দৈনিক অগ্ৰদূত ডিজিটেল ডেস্ক : ৰাতাবাড়িত ১০ হেজাৰ ইয়াবা টেবলেট উদ্ধাৰৰ ঘটনাত গ্ৰেপ্তাৰ হোৱা বাপ্পী নমঃশূদ্ৰক লগত লৈ ঘৰত অধিক মাদক উদ্ধাৰৰ অভিযানলৈ যোৱাৰ পথতে সংঘটিত হয় এনকাউণ্টাৰৰ ঘটনা। আৰক্ষীৰ দাবী, নিভিয়া বজাৰ পাৰ হোৱাৰ পাছত প্ৰস্ৰাৱ কৰাৰ কথা কৈ গাড়ী ৰখাবলৈ কয় অভিযুক্তই।
গাড়ী ৰখোৱাৰ লগে লগেই এগৰাকী আৰক্ষী কৰ্মীৰ হাতত কামুৰি পলায়নৰ চেষ্টা কৰে বাপ্পীয়ে। অভিযোগ অনুসৰি, ৰাতাবাড়ি থানাৰ অ’চি চিত্তৰঞ্জন বৰাৰ ছাৰ্ভিচ ৰিভলভাৰ কাঢ়ি লৈ পলায়নৰো চেষ্টা কৰে অভিযুক্তই। পৰিস্থিতি নিয়ন্ত্ৰণ কৰিবলৈ আৰক্ষীয়ে গুলীচালনা কৰাত বাপ্পীৰ ভৰিত গুলী লাগে।
ইয়াৰ পিছত প্ৰথমে স্থানীয় চিকিৎসালয়ত প্ৰাথমিক চিকিৎসা প্ৰদান কৰা হয় বাপ্পীক। পৰৱৰ্তী সময়ত উন্নত চিকিৎসাৰ বাবে শিলচৰ মেডিকেল কলেজ হাস্পতাললৈ স্থানান্তৰ কৰা হয়। চিকিৎসা সম্পূৰ্ণ হোৱাৰ পাছত আজি অভিযুক্তক আদালতত হাজিৰ কৰোৱাৰ বাবে লৈ গৈছে আৰক্ষীয়ে।
উল্লেখ্য যে, কালি নিভিয়া–চেৰাগি পথত অভিযান চলাই প্ৰায় ১০ হাজাৰ ইয়াবা টেবলেট উদ্ধাৰৰ লগতে বাপ্পী নমঃশূদ্ৰক গ্ৰেপ্তাৰ কৰিছিল ৰাতাবাড়ি আৰক্ষীয়ে। আৰক্ষী সূত্ৰ অনুসৰি, জেৰাত বাপ্পীয়ে তেওঁৰ ঘৰত আৰু অধিক মাদক মজুত থকাৰ তথ্য দিছিল। সেই তথ্যৰ ভিত্তিতেই নিশা অভিযুক্তক লগত লৈ ঘৰৰ অভিমুখে ৰাওনা হৈছিল আৰক্ষীৰ দল।
