Tinsukia:
দৈনিক অগ্ৰদূত ডিজিটেল ডেস্ক:কেন্দ্ৰীয় চৰকাৰৰ ডিজিটেল ইণ্ডিয়াৰ ৰঙীণ সপোন আৰু ৰাজ্য চৰকাৰৰ এগ্রীষ্টেকৰ ডাঙৰ ডাঙৰ বেনাৰৰ আঁৰত আজি সমগ্ৰ অসমতে জীয়াতু ভূগিব লগা হৈছে গাঁৱৰ ভেটি স্বৰূপ গাঁও প্রধানসকল। কৃষি ভূমিৰ ডিজিটেল জৰীপৰ নামত প্রতিদিনেই হাবিয়ে-বননিয়ে ঘূৰি ফুৰিবলগীয়া হোৱা চৰকাৰী গাঁও প্রধানসকল আজি চৰম নিৰাপত্তাহীনতাত ভুগিছে। কেন্দ্ৰীয় চৰকাৰৰ ডিজিটেল কৃষি অভিযানৰ অধীনত এগ্রীষ্টেক আঁচনিৰ অংশ হিচাপে ৰাজ্য চৰকাৰে যোৱা ২০২৪ বৰ্ষৰ পৰা অসমৰ ৩০খন জিলাত একেলগে ডিজিটেল ক্রপ চাৰ্ভে আৰম্ভকৰিছে। আনুষ্ঠানিকভাৱে আৰম্ভ হোৱা এই জৰীপত জিলা প্রশাসনসমূহে হাজাৰ হাজাৰ কাৰ্যৰত গাঁও প্রধানক তথ্য সংগ্রহ, জিঅ’টেগিং আৰু কৃষকৰ ভূমিৰ সত্যাপনৰ দায়িত্বত নিয়োজিত কৰিছে, যাৰ ভিতৰত কেৱল তিনিচুকীয়া জিলাতে আছে প্রায় আঢ়ৈশ গাঁও প্রধান।
কিন্তু এই চমকৰ আঁৰৰ বাস্তৱ ছবিখন অতি কৰুণ। গাঁৱে-ভূঞে জৰীপৰ কামত যাওঁতে গাঁও প্রধান সকলৰ জীৱনলৈ ভাবুকি নামি আহিছে। কোনো ধৰণৰ সুৰক্ষা সামগ্ৰী, যাতায়াতৰ সুব্যৱস্থা বা প্রাথমিক চিকিৎসাৰ সঁজুলি নোহোৱাকৈয়ে তেওঁলোকক নদীৰ টুলুঙা নাৱেৰে বিপদসংকুলভাৱে নদী পাৰ হৈ, হাবি-জংঘল আৰু পথাৰে ঘূৰি জৰীপ চলাবলগীয়া হৈছে।
ইয়াৰ ফলত অসমৰ বিভিন্ন প্রান্তত কৰ্মৰত অৱস্থাত গাঁও প্রধানসকল দুর্ঘটনাৰ সন্মুখীন হৈছে। অসমৰ ভিন্ন ৰাজহ চক্ৰৰ এলেকাত যোৱা কেইদিনত সংঘটিত দুটা ঘটনাই এই নিৰাপত্তাহীনতাৰ ভয়াৱহতাক উদঙাই দিছে। শেহতীয়াকৈ জোৱাৰ্দ্দি বেছিমাৰী গাঁৱৰ গাঁও প্রধান ফটিক বৈশ্যই ক্রপ চার্ভে কৰি থাকোতেই বিষাক্ত সাপৰ খুটনিৰ বলি হয়। ভাগ্য ভাল যে সময়মতে চিকিৎসাৰব্যৱস্থা কৰাত তেওঁ বর্তমান সুস্থ হৈ উঠিছে।
আনহাতে চলিত মাহতে ডুমডুমা ৰাজহ চক্ৰৰ হাঁহখাতি গাঁৱৰ গাঁও প্রধান জিতুল মৰাণক জৰীপ চলাবলৈ গৈ থকাৰ অৱস্থাত কুকুৰে কামুৰি গুৰুতৰভাৱে আঘাত কৰে। এনে ঘটনা সমগ্র অসমতে নিতৌ ঘটি আছে। আটাইতকৈ দুর্ভাগ্যজনক কথাটো হ’ল কৰ্মৰত অৱস্থাত সংঘটিত এনে দুর্ঘটনাৰ বাবে আজিলৈকে চৰকাৰীভাৱে চিকিৎসাৰ কোনো ব্যৱস্থা গ্ৰহণ কৰা হোৱা নাই। নিজৰ জীৱনক তুচ্ছ কৰি ৰাইজৰ সেৱাত ব্ৰতী হোৱা এইসকল লোকৰ বাবে কোনো স্বাস্থ্য বীমা বা সুৰক্ষা নাই।
এই পৰিস্থিতিৰ পৰিপ্ৰেক্ষিতত অসমৰ গাঁও প্রধানসকলে চৰকাৰৰ ওচৰত কে’বাটাও গুৰুত্বপূৰ্ণ দাবী উত্থাপন কৰিছে। তেওঁলোকে প্ৰতিগৰাকী গাঁও প্ৰধানৰ পৰিয়ালৰ বাবে বছৰি অন্যতম ছয় লাখ টকাৰ স্বাস্থ্য বীমা কার্ড বিনামূলীয়াকৈ প্রদান কৰিবলৈ দাবী জনাইছে, কিয়নো ৰাইজৰ সেৱাত নিয়োজিত এইসকল লোকৰ পৰিয়ালৰ স্বাস্থ্য সুৰক্ষা নিশ্চিত কৰাটো অত্যন্ত জৰুৰী। লগতে গাঁও প্রধান পদবীটোৰ বিশাল দায়িত্ব আৰু পৰিসৰৰ প্ৰতি লক্ষ্য ৰাখি ইয়াক প্রতিষ্ঠানিক ৰূপ দি চৰকাৰী মর্যাদা প্ৰদান কৰি নিয়মীয়া চৰকাৰী কৰ্মচাৰী হিচাপে নিযুক্তিৰ বাবে নীতি-নির্দেশনা প্রস্তুত কৰিবলৈ আহ্বান জনাইছে।
ইয়াৰ উপৰি অৱসৰপ্ৰাপ্ত গাঁও প্রধানসকলৰ এককালীন সাহায্য শীঘ্ৰে মুকলি কৰি দিয়া, দীর্ঘদিন ধৰি খালী হৈ থকা গাঁও প্রধানৰ পদসমূহ পূৰণ কৰা আৰু অৱসৰপ্ৰাপ্তসকলৰ পৰিয়ালৰ যোগ্য লোকক উক্ত পদত বিশেষ মৰ্যাদাৰ ভিত্তিত নিযুক্তি দিবলৈ চৰকাৰক অনুৰোধ জনাইছে। উল্লেখযোগ্য যে বিগত বৰ্ষটো জৰীপ চলাবলৈ যোৱা গাঁও প্রধানসকলৰ লগত এনে অনুৰূপ ঘটনা সংঘটিত হৈছিল।
