উত্তৰাখণ্ডৰ নতুন মুখ্যমন্ত্ৰীৰূপে নিৰ্বাচিত হ’ল পুষ্কৰ সিং ধামি । তেওঁ ৰাজ্যখনৰ একাদশ মুখ্যমন্ত্ৰীৰূপে আজি শপতগ্ৰহণ কৰিব । মুখ্যমন্ত্ৰী টিৰথ সিং ৰাৱটে অন্তৰ্কন্দল তথা ১০ ছেপ্টেম্বৰৰ ভিতৰত ৰাজ্যৰ বিধানসভালৈ পুনৰ নিৰ্বাচিত হোৱাৰ ক্ষীণ আশাৰ পৰিপ্ৰেক্ষিতত পদত্যাগ কৰাৰ বাবে নতুন মুখ্যমন্ত্ৰী নিৰ্বাচন কৰা হয় ।
যোৱা মাৰ্চত তদানীন্তন মুখ্যমন্ত্ৰী ত্ৰিবেন্দ্ৰ সিং ৰাৱটৰ বিৰুদ্ধে তীব্ৰ বিসম্বাদৰ পৰিপ্ৰেক্ষিতত এই সময়ৰ সাংসদ টিৰথ সিং ৰাৱটক মুখ্যমন্ত্ৰীৰ পদ দিয়া হৈছিল । সেয়ে এই পদত বাহাল থাকিবলৈ তেওঁ ১০ ছেপ্টেম্বৰৰ ভিতৰত ৰাজ্যখনৰ বিধানসভালৈ নিৰ্বাচিত হৈ আহিব লাগিব । ক’ভিড মহামাৰীল পৰিপ্ৰেক্ষিতত পুনৰ উপ-নিৰ্বাচন অনুষ্ঠিত কৰাটো সুদূৰ পৰাহত হৈ পৰিছে । বিশেষকৈ অহা এবছৰৰ ভিতৰতে উত্তৰাখণ্ড বিধানসভাৰ নিৰ্বাচনো আসন্ন হৈ আছে । ইয়াৰ উপৰি চলিত বৰ্ষৰ মাৰ্চ-এপ্ৰিলত ক’ভিড পৰিস্থিতিৰ ভয়াৱহতাৰ মাজতে পাঁচখন ৰাজ্যৰ বিধানসভা নিৰ্বাচন কৰাক লৈ দেশৰ নিৰ্বাচন আয়োগ বিভিন্ন মহলত তীব্ৰ সমালোচনাৰ সন্মুখীন হৈছে ।
এই পৰিপ্ৰেক্ষিতত উপ-নিৰ্বাচন অনুষ্ঠিত কৰাৰ বাবে আয়োগ কিমান সাজু হ’ব তাকে লৈ প্ৰশ্ন আছে । প্ৰাক্তন মুখ্যমন্ত্ৰী ত্ৰিবেন্দ্ৰ সিঙে সংবাদ মাধ্যমক কয়, ‘উত্তৰাখণ্ডত এক সাংবিধানিক সংকটৰ সৃষ্টি হৈছে কিয়নো আগন্তুক বিধানসভা নিৰ্বাচনলৈ এবছৰৰো কম সময় আছে । এই সময়ত উপ-নিৰ্বাচনৰ বাবে নিৰ্বাচন আয়োগে সন্মতি দিবনে ! নিৰ্বাচন অনুষ্ঠিত কৰাৰ বাবে জনাদেশ আছিল যদিও পূৰ্বতেও অনুমতি নিদিয়াৰ উদাহৰণ আছে । নিৰ্বাচন আয়োগে ক’ভিড অতিমাৰীৰ বাবে কিছুমান ৰাজ্যত নিৰ্বাচন অনুষ্ঠিত কৰিব নোৱাৰে বুলি লিখিতভাৱে প্ৰকাশ কৰিছে ।’
