কৰ’না সংক্ৰমণৰ পাছত সুস্থ হােৱা লােকৰ মাজত অন্যান্য স্বাস্থ্যজনিত সমস্যা বৃদ্ধি পাইছে। দিল্লীৰ অখিল ভাৰতীয় আয়ুর্বিজ্ঞান প্রতিষ্ঠান (এইমছ)ৰ চিকিৎসক-গৱেষকৰ এক অধ্যয়নৰ তথ্য অনুসৰি কৰ’নাত সুস্থ হৈ উঠা ৪০ শতাংশৰাে অধিক লােকৰ শৰীৰত বিভিন্ন ধৰণৰ উপসর্গই দেখা দিছে।
একেটা অধ্যয়নতে গৱেষকে লাভ কৰা তথ্যত উল্লেখ কৰা মতে, প্রায় ১০ শতাংশ ৰােগী কৰ’নাত সুস্থ হােৱাৰ তিনিমাহৰ পাছতাে একাধিক উপসর্গত আক্রান্ত হৈ আছে।
এইমছৰ চিকিৎসকে উত্তৰ ভাৰতৰ ১২০০ৰাে অধিক কৰ’না ৰােগীক সামৰি এই বিষয়ত এক অধ্যয়ন চলাইছিল। এইমছৰ মেডিচিন বিভাগৰ মুৰব্বী চিকিৎসক নৱনীত বিগৰ নেতৃত্বত এই অধ্যয়ন চলােৱা হৈছিল।
ডাঃ বিগে কয় যে এই অধ্যয়নৰ জৰিয়তে এটা কথা স্পষ্ট হৈছে যে কৰ’নাত আক্রান্ত হােৱা ৰােগীয়ে সুস্থ হােৱাৰ পাছতাে তিনিৰ পৰা ছমাহলৈকে স্থানীয চিকিৎসকৰ স’তে যােগাযােগ ৰখা উচিত।
কিয়নাে ৪০ শতাংশৰাে অধিক সুস্থ ৰােগীৰ শৰীৰত ছমাহ পর্যন্ত ক’ভিড সদৃশ কেতবােৰ উপসর্গ বৰ্তি আছিল। অধ্যয়নত অংশ লােৱা ক’ভিড ৰােগীসকলৰ মাত্র ১০ শতাংশৰহে তিনিমাহৰ ভিতৰত উপসর্গ আঁতৰ হৈছিল।
ডাঃ বিগে লগতে কয় যে ক’ভিডত সুস্থ হােৱা লােক আতংকিত হােৱাৰ প্রয়ােজন নাই, কিন্তু তেওঁলােক সাৱধান হােৱাটো জৰুৰী। ১৮ৰ অধিক বয়সৰ মুঠ ১,২৩৪ জন ৰােগীক লৈ চলােৱা অধ্যয়নটোত ৪৯৫ ৰােগীৰ শৰীৰত সুস্থ হােৱাৰ পাছতাে একাধিক উপসর্গ প্রত্যক্ষ হৈছিল।
এইসকলৰ ১৮ শতাংশ অর্থাৎ ২২৩ জন ৰােগীৰ চাৰি সপ্তাহৰ ভিতৰত উপসর্গ আঁতৰ হৈছিল। আনহাতে, ১২ শতাংশ ৰােগীৰ ক্ষেত্ৰত ১২ সপ্তাহলৈকে উপসর্গ বৰ্তি আছিল আৰু ১০ শতাংশ ৰােগীৰ ক্ষেত্ৰত তিনিমাহৰ পাছতাে ক’ভিড সদৃশ কেতবােৰ উপসর্গ বাহাল আছিল।
কৰ’নাত সুস্থ হােৱা ৰােগীৰ মাজত সাধাৰণতে মাংসপেশীৰ বিষ, শ্বাস- প্রশ্বাসৰ সমস্যা সর্বাধিক প্রত্যক্ষ হৈছে বুলি এইছৰ গৱেষকে জানিবলৈ দিয়ে। ১০.৯ শতাংশ লােকে মাংসপেশীৰ বিষ, ৬.১ শতাংশ লােকে শ্বাস-প্রশ্বাসৰ সমস্যা, ৫.৫ শতাংশ লােকে ভাগৰ অনুভৱ কৰাৰ অভিযােগ উত্থাপন কৰিছিল। ক’ভিডত সুস্থ হােৱা একাংশ ৰােগীৰ মাজত নিদ্রাহীনতা, মানসিক অস্থিৰতা বৃদ্ধিৰ দৰে সমস্যায়াে দেখা দিছে।