অহা ছেপ্টেম্বৰৰ পৰা ৰাজ্যত উচ্চতৰ মাধ্যমিক শ্ৰেণীৰ পৰা স্নাতকোত্তৰ পৰ্যায়লৈ শ্ৰেণীকোঠাত পাঠদান আৰম্ভ হ’ব । ছেপ্টেম্বৰৰ প্ৰথম সপ্তাহৰ পৰাই আৰম্ভ হ’ব উচ্চতৰ মাধ্যমিক চূড়ান্ত বৰ্ষ, স্নাতক চূড়ান্ত বৰ্ষ আৰু স্নাতকোত্তৰ অন্তিম বৰ্ষৰ শ্ৰেণীসমূহ ।
কালি মুখ্যমন্ত্ৰী হিমন্ত বিশ্ব শৰ্মাৰ অধ্যক্ষতাত অনুষ্ঠিত ৰাজ্য চৰকাৰৰ কেবিনেট বৈঠকত এই সিদ্ধান্ত গ্ৰহণ কৰা হয় । ইয়াৰ পৰিপ্ৰেক্ষিতত ১৮ বছৰৰ অধিক বয়সৰ শিক্ষক-কৰ্মচাৰী আৰু ছাত্ৰ-ছাত্ৰীৰ টিকাকৰণৰ বাবে কাইলৈৰ পৰা পাঁচ ছেপ্টেম্বৰলৈ খণ্ড প্ৰাথমিক শিক্ষা বিষয়া, বিদ্যালয় পৰিদৰ্শকৰ কাৰ্যালয় আৰু সকলো বিশ্ববিদ্যালয় চৌহদত ক’ভিড টিকাকৰণ শিবিৰ অনুষ্ঠিত হ’ব ।
কেবিনেটৰ সিদ্ধান্তসমূহ সংবাদমেলত সদৰী কৰে মন্ত্ৰীত্ৰয় কেশৱ মহন্ত, ৰণোজ পেগু আৰু ৰঞ্জিত দাসে । কেবিনেটৰ অনুমোদন অনুসৰি শ্ৰেণীত উপস্থিত থকাৰ বাবে ক’ভিডৰ প্ৰতিষেধকৰ প্ৰথমপালি গ্ৰহণ কৰাটো বাধ্যতামূলক হ’ব । অৱশ্যে হোষ্টেলসমূহ মুকলি কৰাৰ বাবে আৱাসীসকলে প্ৰতিষেধকৰ দুয়োটা পালি গ্ৰহণ কৰিব লাগিব । শিক্ষানুষ্ঠান পুনৰ মুকলি আৰু ইয়াৰ সম্পৰ্কিত বিষয়সমূহ সামৰি অহা ৩১ আগষ্ট বা তাৰ পূৰ্বে চৰকাৰে নতুন নিৰ্দেশনা জাৰি কৰিব বুলিও সংবাদমেলত কোৱা হয় ।
ইপিনে, কেবিনেটে জনস্বাস্থ্য কাৰিকৰী বিভাগৰ তিনিটা নতুন সংমণ্ডল সৃষ্টিৰ সিদ্ধান্ত গ্ৰহণ কৰে আৰু ইয়াৰ বাবে ৯৩টা নতুন পদ সৃষ্টিৰ অনুমোদন জনায় । এই সংমণ্ডলকেইটা হৈছে ক্ৰমে – মাজুলী, দক্ষিণ শালমাৰা-মানকাচাৰ আৰু বজালী । সংমণ্ডল তিনিটাৰ মুখ্য কাৰ্যালয় হ’ব ক্ৰমে কমলাবাৰী, হাটশিঙিমাৰী আৰু পাঠশালাত ।
আনহাতে, কেবিনেটে প্ৰতি বছৰে তিনি ছেপ্টেম্বৰত অৰ্জুন ভোগেশ্বৰ বৰুৱাৰ জন্মদিনটো ক্ৰীড়া দিৱস হিচাপে উদযাপনৰ সিদ্ধান্ত গ্ৰহণ কৰে । তদুপৰি ক্ৰীড়া পেন্সনৰ পৰিমাণ বৰ্তমানৰ আঠ হেজাৰৰ পৰা ১০ হেজাৰ টকালৈ বৃদ্ধিৰ সিদ্ধান্তৰ লগতে ক্ৰীড়াবিদসকললৈ আগবঢ়োৱা এককালীন আৰ্থিক সাহায্যৰ পৰিমাণ ৫০ হেজাৰ টকা নিৰ্ধাৰণ কৰে
তদুপৰি কেবিনেটত কালি গ্ৰহণ কৰা সিদ্ধান্ত অনুসৰি ৰাষ্ট্ৰীয় চেম্পিয়নশ্বিপ, এছিয়ান গেমছ, কমনৱেলথ গেমছ আৰু অলিম্পিকত পদক অৰ্জন কৰা খেলুৱৈসকলক প্ৰতিমাহে ১০ হেজাৰ টকাকৈ জীৱনজোৰা পেঞ্চন প্ৰদান কৰা হ’ব ।
লোকনিৰ্মাণ (গৃহ) বিভাগৰ কাম-কাজৰ ৰূপায়ণৰ বাবে ৰাজ্যত আঠটা নতুন চক্ৰ, ২০টা নতুন সংমণ্ডল আৰু ২৮টা উপ-সংমণ্ডল সৃষ্টিটো কেবিনেটে অনুমোদন জনায় । তদুপৰি বিভাগটোৰ বাবে ৮০৪টা কাৰিকৰী পদ সৃষ্টিৰ লগতে কেবিনেটে অনুমোদন জনায় । সংবাদমেলত সদৰী কৰা অন্যান্য সিদ্ধান্তসমূহৰ ভিতৰত আছে ৰাজ্য চৰকাৰৰ বিজ্ঞান আৰু প্ৰযুক্তি বিভাগক বিজ্ঞান, প্ৰযুক্তি আৰু জলবায়ু পৰিৱৰ্তন বিভাগ হিচাপে নামকৰণৰ সিদ্ধান্ত ।
সংবাদমেলত কোৱা হয় যে জনসেৱাৰ স্বাৰ্থত তথা চৰকাৰী কাৰ্যসূচীৰ সফল ৰূপায়ণৰ বাবে কৰ্মচাৰীসকলক সংশ্লিষ্ট বিভাগৰ মুৰব্বীৰ স’তে আলোচনা মৰ্মে কনিষ্ঠ অভিযন্তা পদৰ পৰ্যায়লৈ জিলাৰ ভিতৰতে বদলিৰ কৰ্তৃত্ব উপায়ুক্তক প্ৰদানৰ বাবে কেবিনেটে অনুমোদন জনাইছে ।
বৈঠকত বিটিএডিৰ বান পৰিস্থিতিৰ পৰ্যালোচনাৰ লগতে পৰিস্থিতি নিৰীক্ষণৰ বাবে মন্ত্ৰী যোগেন মহন আৰু ইউজি ব্ৰহ্মক দায়িত্ব অৰ্পণ কৰা হয় । উল্লেখ্য যে বৈঠকৰ আৰম্ভণিতে ধেমাজিৰ মৰিঢল মহাবিদ্যালয়ৰ ছাত্ৰী নন্দিতা শইকীয়াৰ দুৰ্ভাগ্যজনক মৃত্যুত কেবিনেটে গভীৰ শোক প্ৰকাশ কৰে । লগতে অসম আৰক্ষীৰ বিশেষ সঞ্চালকপ্ৰধান জি পি সিঙক এই গোচৰৰ দ্ৰুত তদন্তৰ বাবে নিৰ্দেশ দিয়া হৈছে ।