মানাহ ৰাষ্ট্ৰীয় উদ্যানৰ বাঁহবাৰী ৰেঞ্জৰ অন্তৰ্গত মহল কেম্পত মাতৃহাৰা এটি ডেৰবছৰীয়া বনৰীয়া পোৱালি হাতীক মাতৃস্নেহৰ মৰম দিছে বনকৰ্মীয়ে ৷ ১৫ দিন পূৰ্বে বাগসাৰ ককলাবাৰীত বিদ্যুৎপৃষ্ট হৈ মৃত্যু হৈছিল ডেৰবছৰীয়া বনৰীয়া পোৱালি হাতীটোৰ মাতৃৰ ৷ প্ৰকাণ্ড মাইকী বনৰীয়া হাতীটোৰ নিথৰ দেহৰ কাষৰ পৰা পোৱালি হাতীটোক উদ্ধাৰ কৰিছিল বনবিভাগে ৷ মাতৃস্নেহৰ পৰা বঞ্চিত পোৱালি হাতীটোক বনবিভাগে মানাহ ৰাষ্ট্ৰীয় উদ্যানৰ বনবিভাগৰ মহল কেম্পত আশ্ৰয় দি খোৱা-লোৱাকে ধৰি সকলো ধৰণৰ ব্যৱস্থা গ্ৰহণ কৰিছে ৷
বনকৰ্মীসকলে পোৱালি হাতীটোক পানী, কলপাত, দল ঘাঁহ, পকা কল, তৰা গছৰ পাত আদি যোগান ধৰি সুস্থ কৰাৰ লগতে ডাঙৰ-দীঘল কৰাৰ চেষ্টা অব্যাহত ৰাখিছে ৷ পোৱালি হাতীটোক খাদ্য যোগান ধৰাৰ সমান্তৰালভাৱে বনকৰ্মীসকলে গা-ধুৱাই দিয়ে ৷ হাতী পোৱালিটোৰ লগত ওতঃপ্ৰোতভাৱে জড়িত হৈ থকা এগৰাকী বনকৰ্মীয়ে আবেগিক হৈ কয়, “নিজৰ সন্তানৰ দৰে মৰম কৰি আছো আমি ৷ খুৱাবলৈ দল ঘাঁহ মানাহত খুব কমকৈ পোৱা যায় ৷ বেলেগ ঠাইলৈ গৈ পুখুৰী বা বিলৰ পৰা আনিব লাগে ৷ মাকলৈ মনত পৰিলে বৰকৈ কান্দে পোৱালিটোৱে ৷ অন্যান্য হাতী পোৱালিবোৰে কান্দিলেও কান্দে ৷ ভোক লাগিলেও কান্দে ৷”
উল্লেখ্য যে ডেৰবছৰীয়া বনৰীয়া হাতী পোৱালিটোৰ বয়স পাঁচ বছৰ হ’লেহে হাতীৰ মাউতে পোহনীয়া কৰাৰ প্ৰশিক্ষণ দিব বুলি বনকৰ্মীসকলে জানিবলৈ দিয়ে ৷ মাতৃৰ মৰম বিচাৰি বিয়াকুল হৈ থকা পোৱালি হাতীটোক মাতৃস্নেহৰ পৰা আঁতৰত নৰখাৰ পণ কৰিছে দিনে-নিশাই কৰ্তব্যৰত মানাহৰ বাঁহবাৰী ৰেঞ্জৰ বনকৰ্মীসকলে ৷