেপণাস্ত্ৰ চহৰ’ বুলি কোৱা হয়। সেই ঘাটিসমূহত নিৰাপত্তা নিশ্ছিদ্ৰ কৰি তোলাটে হৈছে এই বিধি-১০০ৰ প্ৰধান পদক্ষেপ। ইয়াৰ অংশৰূপে সম্ভাব্য আক্ৰমণৰ প্রাক্ক্ষণত ক্ষেপণাস্ত্ৰ আৰু উৎক্ষেপণ গোটসমূহৰ অৱস্থান বাৰে বাৰে সলনি কৰা হয়। ইয়াৰ উদ্দেশ্য হৈছে ক্ষেপণাস্ত্রসমূহ সুৰক্ষিত কৰি ৰখা।
উল্লেখ্য যে ইৰানে ৰাছিয়াৰ পৰা এছ-৩০০ ক্ষেপণাস্ত্ৰ ক্ৰয় কৰিছে। তদুপৰি নিজেও খোৰদাদ-১৫ আৰু ৰাভাৰ-৩৭৩ বিমান প্ৰতিৰক্ষা ব্যৱস্থা গঢ়ি তোলা বুলি সূত্ৰই সদৰী কৰিছে। তদুপৰি দেশৰ সীমান্ত আৰু গুৰুত্বপূৰ্ণ ৰণকৌশলজনিত আন্তঃগাঁথনিসমূহো বিধি-১০০ৰ অধীনত সক্ৰিয় কৰি তোলা হয়। একেদৰে আকাশমাৰ্গৰ প্ৰতিৰক্ষা ব্যৱস্থাসমূহো অধিক দ্রুতভাৱে সক্ৰিয় কৰি তোলা হয়। ইয়াৰ অংশৰূপে আকাশমাৰ্গৰ ওপৰত সঘন নিৰীক্ষণ ৰখা হয়। শত্ৰুৰ সম্ভাব্য আক্রমণ ৰোধৰ উদ্দেশ্যে হাই-ফ্রিকুরেন্সি ট্রেকিং মোড কার্যক্ষম কৰি তোলা হয়।
ইৰানৰ সামৰিক পৰিকল্পনাত ‘মোজেইক ডিফেন্স’ শীর্ষক এক ব্যৱস্থাও আছে। এই ব্যৱস্থাৰ মূল উদ্দেশ্য হ’ল যুদ্ধৰ সময়ত কেন্দ্ৰীয় সামৰিক কমাণ্ডোসকলৰ স’তে যোগাযোগ বিচ্ছিন্ন হ’লে দেশৰ প্ৰতিৰক্ষা ব্যৱস্থা যাতে অচল নহয়, তাৰ ব্যৱস্থা কৰা হয়। সম্প্রতি ইৰান চৰকাৰে বিধি-১০০ জাৰি কৰাত এই সকলো ব্যৱস্থা সক্ৰিয় কৰি তোলা হৈছে। এনে ব্যৱস্থাৰ অংশৰূপে অর্ধসামৰিক বাহিনী আইআৰজিচিৰ কমাণ্ডোসকলক পৰিস্থিতি অনুযায়ী সিদ্ধান্ত গ্রহণৰো কর্তৃত্ব প্ৰদান কৰা হৈছে। অর্থাৎ এই বাহিনীয়ে প্রয়োজনত সম্পূর্ণ স্বাধীনভাৱে সামৰিক অভিযান চলাব পাৰিব।
অৰ্থাৎ কেন্দ্ৰীয় নেতৃত্বৰ স’তে যোগাযোগ বিচ্ছিন্ন হ’লেও আইআৰজিচিৰ কমান্ডোসকলে প্রয়োজন সাপেক্ষে শত্ৰুৰ ওপৰত আক্ৰমণ সংঘটিত কৰিব পাৰিব। এই উদ্দেশ্যে ‘মোজেইক ডিফেন্স’ ব্যৱস্থাৰ সংযোজন ঘটোৱা হৈছে। একেদৰে দেশখনৰ তিনি পৰমাণু কেন্দ্ৰ নাটাঞ্জ, ফ’ৰডো আৰু ইছফাহানৰ দৰে গুৰুত্বপূৰ্ণ ক্ষেত্ৰসমূহৰ নিৰাপত্তা ব্যৱস্থাও কটকটীয়া কৰি তোলা হৈছে।
