APCC Protest:
দৈনিক অগ্ৰদূত ডিজিটেল ডেস্ক:দেশৰ সুস্থ গণতন্ত্ৰ বৰ্তাই ৰখাৰ অন্যতম এক চালিকা শক্তি নিৰ্বাচন আয়োগৰ মুৰব্বীৰ সংবিধান ধ্বংসকাৰী কাৰ্যই দেশবাসীৰ হতচকিত কৰি তোলাৰ মাজতে শুকুৰবাৰে মুখ্য নির্বাচনী আয়ুক্ত জ্ঞানেশ কুমাৰৰ বিৰুদ্ধে অসমত উত্তাল প্ৰতিবাদ সাব্যস্ত কৰে অসম প্ৰদেশ কংগ্ৰেছ কমিটিয়ে ৷
ৰাজীৱ ভৱনৰ চৌহদত অনুষ্ঠিত প্রতিবাদী কাৰ্যসূচীত লোকসভাত বিৰোধী উপ-দলপতি তথা এপিচিচিৰ সভাপতি গৌৰৱ গগৈৰ লগতে জ্যেষ্ঠ কংগ্ৰেছ নেতা ৰিপুন বৰা,দেৱব্ৰত শইকীয়া সহ কে’বা গৰাকী নেতা সহ ৰাজ্যৰ বিভিন্ন প্ৰান্তৰ পৰা অহা কে’বা শতাধিককর্মীয়ে অংশগ্ৰহণ কৰে ৷
প্ৰতিবাদকাৰী কংগ্ৰেছী সকলে হাতে হাতে চৰকাৰ বিৰোধী প্লে’কার্ড- বেনাৰ লৈ মুখ্য নির্বাচনী আয়ুক্ত জ্ঞানেশ কুমাৰ আৰু নিৰ্বাচনী আয়োগৰ নিৰপেক্ষতাক লৈ বিভিন্ন শ্ল’গানেৰে আকাশ – বতাহ মুখৰিত কৰি তোলে ৰাজীৱ ভৱন চৌহদ ৷
আনহাতে নিৰ্বাচন আয়োগৰ ভয়ংকৰ জালিয়াতিৰ বিৰুদ্ধে আৰু মুখ্য নিৰ্বাচনী আয়ুক্ত জ্ঞানেশ কুমাৰৰ অপসাৰণৰ দাবীত অসম প্ৰদেশ কংগ্ৰেছ কমিটিয়ে ৰাজীৱ ভৱনৰ পৰা আজি এক প্ৰতিবাদী সমদল কাৰ্য্যসূচী গ্ৰহন কৰিছিল। কিন্তু অসম আৰক্ষীয়ে প্ৰদেশ কংগ্ৰেছৰ এই প্ৰতিবাদী কাৰ্যসূচী উলিওৱাত বাধা প্ৰদান কৰে আৰু ৰাজীৱ ভৱনৰ সন্মুখৰ পৰাই আটক কৰি নিলে গৌৰৱ গগৈ সহ কে’বাজনো নেতা-কৰ্মীক I
এপিচিচিৰ সভাপতি তথা যোৰহাটৰ সাংসদ গৌৰৱ গগৈয়ে সংবাদ মাধ্যমৰ আগত কয়,গণতন্ত্ৰৰ মূল ভেটি হ’ল নিৰপেক্ষ নির্বাচন। কিন্তু বৰ্তমানৰ মুখ্য নিৰ্বাচনী আয়ক্ত গৰাকীয়ে সংবিধান আৰু আইনী বিধি ব্যৱস্থাক মষিমূৰ কৰি দেশৰ নিৰ্বাচন আয়োগক নজিৰবিহীন বিৰ্তকৰ মাজলৈ ঠেলি দিলে ৷
শাসক গোষ্ঠীৰ হৈ কাম কৰা মুখ্য নিৰ্বাচনী আয়ক্ত জ্ঞানেশ কুমাৰৰৰ কার্যকালত সমগ্র প্রক্ৰিয়াটোত ‘ভোট চুৰি’ আৰু সৰবৰাহৰ এক পৰিৱেশ সৃষ্টি হৈছে, যিয়ে দেশৰ সংবিধানক বিপন্ন কৰি তুলিছে। গতিকে এনে এজন লোক আয়োগৰ শীৰ্ষ পদত ব্ৰতী থকাৰ কোনো অধিকাৰ নাই৷ তৎকালেই তেওঁক অপসাৰণ কৰক চৰকাৰে ৷
গৌৰৱ গগৈ সহ এপিচিচিৰ শীৰ্ষ নেতৃত্বই প্ৰতিবাদস্থলীত হুংকাৰ দিয়ে, যদিহে নির্বাচনী আযোগক স্বচ্ছ আৰু নিৰপেক্ষ কৰাৰ বাবে কেন্দ্ৰীয় চৰকাৰে তাৎক্ষণিক পদক্ষেপ গ্ৰহণ নকৰিলে কংগ্ৰেছ সমগ্ৰ অসমজুৰি তীব্ৰ আন্দোলন গঢ়ি তুলিবলৈ বাধ্য হ’ব ৷
গণতন্ত্ৰৰ ওপৰত বিজেপি চৰকাৰৰ এই হিটলাৰী শাসন ব্যৱস্থাক কোনোপধ্যেই মানি লোৱা নহ’ব আৰু গণতন্ত্ৰ, সংবিধান আৰু ভোটাধিকাৰ ৰক্ষাৰ এই সংগ্ৰাম অব্যাহত থাকিব বুলি চৰকাৰী যন্ত্ৰক সকীয়াই দিয়ে প্ৰদেশ কংগ্ৰেছে৷
