ওড়িছা উচ্চ ন্যায়ালয়ত এক আমোদজনক ঘটনা সংঘটিত হ’ল । উচ্চ ন্যায়ালয়ৰ মুখ্য ন্যায়াধীশ এছ মুৰলীধৰে অধিবক্তাসকলক আহ্বান জনাই ক’লে যে তেওঁক যাতে কোনেও ‘মাই লৰ্ড’ বা ‘ইয়ৰ লৰ্ডশ্বিপ’ বুলি সম্বোধন নকৰে । সোমবাৰে মুখ্য ন্যাশাধীশজনৰ বিচাৰপীঠে এক গোচৰৰ শুনানিৰ সময়ত এইদৰে আহ্বান জনাই অধিবক্তাসকলক কয়, ‘সকলো অধিবক্তা আৰু সংশ্লিষ্ট পক্ষক মোৰ আহ্বান যে তেওঁলোকে এই বিচাৰপীঠৰ ন্যায়াধীশসকলক ‘মাই লৰ্ড’ বা ‘ইয়ৰ লৰ্ডশ্বিপ’ বা ‘ইয়ৰ অনাৰ’ বুলি সম্বোধন কৰাৰ পৰা বিৰত থাকে । ইয়াৰ পৰিৱৰ্তে অন্য ধৰণৰ সম্বোধন, যিসমূহ ন্যায়ালয়ৰ মৰ্যাদা উপযোগী হয় যেনে ‘ছাৰ’ বুলি কৰিব পাৰিব ।’
মুখ্য ন্যায়াধীশজনৰ এনে আহ্বানক অধিবক্তাসকলে আদৰণি জনাইছে । ওড়িছা উচ্চ ন্যায়ালয়ৰ বাৰ এছ’চিয়েছনৰ সম্পাদক জে কে লংকাই মুখ্য ন্যায়াধীশ মুৰলীধৰৰ সিদ্ধান্তক আদৰণি জনাই কয় যে অন্যান্য ন্যায়াধীশসকলেও এই পদক্ষেপ গ্ৰহণ কৰা উচিত । ‘এয়া এক স্বাগতমযোগ্য পদক্ষেপ । অন্যান্য ন্যায়াধীশ, অধিবক্তা আৰু বাদী-বিবাদীয়েও ইয়াক পালন কৰা উচিত । ‘ছাৰ’ সম্বোধন ‘মাই লৰ্ড’ৰ দৰেই সন্মানজনক ।’ লংকাই এইদৰে কয় ।
উল্লেখ্য যে ১৯৭০ৰ দশকতে ওড়িছা উচ্চ ন্যায়ালয়ে ন্যায়াধীশক ‘ছাৰ’ সম্বোধন কৰাৰ বাবে প্ৰথম পদক্ষেপ গ্ৰহণ কৰিছিল যদিও বৰ্তমানলৈকে আদালতৰ কাম-কাজত অধিবক্তাসকলে ন্যায়াধীশক ‘ইয়ৰ লৰ্ডশ্বিপ’ বুলি সম্বোধন কৰি আহিছে ।
