ManipurViolence : দৈনিক অগ্ৰদূত ডিজিটেল ডেস্ক : ২০২৩ চনত গোষ্ঠীগত সংঘৰ্ষৰ জুইত জ্বলি উঠিছিল মণিপুৰ। প্ৰায় তিনি বছৰৰ পাছত পুনৰ অশান্ত হৈ পৰিছে উত্তৰ-পূবৰ ৰাজ্যখন। বিগত কেবাদিনো ধৰি ৰাজ্যখনত বিয়পি পৰিছে হিংসাত্মক ঘটনা। তথ্য অনুসৰি, শনিবাৰে নিশা মণিপুৰত হিংসাৰ বলি হয় কমেও তিনিজন লোক। প্ৰাথমিকভাৱে অনুমান কৰা হৈছে যে নগা গোষ্ঠীৰ সৈতে হোৱা গুলীয়াগুলীত নিহত হৈছে কুকি-জো সম্প্ৰদায়ৰ তিনিজন লোক।
শনিবাৰেই মণিপুৰৰ ৰাজধানী ইম্ফলত মেইতেই আৰু নগা সম্প্ৰদায়ৰ লোকে এক বৃহৎ সমদল উলিয়াইছিল। তেওঁলোকৰ অভিযোগ, কুকি-জো সম্প্ৰদায়ক ব্যৱহাৰ কৰি ৰাজ্যখনত ছায়াযুদ্ধ চলাইছে কেন্দ্ৰীয় চৰকাৰে। এই বৃহৎ সমদলৰ ফলত কাৰ্যতঃ অৱৰুদ্ধ হৈ পৰে ইম্ফল।
অৱশ্যে, হিংসাত্মক ঘটনাটো সমদলৰ কেইঘণ্টামান পূৰ্বেই সংঘটিত হৈছিল। তথ্য অনুসৰি, শনিবাৰে পুৱা প্ৰায় ৯ বজাত নগা অধ্যুষিত ৰংমেই জিলাৰ তাজেইকাইফুন গাঁৱত সংঘটিত হয় এই ঘটনা। প্ৰাথমিক খবৰ অনুসৰি, নগাসকলৰ গুলীতেই তিনিজন লোকৰ মৃত্যু হৈছে।
কুকিসকলৰ সংগঠন কুকি ইনপি মণিপুৰে চৰকাৰক কঠোৰ সমালোচনা কৰি অভিযোগ উত্থাপন কৰিছে যে কুকি অধ্যুষিত অঞ্চলসমূহত নিৰাপত্তা প্ৰদান কৰা নাই চৰকাৰে। কোনো ধৰণৰ উচটনি নোহোৱা সত্ত্বেও কুকিসকলৰ ওপৰত নগাসকলে আক্ৰমণ অব্যাহত ৰাখিছে।
সংগঠনটোৰ অভিযোগ, ইচ্ছাকৃতভাৱে নিৰাপত্তা প্ৰদানৰ পৰা বিৰত আছে চৰকাৰ। কুকিসকলৰ ওপৰত পৰিকল্পিতভাৱে নিৰ্যাতন চলোৱা হৈছে।
উল্লেখ্য যে কেইদিনমান পূৰ্বে দুৰ্বৃত্তৰ গুলীত দুজন গাঁওবাসীৰ মৃত্যুক কেন্দ্ৰ কৰি উত্তপ্ত হৈ পৰিছিল ইম্ফল। ইম্ফল ইষ্ট আৰু কাংপোকপি জিলাৰ সীমান্তৱৰ্তী খোংবাল সুনুৰোক উয়োক অঞ্চলত শেহতীয়াকৈ ১৬জন গাঁওবাসী জংঘললৈ খৰি সংগ্ৰহ কৰিবলৈ গৈছিল।
সেই সময়তে পাহাৰৰ পৰা নামি আহি সশস্ত্ৰ উগ্ৰপন্থীয়ে তেওঁলোকৰ ওপৰত ধাৰাসাৰে গুলীচালনা কৰে। এই ঘটনাত দুজন লোকৰ মৃত্যু হয়। ইয়াৰ পিছত পৰিস্থিতি ইমানেই গুৰুতৰ হৈ পৰে যে প্ৰতিবাদৰ অংশ হিচাপে ক্ষুব্ধ জনতাই স্বয়ং মুখ্যমন্ত্ৰীৰ বাসভৱনৰ প্ৰৱেশদ্বাৰৰ সন্মুখত মৃতদেহ দুটা থৈ যায়। এই ঘটনাৰ পিছতে মুখ্যমন্ত্ৰীৰ বাসভৱনত নিৰাপত্তা ব্যৱস্থা ব্যাপকভাৱে বৃদ্ধি কৰা হয়।
ৰাজ্যখনত নতুনকৈ হিংসা বিয়পি পৰাৰ পিছতে মণিপুৰৰ মুখ্যমন্ত্ৰী ৱাই খেমচাঁদ সিঙে পোনে পোনে প্ৰধানমন্ত্ৰী নৰেন্দ্ৰ মোদীৰ কাষ চাপিছে। সূত্ৰৰ খবৰ অনুসৰি, ৰাজ্যখনত শান্তি ঘূৰাই অনাৰ ক্ষেত্ৰত মণিপুৰ চৰকাৰক সকলো ধৰণে সহায় কৰাৰ আশ্বাস দিছে প্ৰধানমন্ত্ৰীয়ে। অৱশ্যে, তাৰ পিছতো হিংসা বন্ধ হোৱা নাই।
