ক’ভিড-১৯ ৰ পৰিপ্ৰেক্ষিতত দেশজুৰি অব্যাহত থকা তলাবন্ধৰ সময়ছোৱাত সোমবাৰে কেন্দ্ৰীয় লোকসেৱা আয়োগে এক বিশেষ বৈঠকত অনুষ্ঠিত হয় । এই বৈঠকত তলাবন্ধৰ সময়সীমা বৃদ্ধি প্ৰতি লক্ষ্য ৰাখি আয়োগে দেশৰ সাম্প্ৰতিক পৰিস্থিতিত আয়োগৰ পৰীক্ষা তথা সাক্ষাৎকাৰ অনুষ্ঠিত কৰাটো সম্ভৱপৰ নহয় বুলি সিদ্ধান্ত গ্ৰহণ কৰিছে ।
উল্লেখ্য যে পূৰ্ব নিৰ্ধাৰিত সূচী অনুসৰি অহা ৩১ মে’ত অসামৰিক সেৱা (প্ৰাৰম্ভিক) পৰীক্ষা অনুষ্ঠিত হোৱাৰ কথা আছিল যদিও সংশ্লিষ্ট কাৰণতে পৰীক্ষা স্থগিত ৰখা হৈছে বুলি সদৰী কৰিছে আয়োগে। যিহেতু এই প্ৰাৰম্ভিক পৰীক্ষাক ভাৰতীয় বন সেৱাৰ পৰীক্ষাৰ বাবে স্ক্ৰীণিং টেষ্ট হিচাপে গণ্য কৰা হয়, স্বাভাৱিকতে ভাৰতীয় বন সেৱাৰ পৰীক্ষাও স্থগিত ৰখা হ’ল। এই সমগ্ৰ পৰিস্থিতি অহা ২০ মে’ত পুনৰ পৰ্যালোচনা কৰা হ’ব আৰু এই সময়খিনিৰ ভিতৰত পৰীক্ষাৰ বাবে নতুন তাৰিখ কেন্দ্ৰীয় লোকসেৱা আয়োগৰ ৱেবছাইটত প্ৰকাশ কৰা হ’ব।সদ্যহতে স্থগিত ৰখা পৰীক্ষাসমূহৰ বাবে যেতিয়াই তাৰিখ নিশ্চিত কৰা হ’ব, তেতিয়াই পৰীক্ষাৰ্থীসকলক অতি কমেও ৩০ দিনৰ সময়সীমা প্ৰদান কৰাটো নিশ্চিত কৰা হ’ব বুলি আয়োগে উল্লেখ কৰিছে ।
আয়োগে ইতিমধ্যেই সংশ্লিষ্ট কাৰণতে নিম্নোক্ত দিশসমূহো স্থগিত ৰাখিছে –
ক) অসামৰিক সেৱাৰ পৰীক্ষা ২০১৯ ৰ বাবে বাকী থকা পৰীক্ষাৰ্থীসকলৰ ব্যক্তিত্ব পৰীক্ষা।
খ) ভাৰতীয় অৰ্থনৈতিক সেৱা / ভাৰতীয় পৰিসংখ্যা সেৱাৰ পৰীক্ষা, ২০২০ ৰ জাননী ।
গ) সংযুক্ত মেডিকেল সেৱাৰ পৰীক্ষা, ২০২০ ৰ জাননী।
ঘ) কেন্দ্ৰীয় সশস্ত্ৰ আৰক্ষী বাহিনীৰ পৰীক্ষা, ২০২০ ৰ জাননী।
ঙ) এনডিএ আৰু নৌ একাডেমীৰ পৰীক্ষা, ২০২০ৰ জাননী।
ADVERTISEMENT