প্ৰধানমন্ত্ৰী কে পি শৰ্মা অ’লিৰ পৰামৰ্শ মৰ্মে শনিবাৰে নেপালত সংসদ ভংগ কৰিলে ৰাষ্ট্ৰপতি বিদ্যা দেৱী ভাণ্ডাৰীয়ে । নৱেম্বৰত অন্তৰ্ৱৰ্তী নিৰ্বাচন হ’ব বুলি জনায় ৰাষ্ট্ৰপতি ভাণ্ডাৰীয়ে । বিৰোধী দলসমূহে এই অগণতান্ত্ৰিক, অসাংবিধানিক সিদ্ধান্তৰ সৰ্বত্ৰ বিৰোধিতা কৰিব বুলি জনায় ।
নেপালত ২৭৫ জন সদস্যৰ হাউচ অফ ৰিপ্ৰেজেণ্টিটিভছত চাৰি সদস্যৰ বহিষ্কাৰৰ পাছত সম্প্ৰতি ১৩৬ জনৰ সমৰ্থনতে চৰকাৰ গঠন কৰিব পাৰি । বৰ্তমানৰ নেপালৰ কমিউনিষ্ট পাৰ্টিৰ নেতা অ’লি বা বিৰোধী নেতা ছেৰ বাহাদুৰ দেউবা কোনো এই মুহূৰ্তত সেই সমৰ্থন গোটোৱাৰ পৰিস্থিতিত নাই বুলি জনায় ৰাষ্ট্ৰপতিগৰাকীয়ে । বিগত সপ্তাহৰ আৰম্ভণিতে অ’লিয়ে আস্থা ভোটত পৰাস্ত হৈও সমৰ্থকৰ সংখ্যা বঢ়াত প্ৰধানমন্ত্ৰী পদৰ শপত গ্ৰহণ কৰিছিল ।
বৃহস্পতিবাৰে অ’লিয়ে জনায়, নতুনকৈ কোনেও আস্থা ভোট নিবিচাৰে । শুকুৰবাৰে অ’লি আৰু দেউবা দুয়োজনেই পৃথক চৰকাৰ গঠনৰ দাবী জনায় । কিন্তু, দুয়োজনৰে সমৰ্থক সংখ্যাৰ তালিকাক লৈ প্ৰশ্ন উত্থাপিত হয় । কিছুসংখ্যক সদস্যৰ নাম দুয়োজনৰ তালিকাতে আছে বুলি খবৰ প্ৰকাশিত হয় ।
ইয়াৰ পাছতেই কালি মাজ নিশাৰ মন্ত্ৰী সভাৰ জৰুৰী বৈঠকত অ’লিয়ে ৰাষ্ট্ৰপতিক সাংসদ ভঙাৰ পৰামৰ্শ দিয়ে । নৱেম্বৰৰ ১২ আৰু ১৯ তাৰিখত ভোট গ্ৰহণৰ কথাও জনায় । ৰাষ্ট্ৰপতি ভণ্ডাৰীয়ে এই সিদ্ধান্ততে সমৰ্থন জনায় । বিগত বৰ্ষৰ ডিচেম্বৰটো তেওঁ অ’লিৰ পৰামৰ্শ মৰ্মে সাংসদ ভাঙি দিছিল । পৰৱৰ্তী সময়ত ফেব্ৰুৱাৰীত শীৰ্ষ ন্যায়ালয়ৰ ৰায়ত সাংসদ পুনৰ গঠন হয় ।
নতুন নিৰ্বাচনৰ ঘোষণাত ক্ষুব্ধ বিৰোধী দলসমূহে পুনৰ উচ্চতম ন্যায়ালয়ত যোৱাৰ পৰিকল্পনা কৰিছে । নেপালি কংগ্ৰেছৰ মুখপাত্ৰ বিশ্বপ্ৰসাদ শৰ্মাই কয়, ‘জনসাধাৰণে অতিমাৰীৰ বিৰুদ্ধে যুঁজ দি থকাৰ সময়ত এইটো তেওঁলোকৰ বাবে উপহাৰ নেকি ?’
নেপালি কংগ্ৰেছ নেতা ছেৰ বাহাদুৰ দেউবা, মাওবাদী নেতা প্ৰচণ্ডসহ সকলো বিৰোধী দলেই যৌথ বিবৃতিত স্বাক্ষৰ কৰি এই অসাংবিধানিক সিদ্ধান্তৰ বিৰোধিতা কৰে ।