ইপিনে, বিগত তিনিদিনে দিল্লীত বাহৰ পাতি বিজেপিৰ শীৰ্ষ নেতৃত্বৰ স’তে আলোচনাত ব্যস্ত থকা টিৰথ সিঙক শুকুৰবাৰে বিয়লি নিজ ৰাজ্যলৈ যাবলৈ কোৱা হয় । ইয়াৰ পাছতে তেওঁ উত্তৰাখণ্ডৰ ৰাজ্যপাল বেৱী ৰাণী মৌৰ্যৰ সাক্ষাৎ বিচাৰে । ইয়াৰ পূৰ্বে তেওঁ দলৰ ৰাষ্ট্ৰীয় মুৰব্বী জে পি নড্ডাক তেওঁৰ পদত্যাগ পত্ৰ দাখিল কৰে । এক চমু বিবৃতিত টিৰথ সিঙে কয়, ‘সাংবিধানিক সংকটৰ পৰিস্থিতিত মই পদত্যাগ কৰাটো উপযুক্ত হ’ব বুলি বিবেচনা কৰিলো । ক’ভিডৰ বাবে উপ-নিৰ্বাচন অনুষ্ঠিত কৰিব নাযাব ।’
এই পৰিস্থিতিত সুযোগ আহি পৰিল পুষ্কৰ সিঙলৈ । কেন্দ্ৰীয় প্ৰতিৰক্ষামন্ত্ৰী ৰাজনাথ সিঙৰ ঘনিষ্ঠৰূপে পৰিচিত পুষ্কৰ সিঙক উত্তৰাখণ্ডৰ ৫৭ জন বিজেপি বিধায়কে মুখ্যমন্ত্ৰীৰূপে বাছনি কৰে । ৰাজ্যখনৰ ৰাজধানী ডেৰাডুনত বিধায়কসকলে বৈঠক অনুষ্ঠিত কৰি এই সিদ্ধান্ত লয় । ৰাজ্যৰ কুমায়ু অঞ্চলৰ খাটিমা বিধানসভা সমষ্টিত হোৱা দুবাৰকৈ বিধায়ক ৪৫ বছৰীয়া পুষ্কৰ সিঙে ৰাজ্যৰ আন এজন প্ৰাক্তন মুখ্যমন্ত্ৰী ভগৎ সিং ক’শিয়াৰীৰ বিশেষ কৰ্তব্যৰত বিষয়াৰূপেও কাৰ্যনিৰ্বাহ কৰিছিল ।
বিধায়িনী দলৰ নেতা নিৰ্বাচিত হৈ তেওঁৰ ওপৰত আৰোপ কৰা বিশ্বাসৰ বাবে দলীয় নেতাসকলক ধন্যবাদ জনাই পুষ্কৰ সিঙে কয় যে, সকলোৰে সহযোগত সন্মুখৰ প্ৰত্যাহ্বানৰ স’তে মোকাবিলা কৰিব । দলনেতা নিৰ্বাচনৰ বাবে বিজেপিৰ বিধায়কসকলৰ বৈঠকত কেন্দ্ৰীয় পৰ্যবেক্ষকৰূপে উপস্থিত আছিল কেন্দ্ৰীয় কৃষিমন্ত্ৰী নৰেন্দ্ৰ সিং টোমৰ আৰু ৰাজ্যৰ ভাৰপ্ৰাপ্ত দুষ্যন্ত কুমাৰ গৌতম । নতুন মুখ্যমন্ত্ৰীৰূপে বিভিন্নজনৰ নাম চৰ্চাত আছিল । ইয়াৰে ভিতৰত সতপাল মহাৰাজ, ধন সিং ৰাৱট আদিৰ নাম উল্লেখযোগ্য । মনকৰিবলগীয়া যে ৰাজ্যখনত মাত্ৰ চাৰিমাহৰ ভিতৰতে তিনিজনকৈ মুখ্যমন্ত্ৰীয়ে শপত ল’লে ।
