দৈনিক অগ্ৰদূত ডিজিটেল ডেস্ক : প্ৰস্তাৱিত ছিয়াং আপাৰ মাল্টিপাৰপ’জ প্ৰজেক্ট (SUMP)ক লৈ উত্তেজনা বৃদ্ধি পোৱাৰ মাজতে আদি গালো ৱেলফেয়াৰ ছ’চাইটি (AGWS)-এ অহা ৪ নৱেম্বৰ, বুধবাৰৰ পৰা গেকু গাঁৱৰ পৰা ৰাজ্যৰ ৰাজধানী ইটানগৰলৈ এক শান্তিপূৰ্ণ পদযাত্ৰা আৰম্ভ কৰিবলৈ সাজু হৈছে।
ছ’চাইটিখনে চাৰিটা মূল দাবী উত্থাপন কৰিছে।
১. SUMP-বিৰোধী প্ৰতিবাদৰ স’তে জড়িত গোচৰত আটকাধীন সকলো ব্যক্তিক তাৎক্ষণিক আৰু বিনাচৰ্তে মুক্তি প্ৰদান।
২. বান্ধ নিৰ্মাণৰ পূৰ্বে কমিউনিটী-বেছড অৰ্গেনাইজেশ্যন (CBO) আৰু ছ’চাইটিৰ প্ৰতিনিধিসকলৰ স’তে তাৎক্ষণিকভাৱে শান্তি আলোচনা আৰম্ভ কৰা।
৩. SUMP বিষয়টোৰ স’তে জড়িত সম্প্ৰদায়ৰ নেতা আৰু চৰকাৰী কৰ্মচাৰীৰ বিৰুদ্ধে জাৰি কৰা নিলম্বনৰ নিৰ্দেশ প্ৰত্যাহাৰ কৰা।
৪. SUMP-প্ৰভাৱিত গাঁওসমূহৰ পৰা অৰ্ধসামৰিক বাহিনী আৰু কেন্দ্ৰীয় সশস্ত্ৰ আৰক্ষী বাহিনীৰ (CAPF) জোৱান প্ৰত্যাহাৰ কৰা।
AGWSৰ সভাপতি গেই বাগ্ৰা আৰু মুখপাত্ৰ কাৰ্গে বাসাৰৰ নেতৃত্বত এই পদযাত্ৰা অনুষ্ঠিত হ’ব। পদযাত্ৰাৰ মূলমন্ত্ৰ হৈছে— “একত্ৰিত হৈ থিয় দিয়া আৰু আগুৱাই যোৱা” (Stand United & March Ahead)।
ছিয়াং অঞ্চলত প্ৰস্তাৱিত বৃহৎ বান্ধ প্ৰকল্পটোক লৈ বিৰোধিতা আৰু আলোচনাৰ দাবী ক্ৰমাৎ বৃদ্ধি পোৱাৰ মাজতে এই পদযাত্ৰাক আন এক উল্লেখযোগ্য পদক্ষেপ হিচাপে গণ্য কৰা হৈছে।
