SchoolBombThreat: দৈনিক অগ্ৰদূত ডিজিটেল ডেস্ক: স্কুললৈ যাবলৈ মন যোৱা নাছিল এগৰাকী কিশোৰীৰ। প্ৰয়োজন আছিল এদিনৰ ছুটিৰ। সেয়েহে স্কুলখন এদিনৰ বাবে বন্ধ হৈ থকাটো বিচাৰিছিল তাই। এই উদ্দেশ্যে বুদ্ধি খটুৱাই স্কুলৰ ই-মেইল আইডিলৈ এটা বাৰ্তা প্ৰেৰণ কৰে কিশোৰীগৰাকীয়ে।
ই-মেইলটোত লিখে, ‘স্কুলৰ বিল্ডিঙত বোমা ৰখা আছে।’ তদন্তৰ দুদিনৰ ভিতৰতে এই ভুৱা ই-মেইল প্ৰেৰণ কৰোঁতাক চিনাক্ত কৰিছে আৰক্ষীয়ে। কিশোৰীগৰাকীৰ বিৰুদ্ধে জুভেনাইল জাষ্টিচ আইনৰ অধীনত ব্যৱস্থা গ্ৰহণ কৰা হ’ব।
অভিযুক্ত কিশোৰীগৰাকী দিল্লীৰ লোধি ৰোডৰ এয়াৰ ফ’ৰ্চ বাল ভাৰতী স্কুলৰ ছাত্ৰী। যোৱা ২৩ অক্টোবৰত, শুকুৰবাৰে, তাই স্কুলখনলৈ এটা ই-মেইল প্ৰেৰণ কৰিছিল। ই-মেইলটোৰ ‘ছাবজেক্ট’ শাৰীত লিখা আছিল, ‘আপোনালোকৰ বিল্ডিঙত বোমা ৰখা আছে।’
এনে ই-মেইল লাভ কৰাৰ পিছতে স্কুল কৰ্তৃপক্ষ তৎপৰ হৈ পৰে। ততাতৈয়াকৈ স্কুলৰ বিল্ডিং খালী কৰি আৰক্ষীক খবৰ দিয়া হয়। কিন্তু পুংখানুপুংখ তালাচী চলোৱাৰ পিছতো তাত কোনো বোমা উদ্ধাৰ নহ’ল।
যোৱা কেইসপ্তাহমানত দিল্লীৰ একাধিক স্কুলত বোমা থকাৰ ভুৱা আতংকৰ সৃষ্টি হৈছে। কোনে এনে বাৰ্তা প্ৰেৰণ কৰিছে, সেয়া এতিয়াও স্পষ্ট হোৱা নাই। সেয়েহে লোধি ৰোডৰ ঘটনাটোকো আৰক্ষীয়ে অত্যন্ত গুৰুত্বসহকাৰে লৈছিল।
দিল্লী আৰক্ষীৰ চাইবাৰ শাখাই ঘটনাটোৰ তদন্ত আৰম্ভ কৰে। প্ৰযুক্তিগত দিশসমূহ বিশ্লেষণ কৰাৰ লগতে সকলো ডিজিটেল নথি-পত্ৰ আৰু প্ৰমাণ পৰীক্ষা কৰি ই-মেইল প্ৰেৰণ কৰোঁতাক চিনাক্ত কৰা হয়।
শনিবাৰে আৰক্ষীয়ে জনোৱা অনুসৰি, ভুৱা ই-মেইল প্ৰেৰণ কৰোঁতা দিল্লীৰ সেইখন স্কুলৰে এগৰাকী ছাত্ৰী। তাই বিচাৰিছিল স্কুলখন এদিনৰ বাবে বন্ধ হওক। সেয়েহে বোমা থকাৰ আতংক বিয়পোৱাৰ সিদ্ধান্ত লৈছিল।
কিশোৰীগৰাকীক জেৰা কৰি তদন্তকাৰীসকলে অধিক তথ্য সংগ্ৰহৰ চেষ্টা চলাইছে। ইয়াৰ পূৰ্বেও তাই এনে কাম কৰিছিল নেকি, আন কোনো স্থানলৈ ‘বোমা ৰখা আছে’ বুলি ই-মেইল প্ৰেৰণ কৰিছিল নেকি আৰু দিল্লীৰ আন স্কুলসমূহত বোমা থকাৰ আতংক সৃষ্টিৰ ঘটনাৰ স’তে তাইৰ কোনো সম্পৰ্ক আছে নেকি, সেই সকলো দিশ তদন্ত কৰি থকা হৈছে। আৰক্ষীয়ে জনোৱা অনুসৰি, জুভেনাইল জাষ্টিচ আইনৰ অধীনত কিশোৰীগৰাকীৰ বিৰুদ্ধে উপযুক্ত ব্যৱস্থা গ্ৰহণ কৰা হ’ব।
