অসমত এই পৰ্যন্ত ক’ভিড-১৯ ত আক্ৰান্ত হোৱা ২৬ জন লোকৰ অধিকাংশই দিল্লীৰ নিজামুদ্দিন মাৰ্কাজত অনুষ্ঠিত তবলিগি জামাতত অংশগ্ৰহণ কৰি উভতি আহিছিল বুলি সদৰী কৰিছে ৰাজ্য চৰকাৰে। এই সকল ক’ভিড-১৯ আক্ৰান্তৰ ভিতৰত অন্যতম হৈছে কামৰূপ জিলাৰ সোণতলী মৌজাৰ অন্তৰ্গত পুৰাণগাঁও নিবাসী মফিজউদ্দিন(৪০)। পৰীক্ষাৰ অন্তত আজি লোকজনৰ শৰীৰত কৰ’না ভাইৰাছ পোৱা বুলি চিকিৎসকে স্পষ্ট কৰাৰ পাছতে সম্প্ৰতি পুৰাণ গাৱঁৰ লগতে সমগ্ৰ অঞ্চলটোতে আতংকময় পৰিস্থিতিৰ উদ্ভৱ হৈছে।
প্ৰাপ্ত তথ্য অনুসৰি, যোৱা ১৮ মাৰ্চত মফিজউদ্দিনে পুৰাণ গাঁৱলৈ উভতি অহাৰ পাছত ভ্ৰমণৰ তথ্য গোপন কৰি মুকলিমূৰীয়াকৈ ঘূৰি ফুৰিছিল। যাৰ বাবে তেওঁ বহু লোকৰে সংস্পৰ্শলৈ অহাত এতিয়া অঞ্চলটোত গণ সংক্ৰমনৰ আশংকা ঘনীভূত হৈ পৰিছে। স্থানীয় সূত্ৰই জনোৱা মতে, আক্ৰান্ত লোকজনে যোৱা ১৩ মাৰ্চত দিল্লীত তবলিগি জামাতত অংশ লৈছিল। ১৮ মাৰ্চত মফিজউদ্দিনে ৰেলযোগে আহি গুৱাহাটীৰ কামাখ্যা ৰেল ষ্টেচনত নমাৰ পিছত জালুকবাৰীৰ পৰা যাত্ৰীবাহী বাহনেৰে সোণতলীলৈ আহিছিল।
ইতিমধ্যে কৰ’না ভাইৰাছৰ আতংকই দেশক গ্ৰাস কৰিবলৈ আৰম্ভ কৰিছিল যদিও চিকিৎসকৰ পৰামৰ্শ গ্ৰহণ নকৰি নিজগৃহতে আছিল। আনকি লোকজনে ‘হোম কোৱাৰেণ্টাইন’ত থকাৰ পৰিবৰ্তে ভ্ৰমণৰ তথ্য গোপন কৰি অঞ্চলটোত নিৰ্বিবাদে ঘূৰি ফুৰাৰ ফলত তেওঁ বহু লোকৰ সংস্পৰ্শলৈ আহিছিল। পৰবৰ্তী সময়ত মফিজউদ্দিনক বামুণীগাওঁ আদৰ্শ চিকিৎসালয়ত আছুতীয়াকৈ ৰাখি পৰীক্ষা কৰাৰ পিছত ক’ভিড-১৯ ত আক্ৰান্ত হোৱা বুলি চিকিৎসকে নিশ্চিত কৰে। ইয়াৰ পিছত তেওঁক গুৱাহাটীৰ মহেন্দ্ৰ মোহন চৌধুৰী হস্পিতাললৈ প্ৰেৰণ কৰা হয়।
ইপিনে, তেওঁ ক’ভিড-১৯ ত আক্রান্ত বুলি খবৰ পোৱাৰ পিছতে তেওঁৰ পত্নী তথা দুই সন্তানক আইছ’লেছনৰ ব্যৱস্থা কৰা হয়। একেদৰে সোণতলীৰ কাছাৰীপামৰ আশ্রফুল আনোৱাৰ নামৰ এজন লোককওঁ তেওঁৰ পত্নী আৰু দুই সন্তানসহ হাজো কলিতাকুছি মডেল হাস্পতালত কোৱাৰেণ্টাইন কৰা হয়। ইফালে, ছমৰিয়া চক্ৰ বিষয়া অডিতি গগৈ, আৰক্ষী আৰু স্বাস্থ্যকৰ্মীৰ উপস্হিতিত গণ সংক্ৰমনৰ আশংকাত প্ৰশাসনে পুৰাণ গাওঁ ছীল কৰে। গাওঁখনৰ পৰা তিনি কিলোমিটাৰ দূৰত্বলৈ ছীল কৰাৰ উপৰিও জৰুৰী সেৱাৰ বাহিৰে গাঁওখনত অহা-যোৱা সম্পূৰ্ণৰূপে নিষিদ্ধ কৰিছে প্ৰশাসনে।
